Bwanaaia Aika Itiaki ni Boong aika Kaitira
Uoua te Iteraniba E Onrake n te Kakaitau
Elise Dahlen
Utah, USA
Kamataata n te tamnei iroun Allen Garns
Tamau e rotaki maiuna ni kabane man onimakinana bon irouna ao namakinan ae akea uaana. E ikawai rake iroun te tama ae kinimanging ae aki toki n tuangnga ae akea bongnana. Ma te kakaitau, bwa tamau e aki riki bwa te tia manging, ma e aki kona n tuangai ao tariu ma mwaneu bwa e rangin ni kamoamoa ibukira ke ni kamoamoaira ibukin bwaai aika ti a tia ni karaoi. Ngke I a ikawai, I kataia ni kakukureia, ma I aki toki n namakinna bwa I aki kona n aki kakukureia. Te bwai ae e karika te aki nakoraoi n ara reitaki.
Teuana te ririki, I taekina aei nakon au bitiobi ae wanawana. E tuangai bwa n na korea au reta nakon tamau n tuangnga bukin bwaai ni kabane ae I kakaitau ibukina. E na kaangaanga aio ibukiu. Iai au namakin aika buakaka ibukina, ao i aki tangira au reta ni kakaitau bwa e na riki bwa te bwai ni kairiribai. Ngaia are I a tataro. Ma ana kairiiri te Tamnei, bukin are I kakaitau iai ibukin tamau a moanna n roko raoi. E ana te tai, ma ngke I tia, I a tia ni kaoni uoua te iteraniba.
I anga au reta, n aki ataia bwa e na kanga aron ana kaeka. Ma I ataia bwa I aki rinea ana kaeka. I ti kainnanoia bwa n na ti taraa nanou ao n uringnga bukina ngkai I korea te reta.
N te ingabong are imwiina, I karekea au tarebon mairoun ai tinau. E tang. E tuangai bwa e a tia tamau ni wareka te reta n te tai ae mwaiti. E taekinna nakoiu bwa e aki kona n taetae bukina bwa e a rangin n tang.
“Ko rabwa!” e taku. “Tamam e kainnanoa aei.”
Imwiina n te bong anne, e tarebon tamau ni kaitauai. E tareboniai ni katoabong inanon boong aika mwaiti ni kaota aron kakawakin te reta nakoina.
Au kaantaninga bwa n na kona n taekinna bwa ara reitaki e a nakoraoi n ae kamimi, ma ti teimatoa n iai ara mwakuri aika ti na karaoi. Inanon te tai, nanokawakiu e moanna n nakoraoi, ao ara reitaki e a nakoraoi. N tokina, I a kona ni kabwara ana bure.
Tabeua te ririki imwiina, imwiin te kaangaanga ae korakora ma te aoraki ae te kaentia, e mate au karo. N au koaua e a rinanon ngkai te kimwareirei ae korakora ngkai e buokia te Tia Kamaiu ni kamaiuia inanon ana ririki ni bwainikirinaki. I ataia bwa I a tia n rinanon te kamaiuaki man mwaakan Iesu Kristo ni Kamaiu. Te Tia Kamaiu e atai kainnanora ao e kona ni buokiira ni kanakoi namakin aika buakaka nte maraki ao kairiribai man tamneira. I ata te kakaitau, te kabwarabure, ao te tangira bwa bwaai ni katoki aoraki aika mwaaka.