Te Kabanea n Taeka
Bouan te Maninganinga Ae Moan te Kakannato n Ara Onimaki
Man te marooro n te maungatabu ni kabuta n Okitobwa 1984.
Inanon tembora aika boou iai ara nebonebo ni bouan te maninganinga te katei are e kakaraoaki n taai ake ngkoa. Imwain ae tabangaki aron kabonganakin te timanti, aan oon te kateitei a kaweneaki ma atiibu aika bubura. Mwanono ana kenaki, ao ana kanoaaki n atiibu bwa aana. Moanakina mai imoana, aan te oo e na kateaki n teuana te kawai nakon bouan te maninganinga; ao te koona e na rairaki ao te oo e biri nakon te koona are imwiina, n te tabo are e katukaki iai te atibu, man te tabo are e na biri iai te oo nakon te koona are imwiina, ao mai ikanne nakon te tabo are e moanaki iai mai imoana. … Te kabanea n atibu e taekinaki bwa bouan te maninganinga ae moan te kakannato, ao te tabo are e katukaki iai e riki bwa bukin te bobotaki ae e korakora. Ma bouan te maninganinga aei ae e a tei ni n nena, e a tauraoi ni kateaki iai aan te tembora. Ma ngaia are aio te kabotau are kabongana Bauro ni kabwarabwaraa te Ekaretia ae e koaua:
“Ma ngaia ae tiaki aomata ianena ngkami ngkai, ao tiaki naba aomata aika kam maeka ni iruwa, ma kam buokan-aba ma ake a itiaki, ao ana utu naba te Atua ngkami;
“Ao kam kateaki i aon taian boua ake taan tuatua ma burabeti, ao Iesu Kristo bwa aan te atibu are bouan te maninganinga are moan te kakannato;
“Are e bane ni kaboraoaki te kateitei i Rouna, ao e riki rake ba te maneaba ae tabu i nanon te Uea” (I-Ebeto 2:19–21).
Iai ara boua ni maninganinga ae botora ae ngaia are e a tia ni kateaki iai te Ekaretia ae tamaroa aei ni boong aika kaitira iroun te Uea ao a bane ni, “kaboraoaki kateitei i Rouna.” A rangi ni kakawaki nakon te mwakuri aei, bon te aa ni koaua, te boutoka n te tabo are e tei iai te Ekaretia. … [Ma] I taekina bouan te maninganinga ae moan te kakannato, are ti kinaa ao ni karinea bwa te Uea Ieso Kristo. …
Ngaia bon ana maninganinga te Ekaretia ae kakawaki are E kaota Arana, Ana Ekaretia Iesu Kristo ibukiia Aika Itiaki ni Boong aika Kaitira. Bon akea te ara teuana i aani karawa ae a anganaki aomata, ae ti konaki ni kamaiuaki iai (taraa Mwakuri 4:12). E riki bwa te tia Karika te maiu are aki toki, te tia anga te maiu are akea tokina (taraa Ebera 5:9). Akea ae ti tebo ma Ngaia. Bon akea mai imwaaina. A na bon akea. Te kakaitau nakon te Atua ibukin ana bwaintangira Natina, are e anga Maiuna bwa ti aonga ni maiu ao are ngaia boton, bouan te maninganinga n ara onimaki ao Ana Ekaretia ae aki kona ni kamwaingaki.