A Unika Te Ati Inanou

Marta Algarve

Santa Catarina, Brazil

heart-shaped wreath of leaves with seed in middle

I nako mai ia? Tera ae I karaoia ikai? N na nakea imwiin te maiu aei?

Ngke ai 29 au ririki, taian titiraki aikai a bon okioki naba nakoiu. A tia ni mate au karo. I tang n nanoanga ibukin buan au moan nati te mwaane ae uarereke. Iai riki teniman ataei aika N na kaikawakiia ao te maiu ae kaonaki n taian kaangaanga.

E moana kaekaan au titiraki te Uea ngke E kairia uoman mitinare nakon mweengau. Ngke I butimwaia ni kariniia, a titiraki ngkana iai te bwai ae I namakinna ae bua ni maiu. I tuangia aroia au karo ao natiu te mwaane. I tuangiia ae I taku bwa e aki raoiroi bwa a na iai natiu ao ni katea au utu ngkana bwaai ni kabane tii te toki bwa te mate. I titirakiniia ngkana N na kona ni manga nooria au karo ao natiu te mwaane.

“Marta,” a taku, “e kona n reke am utu ae akea tokina.”

E kaonaki nanou n te kukurei. I kan ataia riki. N rokoia are imwiina, a reireinai riki taekan ana euangkerio Iesu Kristo. A anganai Ana Boki Moomon ao a kaungaai ni warekia ao ni butia te Atua ngkana bon Ana taeka. I butimwaea aia kakao. Ngke I tataro, e roko Ana kaeka te Atua ae oota n aekakin ootan taai. I ataia inanou bwa e koaua.

I tekebuaka, ngke I karekea au mwakuri ae boou, e bua au reitaki ma mitinare. N namwakaina ake imwiina, au mare e a toki n korakorana ao I a manga kataa te maiu ae boou ma natiu.

N tokin te tai, I a manga iein riki. N te bong teuana ao kainabau e taku bwa e a tia ni kabuaa te Atua inanon maiuna. Ti a motikia bwa ti na kaaina te aro are e a tia ni kaainna ngkoa. Ngke ti rin te kateitei, I noora Ana Boki Moomon iaon te taibora n te ruu ae bubura. Aio te ekaretia are e taekinaki nakoiu mai mwaina! I tangira te Tamnei are I namakinna ikekei. Ngke ti a nako, I titirakina kainabau bwa N na kanga ni bwabetitoaki.

“Ko na riai n reireinaki irouia mitinare,” e taku.

“I reireinaki nimaua te ririki n nako!” I kaeka.

Natiu ao Ngai ti reireinaki taian reirei. Ara bong ni bwabetito bon te kabanea ni kakukurei ni maiura.

Tabeua ririki imwiina, I namakinna bwa N na tuangiia titita ake a moan reireinai are I a kaaina iai te Ekaretia. N te Beitiboki, I kuneia koraki ni mitinare aika a oki mai Brazil Santa Maria Mition. Bon raoia temanna mai buakoia titita are e reireinai. I kanakoa nakoina te bubuti ni kan iraorao ao n tuanga neiei bwa antai Ngai, I kanga n riki bwa kaain te Ekaretia, ao ara utu a tia ni kabaeaki n te tembora, ao natiu te mwane e a mwakuri bwa te mitinare ae bwanin ana tai. I tuanga neiei bwa a bane n riki bwaai aikai ibukina bwa ngaia ma toana a tia ni unika atin te euangkerio ae e a tia ni kaokaki inanou.