Tera ana taratara te Ekaretia iaon te otabwanin?

Te taeka ae kakaawaki n ataakin ara taratara iaon ara otabwanin bon te mwiokoaki. E aki nanonaki bwa aomata a bwaibwai n te aonaaba ao a kona ni kabarekareka n aron are a tangiria ma a bon bukintaeka ibukin arora ni kabongana kaubwaina (taraa Reirei ao Berita aika Tabu 104:13–15). E ngae ngke e “tau mwaitina ao e nikirana” (Reirei ao Berita aika Tabu 104:17), te Atua e tangiriira bwa ti na kabonganai kaubwain te aonaaba ma te iango raoi (taraa Reirei ao Berita aika Tabu 59:20).

Te Atua e karika te aonaaba ao e taekina ana karikibwai bwa “moan te raoiroi” (taraa Karikanbai 1:1, 31). Te aonaaba aei e karikaki bwa e na kamwengaraoia natin te Atua bwa mwakoron Ana baire ni kamaiu. Te aonaaba e riai ni katabuaki man buakaka ni kabane, bwa e aonga ni katauraoaki ibukin mimitongin te tiretio (taraa Reirei ao Berita aika Tabu 88:18–19).

Te Atua e karaoa te aonaaba n ae e na aki tii boongana ma e na tamaroa naba. Bwaai iaon te aba “a karaoaki ibukin kabwaiaia aomata ao buokaia, bwa e na kakukureia te nano ao te mata,” ai aron naba e na “kamarurunga te tamnei” (Reirei ao Berita aika Tabu 59:18–19).

Ti riai ni karinea te Atua ni kakaitaua ibukin Ana karikibwai, ni kaota ara kakaitau ibukiia, ao ni kateimatoa tamaroaia. Ti riai ni kawakin kaubwaira, katana maiun abara, ao n totokoa te kabarekareka ao te kamangeange.