Pagdawat ug Pag-ila sa Langitnong Giya
Ni Elder Adilson de Paula Parrella
Sa Seventy
Ang Dios andam nga mohatag kanato og direksyon, apan kinahanglang matinguhaon ug andam kita nga modawat niini.
Isip batan-ong mga misyonaryo sa missionary training center sa Brazil, gisangunan kami og usa ka adlaw nga moadto, isip managkompanyon, sa kadalanan sa São Paulo aron modapit og mga tawo sa pagpaminaw sa mga leksyon sa misyonaryo. Human sa pipila ka oras mibalik kami sa MTC ug mipahigayon og miting sa pagpamatuod.
Daghan ang namulong kabahin sa mga pag-aghat nga ilang nadawat aron moadto sa usa ka piho nga dalan o moduol sa usa ka piho nga tawo. Ganahan ko nga maminaw niini nga mga kasinatian. Hinoon, tungod kay wala akoy susama nga kasinatian, mibati ko nga tingali dili igo ang akong kamaayo, o dili kaayo andam, nga mahimong misyonaryo.
Mibati og pagkawalay kadasig, nangayo ko og tabang gikan sa kapangulohan sa MTC. Mitabang sila nako nga makasabut nga ang Dios andam nga mohatag kanato og mga instruksyon pinaagi sa Espiritu Santo, ug samtang ang akong kasinatian tingali dili sama sa uban, kinahanglan gihapon ko nga magpakasarang sa direksyon sa Espiritu. Sama sa usa ka radyo nga kinahanglang natunong ngadto sa piho nga estasyon, o sa smartphone nga kinahanglang konektado sa internet, kita kinahanglang natunong ug konektado aron makadawat sa unsay isulti sa Espiritu Santo kanato.
Espirituhanon nga Pagkaluwas
Mihatag si Presidente Nelson sa mosunod nga pasidaan: “Sa umaabut nga mga adlaw, dili na posible ang espirituhanong pagsugakod kon wala ang giya, direksyon, ug makahupay nga impluwensya sa Espiritu Santo.”1
Miawhag siya kanato nga “palapdan pa ang [atong] kasamtangang espiritwal nga abilidad sa pagdawat og personal nga pagpadayag, tungod kay ang Ginoo misaad nga ‘kon kamo [magtinguha], kamo makadawat og pagpadayag ug dugang nga pagpadayag, kahibalo ug dugang nga kahibalo, nga kamo masayud sa mga misteryo ug malinawon nga mga butang—nga nagdala og hingpit nga kalipay, niana nga nagdala og kinabuhi nga dayon’ [Doktrina ug mga Pakigsaad 42:61].”2
Atol sa atong panaw dinhi sa yuta, ang Ginoo nagpaabut kanato nga “mobuhat og daghan nga mga butang diha sa [atong] kaugalingon nga gawasnon nga kabubut-on, ug magpahinabo sa daghan nga pagkamatarung” (Doktrina ug mga Pakigsaad 58:27). Hinoon, ang ubang mga butang mabuhat lamang nato uban sa tabang sa langit. Ang Espiritu Santo mopadayag kanato sa unsay kinahanglan natong buhaton aron magpabilin—ug mouswag subay—sa dalan sa kalipay niining kinabuhia ug makapanunod sa kinabuhing dayon. “Kay tan-awa, pag-usab ako moingon nganha kaninyo nga kon kamo mosulod pinaagi sa agianan, ug modawat sa Espiritu Santo, kini mopakita nganha kaninyo sa tanan nga mga butang nga kinahanglan inyong buhaton” (2 Nephi 32:5).
Ang Sumbanan sa Ginoo
Ang mga kasulatan mipasabut kon unsaon sa Ginoo sa paghatag kanato og personal nga pagpadayag: “Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing” (Doktrina ug mga Pakigsaad 8:2).
Ang Ginoo misulti usab kanato nga “itugyan ang imong pagsalig diha niana nga Espiritu nga nagtultol sa pagbuhat og maayo” (Doktrina ug mga Pakigsaad 11:12). Usahay ang Espiritu mogiya kanato sa pagbuhat og maayo pinaagi sa mga hunahuna, mga ideya, nagsunod nga mga ideya, mga impresyon nga molikay o mosugod sa paghimo og usa ka butang, mga panan-aw o panabut, pagbutyag sa mga butang nga dili nato makat-unan sa atong kaugalingong kapasidad nga kita ra, panumduman sa nakalimtan nga mga butang, ug uban pa.3
Diha sa Mga Taga-Galacia 5:22–23, atong makat-unan nga ang Espiritu Santo sa kasagaran makigsulti pinaagi sa mga pagbati ug mga emosyon sama sa gugma, kalipay, kalinaw, pailub, pagkamapuanguron, pagkamaayo, pagkamatinumanon, kaaghup, ug pagpugong sa kaugalingon. Ang tabang nga atong madawat gikan sa Espiritu Santo kanunay nga moabut isip gipahaum nga mga instruksyon alang sa atong piho nga mga panginahanglan, apan hinumdumi, ang ingon nga paggiya moagni kanato sa pagbuhat og maayo (tan-awa sa Moroni 7:13) ug kanunay nga nahiuyon sa mga pagtulun-an sa buhing mga propeta ug sa balaang kasulatan.
Dawata ug Ilha
Tingali usa sa nag-unang mga hagit sa mortalidad mao ang pagkasayud unsaon sa pagdawat, pag-ila, ug pagsunod sa mga pag-aghat ug giya gikan sa Espiritu Santo. Ang mosunod nga mga leksyon mahimong makatabang kanato.
Leksyon 1: Ang Ginoo andam nga mohatag kanato og personal nga pagpadayag, apan kinahanglang andam kita sa pagdawat niini.
“Usa sa mga butang nga gibalik-balik sa Espiritu og silsil sa akong hunahuna sukad sa akong bag-o nga tawag isip Presidente sa Simbahan,” miingon si Presidente Nelson, “mao ang pagkaandam sa Ginoo nga mopadayag sa Iyang hunahuna ug kabubut-on. Ang pribilehiyo sa pagdawat og pagpadayag usa sa labing mahinungdanon nga mga gasa sa Dios ngadto sa Iyang mga anak.”4
Didto sa MTC, akong nakat-unan nga kinahanglan nga andam ako sa pagdawat sa bisan unsa nga gusto sa Ginoo nga ipadala kanako, sumala sa Iyang panahon ug sa Iyang paagi. Akong nakat-unan nga ang kasamok makapalinga pag-ayo kanato nga dili na kita makahimo sa pag-ila kon ang Ginoo nakigsulti kanato o sa pagpaminaw og maayo sa mensahe nga gusto Niya nga atong madungog.
Si Elder David A. Bednar sa Korum sa Napulog Duha ka mga Apostoles miingon, “Samtang magtinguha ug modapit kita sa Espiritu Santo sa atong kinabuhi ug magkat-on sa pagsunod dayon sa yano nga mga pag-aghat, kita usab makahimo sa pagsampong sa makabalda nga mga kasaba sa kalibutan ug klarong makatutok sa mga pag-aghat sa Espiritu Santo.”5
Leksyon 2: Kinahanglan nga atong tun-an ug kat-unan kon sa unsang paagi naglihok ang pinulongan sa Espiritu.
Si Elder Ronald A. Rasband sa Korum sa Napulog Duha ka mga Apostoles miingon, “Ang Espiritu kasagaran makig-istorya pinaagi sa pagbati. “Mabati ninyo kini diha sa mga pulong nga pamilyar ninyo, nga masabtan ninyo, nga moaghat ninyo. …
“… Kini nga mga pagbati malumo, hinay nga pag-awhag nga molihok, nga mobuhat og butang, mosulti og butang, motubag sa piho nga paagi.”6
Ang pagkat-on sa pagdawat og pagpadayag gikan sa Espiritu Santo mahimong matandi ngadto sa pagkat-on og pinulongan. Sa sinugdanan gamay ra kita og masabtan o tingali wala gayud. Apan samtang magpadayon kita sa pagkugi, makasabut kita sa mga pulong, dayon sa mga kapahayag, dayon sa tibuok mga hunahuna. Sa katapusan atong makaplagan ang atong kaugalingon nga makasabut sa unsay gisulti. Aron makat-on sa pinulongan sa Espiritu, kita kinahanglang:
-
Magtinguha sa pagkat-on.
-
Magtuon, diha sa mga kasulatan ug sa mga pulong sa buhi nga mga propeta, kon sa unsang paagi madawat ang pagpadayag.
-
Mohatag og pagtagad sa espirituhanon nga mga impresyon.
-
Mohangyo sa Dios sa pagpadala kanato og giya pinaagi sa Espiritu Santo.
-
Mahimong andam sa pagdawat—dili mobaliwala o mosayun-sayon—sa mga instruksyon nga nadawat.
-
Mosunod sa mga pag-aghat.
-
Sinsero nga magtinguha sa pagdawat og dugang nga giya.
Leksyon 3: Ang Langitnong Amahan adunay Iyang kaugalingong paagi ug panahon sa paghatag kanato og mga pagpadayag.
Kini nga leksyon naglakip og tulo ka baruganan:
-
Ang Dios makapahibalo ug mopahibalo kanato kon unsay buhaton aron molambo. Ang buhat sa atong Langitnong Amahan mao ang pagtabang kanato nga makaangkon og kinabuhing dayon (tan-awa sa Moises 1:39). “[Siya] wala lang maghunahuna sa atong kahupayan apan mas labaw pang naghunahuna sa atong paglambo,” miingon si Presidente Henry B. Eyring, Ikaduhang Magtatambag sa Unang Kapangulohan.7
Nagpasabut kini nga ang Langitnong Amahan nagpakabana mahitungod sa mga lakang nga atong himoon dinhi sa yuta. Nasayud siya kon unsa nga desisyon ang kinahanglan natong himoon ug unsa nga mga lihok ang kinahanglan natong buhaton aron kita “mahimo nga mga anak sa Dios” (Moroni 7:48). “Labaw sa tanan, gusto Niya nga inyong maabot ang inyong padulngan—pagbalik sa inyong langitnong panimalay nga madungganon,” miingon si Elder Dieter F. Uchtdorf sa Korum sa Napulog Duha ka mga Apostoles.8
-
Usahay dili kita makasabut sa rason sa langitnon nga mga instruksyon. Ang Dios usahay mopadala kanato og mga instruksyon nga wala nato dahuma. Nakahinumdom ko nga naglingkod sa miting sa sakramento sa dihang ang usa ka impresyon klarong miabut sa akong hunahuna. Ang instruksyon dili usa ka tingog o usa ka hunghong apan usa ka klarong hunahuna nga nagsulti og usa ka butang nga kinahanglan nakong buhaton. Wala ko magdahum nga makadawat sa maong instruksyon panahon sa miting sa sakramento.
Milingi ko sa akong asawa ug misulti kaniya mahitungod sa pag-aghat nga bag-o lang nakong nadawat. Miingon siya nga kinahanglan nakong sundon ang pag-aghat, bisan tuod wala kami makasabut sa mga rason luyo niini.
Sa among pagtuman niana nga instruksyon, ug paglabay sa panahon, nakaangkon kami og pipila ka mga saksi nga ang direksyon nga among nadawat nakahatag kanamo og mas dakong kalinaw ug misiguro nga magpabilin kami sa among dalan sa paglambo.
-
Kinahanglang andam kitang mobuhat sa kabubut-on sa Dios. Sa Iyang kahingpitan ug kaalam, ang Dios nasayud sa unsay labing maayo alang kanato. Ang Iyang kabubut-on, nakabase sa balaanong panglantaw, nagpakita kanato og mas maayo nga paagi. Apan sa kasagaran mahimong lisud kini alang kanato. Niini, sama sa tanang butang, si Jesukristo mao ang atong hingpit nga ehemplo. Gihimo Niya nga Iyang kabubut-on ang kabubut-on sa Amahan. Samtang ang Manluluwas nag-antus alang sa atong mga sala, nag-ampo Siya, “Amahan ko, kon mahimo man, isaylo lang kanako kining kopa; ngani, dili sumala sa akong pagbuot kon dili sa imo” (Mateo 26:39).
Kita usab kinahanglan nga andam mobutang sa kabubut-on sa Dios labaw sa atong kaugalingong mga tinguha. Samtang modawat kita sa Iyang kabubut-on ug mobuhat niini, giandam nato ang atong kaugalingon sa pagdawat og dugang nga giya. Si Elder Bednar mitudlo nga “samtang kita nagtahud sa atong mga pakigsaad ug nagsunod sa mga sugo, samtang kita kanunay gayud nga naningkamot sa pagbuhat og maayo ug mahimo nga mas maayo, makalakaw kita uban ang pagsalig nga ang Dios mogiya sa atong mga lakang.”9
Pagdawat sa Tabang sa Langit
Ang atong mahangturong pag-uswag mag-agad sa pagdawat og personal nga giya gikan sa Espiritu Santo. Hinaut nga ang matag usa kanato determinado sa pagsunod sa tambag ni Presidente Nelson nga magtinguha og pagpadayag alang sa atong kinabuhi. Kon kita motuo ug mosalig nga ang Dios gusto nga mopadala kanato og direksyon pinaagi sa Espiritu Santo, nan, samtang matinguhaon kitang mosentro sa atong kinabuhi sa pagtinguha og tabang sa langit, makadawat kita sa giya nga atong gikinahanglan.