Banna ni katoto n te Ninikoria
Beku ibukin te Uea n te Taetae n Tibein
E maeka te tia korokaraki i Utah, USA.
Iangoia bwa raraom e anganiko te boki ae te kabanea n tamaroa are teuanne ke neienne e a tia ni warekia. Ko kauka te moan iteraniba … ao ni kunea bwa ko aki kona ni wareka te boki. E koreaki n te taetae teuana! Tera ae ko kona ni karaoia?
N taai ake rimoa n te Ekaretia, Ana Boki Moomon e boretiaki tii n te Taetae n Imatang. Beretitenti Brigham Young e weteia mitinare aika uoman bwa a na tataekina te euangkerio i Mexico ao a raira Ana Boki Moomon nakon te taetae n Tibein. Ma a kainnanoa riki te ibuobuoki ni karaoana. Ma a aki ataia bwa n rinuukan te marawa, te Atua e a tia ni katauraoa te aomata are e kona n anganiia raoi te bwai ae a kainnanoia.
Meliton Gonzalez Trejo e roko man te utu ae maiuraoi mai Tibein. E kamatebwai mwaaka n te reirei ao e riki bwa te aobitia n ana taanga ni buaka Tibein. E nano n tainako n taekan te aro, ma akea te bwai ae e kunea ae kaanga eti. N te bong teuana e ongo iroun te aobitia temanna ni maroroakina te kurubu ae a araniia bwa “aomata aika Itiaki.” Bon kain ana Ekaretia Iesu Kristo ibukiia Aika Itiaki ni Boong aika Kaitira, ao ana burabeti te Atua ae e kairiia nakon te Rocky Mountains n te United States. E namakinna Meliton bwa e korakora nanona ni kan kaitibo ma ngaiia. E ira mwanangaia kain te taanga ni buaka nako Biribin, ma te kantaninga bwa aio e na buokia ni karokoa n te United States rimwi. Ma Meliton e rikirake n rangi n tabetabe n ana mwakuri n te aro are kawarakiia aomata aika Itiaki e aki rangi ni kakaawaki.
Imwiin Meliton e a rangi n aoraki. E uringnga bukin rokona i Biribin ao e tataro nakon te Atua bwa e na ata te bwai ae e riai ni karaoia. Te tairiki anne, Meliton e mii n te mii ae onoti. E ataia bwa e riai n nakon te Rocky Mountains.
N te tai are e marurung iai man aorakina, e reitanako mwanangana nakon te United States. E roko i California n Turai 4, 1874, ao e nako n te Kaawa ae Salt Lake.
Ngke e roko i Salt Lake Meliton, e reke n te kaanganga: e kona ni wareka te Tatae n Imatanga ma e tuai kona n taekinna. E aki kona n reitaki ma aomata nako! Ma e baireia bwa ngkana e aki kona n taetae nakoia aomata, e kona n anai nanoia n te kawai teuana. Meliton e karina ana kaboraoi n te taang ni buaka mai Tibein ao e mwaati inanon te kawai n te kaawa. N aron are e kantaningaia, a mwaiti aomata ake a nooria! N tokina e kuneaki iroun temanna kain te Ekaretia ae arana te Tari Blanchard, te burobeetia n te iuniwetirii ae taetae n Tibein. Te Tari Blanchard e buoka Meliton ni maeka i Salt Lake ao e reireinna te euangkerio. N te tai ae waekoa e a bwabetitoaki Meliton.
Te Tari Blanchard e kaota Meliton nakon Beretitenti Brigham Young. Meliton e tuanga Beretitenti Young bwa iaon bwaai ni kabane, e tangiria n raira Ana Boki Moomon n te taetae n Tibein.
Beretitenti Young e tuanga Meliton bwa e na buokiia mitinare ake a na nako Mexico bwa a na raira mwakoron ana Boki Moomon nakon te taetae n Tibein. Meliton e kabanei wiiki aika a mwaiti n raira te Taetae n Imatang nakon te taetae n Tibein. Ni katoa tairiki e rinanon ana rairairi ma mitinare. Iai ongoia teutana n taetae n Tibein ma a namakinna bwa te rairairi ae kakaawaki aei e kainnanoa ae bon oin ana taetae ae bon te I Tibein. A ataia bwa Meliton bon kaekaan aia tataro. Inanon 1875 te rairairi e boretiaki. E aranaki bwa Trozos Selectos del Libro de Mormon (Rongorongo aika rineaki man Ana Boki Moomon).
Mitinare n te tai aei a tauraoi n nako Mexico. A uotii 1,500 katoto n rairan koroboki aika a tabu aika a tia n rairaki iaon nuukan te aoti ao a waakina mwanangaia. N te moan tai, naake a taetae n Tibein a kona ni wareka Ana Boki Moomon n oin aia taetae! E ngae ngke Meliton e a tia ni maeka n raroa mai Tibein, Tamara are i Karawa e kairia nakon te tabo raoi are e riai ni mena iai. Ibukin ninikorian Meliton ao ana onimaki, e buoka uotakin ana taeka te Atua nakoia aomata aika a mwaiti.