Mga Panalangin sa Pagbarug Pinaagi sa Kinaugalingong Paningkamot
Ang Klase Nga Nakapausab sa Among Direksyon
Ang kinitaan ni Chris ug Alfreda Rubio igo lang ikabayad sa ilang mga panginahanglan hangtud nga ang usa ka klase sa pagbarug pinaagi sa kaugalingong pagpaningkamot mipakita kanila og mas maayong paagi.
Chris Rubio, usa ka tigpintal, miabut sa trabahoan uban sa iyang asawa, si Alfreda.
Sa dihang naguba ang van ni Chris ug Alfreda Rubio bag-ohay lang, wala sila mabalaka kon unsaon nila sa pagbayad ang pagpaayo niini. Ug dili kini tungod kay adunahan sila.
“Aduna kami sa kwarta nga among gikinahanglan tungod kay nagtigum kami niini,” miingon si Chris. “Andam na kami. Among gipaayo ang van nianang adlawa nga wala maghunahuna, ‘O, dili.’ Nindot kaayo kadto.”
Dili kini ingon niana kaniadto. Dili pa lang dugay, ang mga Rubio manghulam na siguro og kwarta, mogamit og credit card, o mohulat hangtud sa sweldo aron maayo ang ilang van. Apan kaniadto kana sa wala pa sila makakuha sa klase mahitungod sa personal nga panalapi nga gitanyag pinaagi sa inisyatibo sa Simbahan mahitungod sa pagbarug pinaagi sa kaugalingong pagpaningkamot.
“Naglisud Kami sa Among Problema sa Panalapi”
Si Chris ug Alfreda nagkahimamat samtang nagserbisyo sa U.S. Air Force sa Germany ug naminyo sa Denmark. Nahuman ni Chris ang iyang trabaho sa militar niadtong 2008, ug ang mga problema sa panglawas mipugos kang Alfreda nga moretiro paglabay sa pipila ka tuig. Ilang nakit-an ang Simbahan wala madugay human nanimuyo sa Alabama, USA, apan si Chris wala makakita og trabaho. “Sobra ra ang akong kwalipikasyon o kulang ang akong kwalipikasyon,” mihinumdom siya.
Nakakuha og trabaho si Alfreda sa usa ka tindahan og mga suplay sa opisina, apan mao lamang kadto ang ilang kinitaan. “Naglisud kami sa among problema sa panalapi,” miingon siya.
“Daghan kaayo kami og utang ug lapas na sa petsa nga mga bayranan, ug ang mga kolektor naningil na,” midugang si Chris. “Miabut kini sa punto nga misugod kami sa pagpamaligya og mga butang aron ikabayad sa mga bayranan. Naimbargo ang among sakyanan, ug gipapahawa kami sa among balay. Ngil-ad kaayo kadto.”
Human sila gipapahawa sa ilang panimalay, ang mga Rubio mibalhin sa usa ka apartment sa bag-o nga ward. Wala silay nailhan bisan kinsa, ug samtang misamot ang sitwasyon sa ilang panalapi, wala na pud kaayo sila manimba. Nahinumdom si Chris nga samtang mas nakatutok sila sa panalapi, nagkaminos ang ilang pagtutok sa hugot nga pagtuo.
“Sayon ra kaayo nga moingon, ‘Dili kita makaadto sa simbahan karon tungod kay kinahanglan kitang mangita og trabaho o tungod kay nagproblema kita sa atong mga bayranan o tungod kay wala kitay kwarta nga pang-gasolina,’” miingon siya.
Sa dihang nakig-istorya sila sa ilang bag-ong bishop mahitungod sa ilang pinansyal nga sitwasyon, misulti siya kanila mahitungod sa usa ka klase sa Personal nga Panalapi alang sa Pagbarug pinaagi sa Kaugalingong Pagpaningkamot nga hapit na magsugod sa ilang ward meetinghouse, nga nahimutang gawas lang sa Montgomery, Alabama.
“Nagdako kami sa dili adunahan nga mga pamilya,” miingon si Chris. “Kami wala kaayoy kwarta, mao nga wala gayud kami makat-on sa pagbadyet ug pagtigum. Ang among kita igo ra nga ikabayad sa among nag-unang panginahanglan. Kasagaran, ang kinitaan mahurot na paglabay sa pipila ka adlaw ug molatas kami og taas nga panahon nga walay kwarta. Mao nga naghunahuna kami, ‘Sige, mokuha ta ana nga klase. Kon makatabang kana kanato sa bisan unsang paagi, buhaton nato kana.’”
“Nakausab kini sa Among Panghunahuna”
Panahon sa ilang klase sa personal nga panalapi, ang mga Rubio ug tulo pa ka laing pamilya nakakat-on unsaon sa paghimo ug pagsunod sa badyet. Nakakat-on sila mahitungod sa utang ug unsaon sa pagbuntog niini. Nakakat-on sila unsaon sa pagpanalipod sa ilang mga pamilya gikan sa pinansyal nga kalisud. Ug nakakat-on sila mahitungod sa importanting tahas sa ikapulo diha sa pinansyal nga pagbarug pinaagi sa kaugalingong pagpaningkamot.
“Miusab kini sa tibuok proseso sa among panghunahuna,” miingon si Chris. “Nakakat-on kami unsaon sa pagsubay dili lang sa among kinitaan ug ginastuhan apan usab sa among tinigum, nga wala kami nianang panahona. Wala gyud ko magtuo nga makaangkon kami og tinigum, sa tinuod lang.”
Ganahan kaayo ang mga Rubio sa konseho nga matang sa klase, diin ang mga partisipante mopaambit og mga ideya, mga kalampusan, ug kapakyasan. Ang panaghigalaay nakapalig-on sa ilang pagtuo ug sa ilang mga paningkamot nga makabarug sa kaugalingon sa pinansyal nga paagi, ug ang facilitator sa klase nakahatag og trabaho kang Chris.
“Makatabang kon makahimamat ka og ubang tawo sa samang sitwasyon,” miingon si Chris. “Imong masayran nga wala ka mag-inusara ug nga kaming tanan naningkamot nga makabayad sa among mga panginahanglan ug makapalambo og mga kahanas aron makabarug pinaagi sa kaugalingong pagpaningkamot aron mahimo namong mas maayo ang sitwasyon alang sa among mga anak.”
“Usa ka Talagsaon nga Panaw”
Samtang misugod sila sa paggamit sa pinansyal nga mga baruganan nga ilang nakat-unan, milambo ang ilang pinansyal nga sitwasyon.
“Wala pa kami sa punto nga adunahan na kami o wala nay pinansyal nga mga kabalaka, apan mas sayon kaayo karon ang pag-atiman sa among mga calling ug pag-adto sa simbahan nga dili mabalaka mahitungod sa panalapi,” miingon si Chris. “Ang klase nakausab gayud kanamo sa espirituhanong paagi.”
Midugang si Alfreda: “Ang klase direkta nga konektado sa paagi nga nahimong mas lig-on ang among pagtuo. Misugod na kami nga mas kanunay nga mag-ampo ug magbasa sa mga kasulatan. Gibati namo nga ang pinansyal nga mga baruganan ug espirituhanong mga baruganan sa klase konektado.”
Gitandi ni Chris kadto nga mga baruganan sa usa ka parisan sa antipara nga nakatabang kaniya ug ni Alfreda nga makita ug magpabilin diha sa dalan padulong sa espirituhanon ug pinansyal nga pinaagi sa kaugalingong pagpaningkamot.
“Kon wala ang klase ug wala ang pagkat-on sa mga butang nga among nakat-unan, dili kami maabut sa among nahimutangan karon—sa pinansyal o espirituhanong paagi,” miingon siya. “Usa kadto ka talagsaon nga panaw. Nakat-unan namo nga wala ka magkinahanglan og daghang kwarta aron mahimong adunahan. Adunahan kami sa espirituhanong paagi.”