Ua Vivii A’e Leo ma Agaga o le Au Paia o Aso e Gata Ai i Amanave

Newsroom

Ua auauna atu tagata o le uarota a Amanave i tuaoi e ala i musika ma lauga.

I le ono tausaga talu ai, na faavaeina ai le Paranesi a Amanave o Le Ekalesia a Iesu Keriso o le Au Paia o Aso e Gata Ai i Amerika Samoa. O John Tuitele na avea ma uluai peresitene o le paranesi.

I le mavae ai o le fa tausaga o galuega faigata ma le tuputupu a’e, na lava le auai o le paranesi e avea ai o se uarota. O lena tautinoga i le faasalalauina o le afioga o le Atua i le latou eria ma tuaatu o loo malosi pea a o faaaogaina e tagata o lenei uarota o loo faatupulaia o latou taleni e faasoa atu ai le talalelei.

Talu ai nei, na fiafia tagata o le uarota a Amanave e auai i le faasalalauga i le televise o le Viiga O Siona.

O tagata o le uarota, laiti ma matutua, na o i pasi i Pago Pago e pu’e le polokalama i le nofoaga o le televise i le lotoifale. O i latou na auai na fiafia e faasoa atu lo latou faatuatua i le Atua ma Lona Alo o Iesu Keriso e ala i musika a aufaipese ma afioga tulei.

O Adney Reid, peresitene o le siteki a Pago Pago Samoa a le Ekalesia, na tau atu i tagata o le aufaipese ao lei faia le faasalalauga o loo avea i latou ma, ‘sui ia Iesu Keriso, lo tatou Faaola.”

Na fofogaina e Epikopo Lele Toa se savali mamana e uiga i le auauna atu faapei o Keriso. Na ia saunoa mai, o lena alofa ma le lagolago i le tasi ma le isi e suia ai olaga i auala matagofie.