Itulau o le lotoifale
O le a se mea o loo Taumafai le Alii e Aoao Atu ia te Oe?
I lana malelega faaiu i le Konafesi Aoao ia Aperila 2019, na saunoa ai Peresitene Russell M. Nelson e uiga i failauga:
“E le’i atofaina ni autu i failauga. Sa tatalo i latou taitoatasi mo faaaliga faaletagata lava ia i le sauniaina o a latou savali. Ia te a’u, e ofoofogia le auala e matuā fesootai lelei ai na autu i le tasi ma le isi. Pe a outou suesueina [ia savali], saili atu e aoao mea o loo taumafai le Alii e aoao atu ia te oe e auala atu i Ana auauna.”
O le toatele o le au paia YSA i Samoa na faia lena lava mea; o nisi nei o a latou aafiaga.
Soonaalofa Ash—Moamoa, Samoa
I le faagasologa o le konafesi aoao ia Aperila 2019, o le saunoaga a Elder M. Russell Ballard na tu matilatila mai ia te a’u. Na ia ta’ua le upu “olioli” i le tele o taimi ma o taimi taitasi sa ou mafaufau ai i le faamanuiaina o a’u i le mauaina o le talalelei a Iesu Keriso i lo’u olaga. Na ia saunoa . . .
“Uso e ma tuafafine, fai le mea sili tou te mafaia i lea aso ma lea aso, ma i se taimi vave lava, o le a e iloa ai e silafia oe e lou Tama Faalelagi ma e alofa o Ia ia te oe. Ma pe a e iloa lena mea—iloa moni lava—o le a i ai se faamoemoega ma se uiga moni o lou olaga, ma o le a faatumuina oe i le olioli ma le filemu.”
Ina ua talanoa mai Elder Ballard e uiga i le mauaina o le faamoemoega ma le uiga ma le faatumuina i le filemu ma le olioli, sa ou mafaufau e uiga i la’u misiona i Ausetalia.
Sa ou fiafia i le auauna atu i se misiona! O le faasoaina atu o le upumoni e uiga i le talalelei toefuataina a Iesu Keriso mo le 18 masina o ni taimi sili ia ona fiafia o lo’u olaga. Ao o’u faalogo atu ia Elder Ballard o saunoa mai e uiga i le mama faigofie o le talalelei, sa ou lagonaina le molimau mai o le agaga i lena mea ia te a’u ma sa faatumulia i se manao e faaauau pea ona faasoa atu i isi.
E ui e le o toe avea a’u ma se faifeautalai faamisiona, ae ou te talitonu o lo’u faamoemoega lenei ma ou te iloa afai ou te faia le mea sili ou te mafaia o le a ou maua le olioli lea na saunoa ai Elder Ballard ma fesoasoani atu i isi ia mauaina foi. Ou te fuafua e auauna atu i se misiona ma la’u soa e faavavau i se aso.
Ou te alu i le malumalu i vaiaso uma e tatalo ai e uiga i le mauaina o se soa e faavavau. Ou te tatalo pe ou te ‘aoga pe saili se galuega; ou te tatalo e uiga i soo se mea i lo’u olaga. Na ou foi mai i le fale mai la’u misiona mo le tele o masina ma ou te lei lagonaina lava se taitaiga manino.
Sa ou matuai faafetai lava mo le saunoaga a Elder Bednar, ina ua ia saunoa mai:
“O le malumalu o le maota o le Alii. O mea uma i totonu o le malumalu e faasino atua i tatou i lo tatou Faaola, o Iesu Keriso.”
O se lagona o le filemu ma le saogalemu na oo mai i o’u luga ao o’u iloaina o le a lelei lava mea uma ia te a’u pe a faaauau pea ona ou saili le Alii i Lona maota. O mea uma o i le malumalu e faasino i le Faaola o le mea lea e le tatau ai ona ou popole pe a le oo vave mai ni tali aua ou te iloa afai e oo mai, o le a mai le Alii ma o le a sa’o.
Ou te fiafia i le malumalu, o la’u sini la mai le konafesi aoao o lo’u aumaia o le agaga o le malumalu i totonu o lo’u aiga. Na faamamafa mai e Elder Bednar le taua o le avea o le aiga ma punavai autu o le aoaoina o le talalelei. Ou te alu soo i le malumalu, peitai ou te le faasoaina atu ou aafiaga i lo’u aiga pe a ou sau i le fale. O la’u sini la o le faasoa atu i lo’u aiga o mea sa ou lagonaina ao i ai i le malumalu ina ia mafai ona tafe atu le agaga o le malumalu i totonu o lo matou fale.
Ellenlina Moala—Vaimea, Samoa
Ina ua saunoa mai le Perofeta o Russell M. Nelson o le a uma le taimi, na matuai taia malosi a’u e lena mea:
“Ia fai le galuega faaleagaga . . . ma faamolemole ia fai nei loa. O le a uma le taimi.”
E lei maua lava ni o’u faaeega paia pe faaipoipo i le malumalu. Na ou faauu mai le iunivesite i le 2013 ma taumafai mai lena lava taimi e alu i le malumalu ae foliga mai ua faigata atu i tausaga taitasi. O le faalogoina o na upu mai le perofeta ua avea ma se alaga ia ala i luga mo a’u. O le mauaina o se lagona fou o le naunautai, na ou faia ai ni taimi faatulagaina e vaai lo’u epikopo ma ia auai i vasega sauniuni mo le malumalu.
I le avea ai ma se loia, ou te vaai ai i le tele o faafitauli. Ou te feagai i lea aso ma lea aso ma filifiliga faigata lea e ogaoga le aafia ai o olaga o isi. I le faagasologa o lenei konafesi, na talanoaina soo le malumalu ma sa ou mafaufau ai ia te a’u lava ia, “masalo afai e mafai ona ou alu i le malumalu, o le a mafai ona ou faalogo i le siufofoga o le Tama Faalelagi ma o le a Ia fesoasoani mai ia te a’u i luitau o la’u galuega faapea foi ma lo’u tuputupu ae faaletagata lava ia ma faaleagaga.”
Ua ou iloaina sa ou faamuamuaina la’u galuega i lo le malumalu nai lo le avea o le malumalu o se vaega o la’u galuega. Ua leva ona ou iloaina e tatau ona ou faamuamuaina le malumalu i luga atu o a’u sailiga faalelalolagi peitai o le taimi o le konafesi na ou iloa ai afai ou te faia lena mea o le a le mafatia la’u galuega, o le a faamanuiaina ma itiiti le atuatuvale.
Ou te iloa o le a uma le taimi. Ou te manao ia faatino atili le faatuatua i le Alii o Iesu Keriso ma talitonu o le a faataunuuina Ana folafolaga pe afai ou te osia ma tausia feagaiga paia i totonu o Lona maota paia.