Te Aki Maaku n Tibwa te Koaua
N otanganaki n te koaua n te euangkerio ao ana kakabwaia, Fabian e aki kariaia rorona ni kairake bwa e na tuukia man karekean korakorana, n aki mamaku bwa te mitinare ae te membwa.
E bung taai iaon Las Tomas, te kaawa are e tei iaon te karaabe ae aobikebike ni kaitara ma Antofagasta. I nano, taura a tabe n ota ngkai e a bung taai irarikin taari n te kawa aei i meangin Chile.
Bon tairikin te Kaonobong, ao Fabian H. ae 13 ana ririki e tabe n ririaki ma raraona. Ma Fabian, kain te Ekaretia ae boou, e rineia bwa e na kabanea te tairiki anne ma mitinare aika a bwanin aia tai. Aio te tai “ni buoka ikotakiia tibun Iteraera.”1
Mai irouia ni kabane membwa aika mitinare ake e a tia ni mwakuri ma ngaiia Kellen VanNatter ao Jordan Shelton n ana mition ae bwanin taina i Chile, Fabian e raka taraana iaoia ni kabane.
“Ngkana akea tabena, e otinako n raoniira ni karaoa te mwakuri ni mitinare,” e taekinna Kellen. “Ngkana e bane te motirawa n te tiamwa, e nanokawaki tiaki tii ibukina bwa e na okira te reirei ma ibukina naba bwa e aki tau ana tai n airi ma ngaira.”
Jordan, are e kabanea tabeua namwakaina n riki bwa toan Kellen, e reitia, “Fabian e nanako ma ngaira tao aua ke nimaua te tai n te wiiki—ni katoa wiiki—ngke ti uaia n ikotaki ni beku i Antofagasta. Bon ngaia te kabanea n tamaroa ni mitinare ae te membwa ae ti a tia ni mwakuri ma ngaia.”
Tera ae e karika te kairake n ataeinimwaane ni karaoa te mwakuri ni mitinare n aki tabe ma kabuakaka mairouia raona n reirei ao katinanikuana irouia aomata aika a aki kina? Iroun Fabian, te kaeka e wene n taian kakabwaia ake e a tia ni karekei ma ana utu man moan butimwaean te euangkerio—kakabwaia ake e kan tibwaia ma tabeman.
“Te Kimwareirei ae aki kona ni kabwarabwaraaki”
Fabian e moana ana reirei ma mitinare bon imwiin rokoia mitinare aika bwanin aia tai ni karebwerebwe n ana mataroa. E teimatoa n uringa ana moan bootaki n toa.
“Akea ae I kina ngke I moan rinnako n te umwantabu, ngaia are e nako nanou teutana,” e taku. “Ma I namakina te bwai teuana ae rangi n tamaroa. I namakinna ae I a tia n tataromauri inanon namwakaina ke ririki.”
Ni bwabetitoana tabeua te wiiki imwiina, “I namakina te kimwareirei ae aki kona ni kabwarabwaraaki ngke I kateboaki ao ni manga waerake man te ran. I namakinna bwa kaanga te aomata ae boou, n ataia bwa N na iriira Iesu Kristo ao ni karaoa au kabanea n tamaroa ni kawakin ana tua.”
Ngkai a tuai ni mareaki ana karo Fabian, Leonardo ao Angela, a raona natiia n aia tai n angareirei mitinare, a reiakina taekan te mare n te tembora ao te utu ae akea tokina. “Teuana te wiiki imwiina, tamau e katea te bong ni mare,” e taku Fabian. “Tinau e rangi ni kukurei.”
Aua te namwakaina imwiin kainakin te Ekaretia iroun Fabian, Angela e manga bwabetitoaki imwiina. “Anne bon te kakabwaia ae moan te tamaroa,” e taku.
Kakabwaia ake tabeua a waekoa n roko imwiina. Leonardo, are e a tia ni bwabetitoaki ngke te kairake, e a oki nakon ana waaki ni kakukurei te Ekaretia. E a teimatoa kamatebwaian te euangkerio ni mweengaia. Kain te utu a moanna riki n reitaki. Leonardo e karekea te mwakuri ae matoa. Ao Fabian e karekea te Nakoanibonga ae te Aaron.
“I tangira te nakoanibonga bwa I aonga ni kona n tibwa te toa nakoia kain te uoote ao ni buokiia ni manga kabooua aia berita,” e taku Fabian. “I rangi ni kukurei riki ngkana I roko irarikiia au utu ao mitinare ake a reireinai. Taraakin moan au karo ni kakatonga ngke e noorai ni bwaatina te toa e karekea te kukurei irou.”
“Anne e na Rangi n Tamaroa”
Fabian e waakina karaoan te mwakuri ni mitinare imwain ae e bwabetitoaki.
“I tuangiia teniman raraou ae N nang bwabetitoaki. Uoman mai irouia a roko,” e taku. “I tangiria n tibwa te euangkerio bwa aonga raraou n ota n te bwai ae ti kakoaua ao ae ti karaoia n te ekaretia bwa aonga ni kona n reiakina te euangkerio, ni bwabetitoaki, ao ni maiuakina ae kakukurei riki. N na rangi ni kukurei riki ngkana temanna mairouia e bwabetitoaki ao e riki bwa kain au kooram. Anne e na rangi n tamaroa.”
Fabian iai irouna Ana Boki Moomon are e kawakinna n te reirei, ao e uouoti aia boki aika uarereke mitinare n tibwaia nakoia raraona. E kukukrei ni kaekai titiraki iaon te Ekaretia ao e kaoia raraona nakon bootaki n te Tabati ao waaki ni kakukurei n te tairiki. Ao e aki maaku ni kawariia aomata inanon te kawai ao, n aroia mitinare ake a reireinna, e kaoia bwa a na reiakina taekan te Ekaretia ao ni katauraoia ibukin te bwabetito.
“Fabian e aki tabe ngkana temanna e taku bwa e kanaokoro n tibwakin ana koaua,” e taku Kellen. “E ataia bwa e karaoa te bwai ae eti. E ataia bwa bwain te maiu n tamnei a kakaawaki riki nakon bwaai nako.”
Ngkana e tibwa ana koaua Fabian, Jordan e taku, iai te mwaaka ae e karekea man ana maroro, n tangiran te euangkerio, ao ana kakabwaia.
“E noora te kakabwaia are e roko n ana utu, are e katika nanona bwa e na ninikoria ao n aki karariki n tibwakin te euangkerio ma raraona,” e taku Jordan. “N te tai are e kakoaua iai nakon are e ukoukora te koaua iaon te kakabwaia ae bubura are e karekea irouia ana karo ni mareakiia ma matoan ana tai n tataninga inanon aua namwakaina imwiin bwabetitoakina bwa e na bwabetitoaki tinana. E roko nanona, ao e bwaro raninmatana. Imwiina e kakoaua bwa ngkana ti kawakin tuua, te Atua e na kawakiniira.”
Ana koaua Fabian e kakorakora n riki bwa te mitinare ae te membwa, e reitia Kellen.
“E aki taekina ae, ‘O, I ongo iroun temanna ae e taekina aei n te taromauri.’ N onean mwiina, e tibwa n tainako oin ana taneiai ake e rinanona—n aron ana namakin ngke e nako n taromauri n te moan tai ao aron ana namakin ngke e wareka Ana Boki Moomon. A bane ni kona ni kakoauaki ao a koaua.”
“I Namakina ae Raoiroi n Tainako”
Iroun Fabian, tibwakin te euangkerio e uota te kakabwaia nakon temanna.
“N tabetai iai bwaai aika a buakaka aika a riki nakoiu n te reirei, ma imwiina a roko mitinare ni karebwerebwe iaon au mataroa ao n titiraki ngkana I tauraoi ni buokiia n angareirei,” e taku. “Imwiin irakiia, I namakina ae kaanga ai akea au kaangaanga. I namakina ae tamaroa n tainako ngkana I iriia n otinako, ni wareki koroboki aika a tabu ma ngaiia, ao ni buokiia n tibwa te euangkerio. Tibwauaan te euangkerio ao karakinan arou n rairaki e kakorakora au koaua. Ao reiakinan te euangkerio e anganai au tai n riki bwa te banna ni katoto nakoia tabeman, n ikotaki ma mwaneu ae uarereke.”
E aki kakubanako bwa teuana ana kouru Fabian ae moan te bubura bw e na riki bwa ngaia te mitinare ae bwanin ana tai imwiin banen ana reirei man te reirei n te kauarinan.
“I tangiria n tibwa te koaua ma naake a tuai n ataia,” e taku. “I tangiria ni kaoia bwa a na kaitiaki aia bure. I tangiria n reireiniia aroia ae a kona iai n riki bwa te utu ae akea tokina. I tangiria ni kaoia bwa a na kukurei n te tai aei ao a na maeka n te aro ni kukurei ae aki totoki imwiin te maiu aei.”