BATAN-ONG MGA HAMTONG
Usa ka Lakang Matag Higayon
Litrato gikan sa Getty Images
Ang pagkaperpekto makahadlok paminawon—ilabi na kon mao kini ang atong himoong sumbanan sa atong dili perpekto nga kaugalingon. Buot nakong ipasabut, ang tanan makahimo og mga sayop usahay ug magmahay sa mga sayop. Kasagaran, kini nga mga pagmahay makatabang kanato sa paghimo sa gikinahanglan nga mga kausaban, apan kon kita mogahin og dugayng panahon sa paghunahuna sa panginahanglan nga mobuhat og mas maayo ug mahimong mas maayo, kadto nga mga hunahuna makaluya. Sa iyang artikulo sa pahina 44, si Nathan motabang kanato sa pag-ila kon unsa gayud ang pagkahingpit [pagkaperpekto] ug sa unsang paagi nato kini makab-ut pinaagi sa matarung nga pagpuyo, usa ka gamayng butang matag higayon.
Kasagaran nga bation usab nato nga nag-inusara kita sa atong pakigbisog aron molambo, apan wala kita mag-inusara! Ang Langitnong Amahan ug si Jesukristo mosuporta kanato. Kon mibati ka nga dili igo ang imong kamaayo, basaha ang artikulo ni Joëlle sa pahina 42 kon sa unsang paagi ang pagsabut sa Pag-ula sa Manluluwas nakatabang kaniya nga mabuntog ang iyang pagkaperpeksyonista.
Kasagaran, ang pagkaperpeksyonista manghinobra ang pagtutok diha sa mga butang nga sama sa kalimpyo, sama sa mga kabalaka ni Amber, o sa mga aspeto sa ebanghelyo, sama sa panglimbasug ni Aaron nga mahimong usa ka tawo sa Dios (pareho nga pang-digital lamang nga mga artikulo). Apan sama sa nakaplagan niini nga batan-ong mga hamtong, mabati gihapon nimo ang Espiritu ug mahimong usa ka tawo sa Dios bisan kon dili ka perpekto.
Gusto pa og dugang nga maayong balita? Ang mando nga “kamo kinahanglan magmahingpit” (Mateo 5:48) tingali wala gayud magpasabut kon unsay imong hunahuna nga gipasabut niini. Basaha ang pang-digital lamang nga artikulo ni David aron makat-on og pipila ka mga lakang sa pagbuntog sa pagkaperpeksyonista.
Samtang maningkamot kita nga molambo, kinahanglan natong hinumduman nga gusto sa Ginoo nga madasig ug mabayaw kita—dili magul-anon. Mahimong hinawayon ra kaayo kita sa atong kaugalingon (tan-awa ang akong pang-digital lamang nga artikulo) ug kinahanglan nga mahinumdom nga magmabination sa atong kaugalingon sa atong panaw padulong sa pagkahingpit.
Tutuk ngadto sa Langitnong Amahan ug sa Manluluwas. Nahibalo sila sa imong balaanong bili ug, paglabay sa panahon, makatabang kanimo nga mahimong mas labaw pa kay sa unsay imong nahunahuna sukad nga ikaw mamahimo. Sa hinay-hinay.
Matinuoron,
Heather Claridge