Te Waaki Nako imwiin Ataakin Au Kabae ae Kabonganai Tamnei Aika Tangako

Te Ara e tauaki

Au kabae n tokin te tai e kaotia ae iai ana kaangaanga ma tamnei aika tangako. I kona naba ni mare ma ngaia?

E maeka te tia korokaraki i French Polynesia.

I kaitibo ma kainnabau ngke ti kaai n riki bwa kauntira n RIK. I rangi ni kakatonga ibukin ana koaua ae korakora ao arona n reirei ao n reitaki ma te roronrikirake.

Ngke ti moan kakaitibo, ti namakinna bwa te Uea iai te bwai ae kakawaki ae e kantaningaia man ara reitaki. Ngke e reitinako reitakira, n te aro anne, e a moanna riki ni kairoro n arona ni kaota ana tangira. I a moanna ni kanamakinna ae iai ana kaangaanga ma tamnei aika tangako, ma ngke ti mwaroroakinna, e karaba ae iai ana kaangaanga iai.

Ti a waaki ni katekei bwaai ni kauring iaon tuua ake a na kataniira. Ngke e a kabutiman, I butimwaia ao a nakoraoi riki bwaai—ni karokoa te bong teuana, teuana riki te tai, e waaki ni kairoro ni kaotia bwa e tangirai n te aro are I aki mweengaraoi iai.

I teimatoa n iai au kanamakin iaon tamnei aika tangako ake e kabonganai, ngaia are I karakina nakoina taekan toau are e a tia ni ikakorakora ma tamnei aika tangako imwain ana mition. I karaoa au kabanea n tamaroa bwa e na ota iai, n tangira, n aki motikitaeka ibukina bwa bon te aomata ae raoiroi ni koaua. Imwiina I manga titirakinna riki ngkana e reke n te anua ae kareke n tamnei aika tangako, ao n tokin te tai e tuangai ae e reke irouna.

Maraki ao Kamaoaki

N te moan tai, e kaangaanga irou bwa N na kataetaea ao n tarai matana. Au namakin I a kuri aki kona n taonna ibukina bwa I namakinna bwa te Uea e a tia n tuangai bwa te mwaane aei are e na kona n riki bwa raou n aki toki. Ma e ngae ngke I maraki, I ataia bwa I riai ni waaki nako ni kabwara ana bure, ao I namakinna bwa N na aki taenikai n ara reitaki.

I tataro mwaaka ao ni kamatebwai marooro iaon kabwarabure ao kabonganaan tamnei aika tangako. I wareki rongorongo ao kakoaua irouia aomata aika a tia n iein ake buuia a tia ni ikakorakora ma te kaangaanga aei. Ngke I wareware, I namakina ana tangiara te Tia Kamaiu ibukiu ao au kabae, ao I karekea te kamatoa teuana riki bwa te mwaane aei bon raou n aki toki ni koaua. I reiakinna naba te iango teuana n ana Mwakuri ni Kamaiu te Tia Kamaiu—n arona ni kona ni kamarurunga te tamnei ae rairananona (iroun au kabae) ao te nano ae kainnano (ngai).

Te koaua ae kakawaki ni mwanangara bon te marooro ma ana bitiobi au kabae. Ana kairiiri e buokiira ni kamarurungiira ao ni karikirakei arora ni kan riki bwa taanga. E rangi n tataonakinano ngke e marooro kainnabau, ao ana banna ni katooto n aron Kristo, e kaunga nanou ao e buokai ni kabwarabure ao ni mwakuri rinanon te kaangaanga aei ma au kabae.

Inanon te tai ae maan, e rangi ni matoatoa iroun au kabae bwa e na noorai n rootaki ibukin ana rinerine n te aro are e kuri n aki tangiria ni mare ma ngai! Ma imwiin ikotakira ni mwakuri inanon namwakaina ibukina bwa e na itiaki, n tokina e namakinna bwa te Uea ao ngai ti a tia n nanoraoi ni kabwarai ana bure.

N tokina, ti a mareaki, ao ara reitaki n te tai aei e korakora riki nakon are mai imwaina. Te taneiai aei e a tia ni buokai n aki mama ni kaai ni maroro imarenara iaon ara kaangaanga. Ao e ngae ngke e aki manga rekereke ma tamnei aika tangako, ti teimatoa ni kai nonoori ao n tabeakiniira i bon imarenara.

Am Reitaki E Kona n Mwakuri

Ngkana am reitaki e kaboitinaki imwiin tamnei aika tangako, ataia bwa e kona ni kabwaraki burena. Kam kona n reitinako n tangiri ngkami imarenami ao ni uaia ni mwakuri ni karekea katokana ao n tokanikai iai. Ti bane ni katauaki nakon ana Mwakuri ni Kamaiu te Tia Kamaiu. Ti na butimwaia bwa ti na maraki bwa tii man ana ibuobuoki te Tia Kamaiu are ti na kona ni kamarurungaki n ae bwanin.

Aia rongorongo aomata nako a bon onoti, ao reitaki ni kabane a bon onoti. Irouia tabeman aomata, katokan te reitaki bon te bwai ae eti karaoana. Ma au kantaninga bwa ara rongorongo e kona n ibuobuoki nakoia tabeman ake titebo aroia are a rinanona. Ibukina bwa I karekea te kamatoa anne mairoun te Tamnei ae Raoiroi, ao n ana ibuobuoki te Tia Kamaiu n Ana Mwakuri ni Kamaiu, I a kona ni kabwara ana bure au kabae ao n reitanako ara reitaki. I ataia bwa bon te rinerine ae eti ibukiu.

Ngkana ko kaitara ma taneiai aekakin aei, tataro mwaaka n iangoa arom n te tai aei ao tera arom n tai aika a na roko. Ngkana ko karekea te kamatoa mairoun te Tamnei bwa reitinakon am reitaki bon te bwai ae eti bwa kona karaoia ao kona namakina te mweengaraoi, ataia bwa man ami kekeiaki ni kauoman ao ni katan iroun Tamara are i Karawa, ami reitaki e kona ni mwakuri.

Kainnabau bon te mwaane ae rangi n tamaroa, ao I tangiria riki nakon are mai imwaina! E aki tau au kakaitau nakon te Uea ibukin ana ibuobuoki ni kamarurungai ao ni karekea nakoira bwa ti na kona ni mare. Te Uea e a tia ni buokiira bwa ti na uaia n rikirake bwa tanga aika tatauraoi ni kaitara ma ana baire ake e bairei ibukin maiura n ikotaki.