Reirein te Mwakuri n Ibuobuoki

Ko Kabua Te Reirei ae Kakawaki Aei n te Mwakuri n Ibuobuoki?

Te Mwakuri n Ibuobuoki bon te “kimareirei ma akana kimareirei” n aron ae ko na “tang ma akana tang” (I-Rom 12:15).

Kamataata n te tamnei iroun Augusto Zambonato

Ngkana ti iangoa taekan te Mwakuri n Ibuobuoki, e bebete iangoan buokaia naake a kainnanoia. Ti taekina taekan karaoakin te mwakuri n ununiki ibukiia aika akea buuia, ni uota te amwarake nakon te aoraki, ke n anga te mwane ke te amwarake nakoia naake a kekeiaki. Ti uringa ana reirei Bauro n “tang ma akana tang,”ma ti kabanea ara tai iaon moan mwakoron te kibu anne—ni “kimareirei ma akana kimareirei”? (I-Rom 12:15). Kimwareirei ma naake ti buokiia—tao nanon anne ni bukamarua aia tokanikai ke ni buokiia ni kakaea te kimwareirei n taai aika kaangaanga—bon mwakoron te Mwakuri n Ibuobuoki ae kakawaki n aron are e na karaoia te Tia Kamaiu.

Aikai teniua iango aika kona n ibuobuoki (ao teuana ae ko na totokoia) ngkana ti kataia ni kabanea are iango iaon te bwai ae katikua te Atua inanon maiura.

1. Ko na Ataia

Bonnie H. Cordon, te Beretitenti ni Kabuta n te Bootaki n Ataeinnaine, e buokiira n ataia bwa ti kainnanoia n iangoia naake ti ibuobuoki nakoia—n taraa tiaki ti rawawataia ma aia kekeiaki ma aia tarena, ao nakoraoia naba. E taku bwa ti kainnanoia n riki bwa te “tiambion ao te onimaki—temanna ae e ataa aia kaangaanga ao e boutokaia n aia kaantaninga ao nanoia.”¹

N te taetae ni kaikonaki iaon te tiibu ao te kooti, e taku te Tia Kamaiu bwa naake a kuneaki ni baina te Angatai ana titiraki: “Te Uea, ti noriko n ningai ngke Ko baki, ao ti kamarakeko? ao ngke Ko kanimoi, ao ti kamoiko?

“Ningai ngke Ko iruwa, ao ti akoiko?” (Mataio 25:37–38).

“Tariu ao mwaneu, te iango ae kakawaki bon noriko,” e taku Titita Cordon. “Ake a etieti a noriia koraki ake a kainnano ibukina bwa a tarataraiia ao ataiia. Ti kona naba n taratara raoi ni buokiia ao ni kabebete, ni bukamaru ao n noori konabwai irouia tabeman.”²

2. Kakaai Bukin te Bukamaru

Bukamarui tokanikai aika a bubura ke a uarereke. E kona ni karekeaki rinanon te kaentia ke ni karekea rinanon te tokanikai man uruakin te tangira, kakaean te mwakuri ae boou ke kakaean te kau ae bua, reitinako ni maiu inanon te namwakaina imwiin buan temanna ae tangiraki ke ni maiu n teuana te wiiki n akea te tioka.

Tareboon ni kakaitau, nikira te kaati, ke otinako ibukin te katawanou. Man tibwauakin ara kakabwaia ni bootaki, te maeka ma te kakaitau, ao bukamaruan kakabwaia ao aia tokanikai tabeman, bwa “ti aonga ni karekea te kimwareirei ni kimwareireia tarira” (Aramwa 30:34).

3. Taraa Bain te Uea

N tabetai ao e nanonaki te kimwareirei ma tabeman bwa buokaia n atai bukina bwa ko na kimwareirei—n aki tabe bwa tera kaangaanga ke kakukurei aika roko ni maiura. Te koaua ae bebete bwa Tamara are i Karawa e ataira ao n tauraoi n tabekira rake e kona n riki bwa te bwai ae karika te kimwareirei ae korakora.

Ko kona ni buokiia tabeman ni kinaa bain te Uea ni maiuia man tibwauakin are ko a tia n noria imatam. Bwaina te tauraoi n tibwauaia bwa e kanga Tamara are i Karawa n tia ni buokiko rinanon am kakaewenako. Te koaua aei e kona ni buokiia tabeman ni kinaa ao ni butimwaeia bwa E kanga n tia ni buokiia (taraa Motiaea 24:14).

4. Tai Tiana Am Konabwai Nakon te Kimwareirei

Ma, ti kona n tabetai n tiana oin ara konabwai nakon te kimwareirei ma tabeman, riki ngkana ti namakina te aki mano raoi n te bwai are ti na anga ke tera ara kaangaanga ni maiura. Irarikin are kakaean te kimwareirei ni kukureia tabeman, ti karaoa te kairua ae aki kantaningaaki n te kabotau. Ao e reirei Unimwaane Quentin L. Cook man te Kooram n Abotoro n te Tengaun ma Uoman: “Kabotauan kakabwaia e koaua raoi bwa e na kabua te kimwareirei. Ti aki kona ni kakaitau ao ni kairiribai n te tai ae ti teuana.”³

“Ti na kanga n tokanikai iaon te aeka n nano anne ae e reke irouia aomata ni kabane?” e titiraki Unimwaane Jeffrey R. Holland man te Kooram n Abotoro n te Tengaun ma Uoman. “… Ti kona ni wareki ara kakabwaia aika mwaiti ao ti kona ni kaitaua aia tokanikai tabeman. Te kabanea n tamaroa, ti kona ni buokiia tabeman, te kabanea n nakoraoi ni mwakuri ibukin buokara ni karikirakea te tangira ibukiia tabeman.”⁴ Irarikin te kabotau, ti kona ni kamoamoaia naake ti a tia ni buokiia. Tauraoi n tibwaua te bwai ae ko kukurei iai ibukiia ke kaain aia utu.

Ngkai e kauringiira Bauro, ngaira ni kabane bon kaain ana rabwata Kristo, ao ngkana “e karineaki bain te rabwata teuana, ao a bane naba ni kimareirei bain te rabwata ma ngaia” (1 I-Korinto 12:26). Ma ana ibuobuoki Tamara are i Karawa, ti kona n atai aia taneiai tabeman, bukamarui tokanikai aika bubura ke a uarereke, buokiia ni kinaa bain te Uea, ao n tokanikai iaon te bakantang bwa ti aonga ni kona ni uaia ni kimwareirei n taian kakabwaia, tarena, ao kukureia tabeman.

Bwaai aika a na taraaki

1. Bonnie H. Cordon, “Becoming a Shepherd,” Riaona, Nob. 2018, 75.

2. Bonnie H. Cordon, “Becoming a Shepherd,” 75.

3. Quentin L. Cook, “Rejoice!” Ensign, Nob. 1996, 30.

4. Jeffrey R. Holland, “The Other Prodigal,” Riaona, Meei 2002, 64.

Ana Katooto te Tia Kamaiu

Iesu Kristo e aki toki ni kimwareirei ni kukureia tabeman. E kaea te mare i Cana, ike E aki ti bukamarua te tai ae kakukurei ma e raira te ran nakon te wain (taraa Ioane 2:1–11). Ti kona naba ni kekeiaki ni kaea te tai ae onoti ni maiuia naake ti ibuobuoki nakoia.

Ti nora naba te Tia Kamaiu ni kimwareirei iaon raoiroia tabeman. Ngke E kawariia Nibwaite, E taku nakoia, “Kam na kakabwaiaaki ibukin ami onimaki. Ao ngkanne nooria, bwa e a bwanin kimwareireiu” (3 Nibwaai 17:20).

Te Kakao ni Mwakuri

Iangoia naake ko karaoa te ibuobuoki nakoia. Tera taian tarena ao korakora aika iai irouia? Tera taai ke tokanikaia aika a tia ni karekei? Ko na kanga ni kimwareirei ma ngaia, kukurei ma ngaia, ke ni kaungaia?

Tibwaua Am Taneiai

Kanakoa nakoira ae ko karaoia ngkai ko buokiia tabeman ke ngkai ko a tia n ibuobuoki nakoia. Nakon te liahona.ChurchofJesusChrist.org ao kotea “Submit an Article or Feedback.”