Savali a Taitai o le Eria
Salamo—E Maua ma e Avanoa mo Tagata Uma
Ao faatalanoaina se pagota e iloa ai lona alualu i luma i se nofoaga autu mo le faaleleiga e itiiti le malupuipui, na ou fesili atu ai ia te ia le fesili masani e uiga i fuafuaga mo lona toe foi atu i lona aiga ma lona nuu lea o loo faatalitali i le maea ai o le taimi umi o le falepuipuiina. O lana tali na faateia ai a’u ma faailoa mai ai fua o le salamo faamaoni ma le mauaina o le faamagaloga. Na ia fai mai: “Ua ou toe tepa i tua ma ou te faamalie atu mo mea na ou faia, na pau le mea ou te manao i ai o le toe faafoi mai o lo’u olaga tuai.”
E manatua e lenei tamalii le lagona sa i ai ao avea o ia ma se tagata lelei ma mama ma manao ia toe amata; ia faaauau pea lona olaga e avea ai ma se tagatanuu lelei ma faaaloalogia. O le i ai o le lagolagosua a uo ma aiga, e tele se avanoa o le a ia mafai ai.
O le salamo faamaoni e faataga ai i tatou e toe foi atu i se vaega i o tatou olaga lea tatou te manatuaina ai le taimi na tatou mama muamua ai, ma e mafai ona tatou amata i le toe faafouina! Na aoao mai Elder Lynn G. Robbins o le Fitugafulu faapea “A o tatou ootia ai ma le lotofaafetai mo avanoa faalua e sosoo ma mea sese, po o toilalo o le mafaufau, tatou te tutu ma ofo uma i le alofa tunoa o le Faaola i le tuuina mai ia i tatou o avanoa lona lua e faatoilalo ai le agasala, po o toilalo o le loto. . . . O le salamo e le o Sana fuafuaga faaleoleo lea pe a te’i ua tatou toilalo. O le salamo o Lana fuafuaga lea, ma le silafiaina o le a tatou toilalo lava” (Lynn G. Robbins, “Seia Fitugafulu ni Fitu”, O Le Liahona, Me 2018, 21).
Na fesili ma taliina e Peresitene Russell M. Nelson le fesili lenei i le sauniga Aoao a le Perisitua ia Aperila: “Pe manaomia ea e tagata uma ona salamo? O le tali o le ioe.”
Na faaauau ai pea Peresitene Nelson, “Ua toatele naua tagata e mafaufau i le salamo o se faasalaga—o se mea e ao ona aloese ai vagana ai tulaga sili ona matuiā. Ae o lenei lagona o le faasalaina e mafua mai ia Satani. E taumafai o ia e poloka i tatou mai le vaai atu ia Iesu Keriso, o lē tu mai ma aao mafola, ma le faamoemoe ma le naunautai e faamalolo, faamagalo, faamamā, faamalosia, ma faapaiaina i tatou.”
Na sii mai e Isaia mai le Alii: “Ua ou faaloaloa atu o’u lima i aso uma i le nuu finau vale” (Isaia 65:2); ma na toe ta’u atu e le Aposetolo o Paulo le mea lenei i le Au Paia: “Ua ou faaloaloa atu o’u lima i aso uma i le nuu faalogo gata ma le finau mai” (Roma 10:21). Na sii mai foi e Iakopo [upu a] Isaia, e tuuina mai ai lena lava faamalosiauga, e manatua e Alii Lona nuu o le feagaiga “ma faaloaloa mai ona aao ia te i latou i le aso atoa” (Iakopo 6:4).
Ua aoao mai perofeta o le meaalofa o le salamo e avanoa i le aso atoa ma po uma, o lona uiga, i taimi uma. Ua aoao mai Peresitene Nelson faapea “Pe o e malaga ma le filiga i luga o le ala o feagaiga, pe ua see ese pe laa ese mai le ala o feagaiga, pe ua lē mafai ona vaai atu i le ala mai le mea o e i ai i le taimi nei, ou te aioi atu ia te oe ia salamo. O le lagonaina o le mana faamalosiau o le salamo i aso taitasi—o le faia ma le avea ma se tagata lelei teisi atu i aso taitasi” (Russell M. Nelson, “E Mafai Ona Tatou Faia Ia Lelei Atu ma Ia Tatou Lelei Atu,” O Le Liahona, Me 2019, 67).
Na fofogaina e Elder Brian K. Taylor o le Fitugafulu le tatalo faaiu i le sauniga Aoao o le Perisitua talu ai. Na ia faailoa atu lo ‘tatou’ lagona o le agaga faafetai loloto mo le taulaga togiola a le Faaola mo i tatou taitoatasi “ina ia mafai ona tatou tamomoe atu ia te Ia ia salamo mai ai ia tatou agasala.”
Na ta’ua foi e Peresitene Nelson se peresitene o se siteki o le na aoao atu talu ai nei mea nei i se fonotaga mo taitai faalesiteki: “Afai tatou te malamalama moni lava i aoaoga faavae o le salamo, o le a tatou tamomoe ina ia salamo. E tatau ona tatou aoaoina a tatou talavou ia tamomoe e salamo, aua afai latou te tamomoe ese mai le salamo, ua lafoaiina i latou!”
O le salamo ma le faamagaloga o agasala e ala i le Togiola a Iesu Keriso e avanoa ma e faigofie ona maua e tagata uma.
E pei o le uii faamaumau oa, manatua o i tatou o fanau o se Tama o i le Lagi onosai ma alofa. E ala mai i Lona Alo, e aapa mai ai aao faaloaloa o le alofa mutimutivale ia i tatou i le aso atoa; naunau e faamagalo, faamalolo ma faasino le auala i luga o le ala e toe foi atu ai i lo tatou aiga Faalelagi.
E i ai sa’u molimau patino i le mana faamama ma faamautinoa o le Togiola a le Faaola i lo’u olaga e ala i le salamo i aso uma ma le faamaoni; i luga o lea mataupu i lea mataupu. E ala mai i Lana Togiola lē I’u, o loo faaauau pea ona valaaulia i tatou e le Faaola ia tatou mulimuli atu ia te Ia. Ou te iloa o le a oo mai le olioli ma le filemu folafolaina i tagata uma o e saili le salamo ma mulimuli i le Alii i luga o le ala o le feagaiga.