Ti Bwaai aika a maiu man te iti: Kairake n Ikawai
Tera Arou Ngkana Iai ae Kaotia bwa Iai Ana kaangaanga ma Tamnei aika Tangako
E maeka te tia korokaraki i Utah, USA.
I a kaman ataia inanon namwakaina bwa e na iai te bwai ae e na riki, ma e aki riki ni karokoa te tai aei ao iai raraou e kaota te koaua nakoiu n ana taetae: neiei iai ana kaangaanga ma tamnei aika tangako inanon ririki aika a bati, riki kanga bon te tai are I a tibwa moan kina iai.
I nanon tekatekau inanon te kaa n ongora nakon kaotan ana bure, I bon kakaitau. Tai anganai te kairua—e kammaraki aron ataakina ae iai ana kaangaanga te aine aio n te tai ae maan ao I aki ataia—ma I kukurei bwa I mena n arou are I kona ni kaeka iai ma te tangira ao n aki tiribure.
Te Aroaro n Riibuaka E aki Nakoraoi
N tabetai ataakin tamnei aika tangako ae a buakaka e kona ni kariiri ara iango bwa ti na taratara ke n namakiniia tabeman. I ataia bwa e roko n au iango n te tai teuana. Ngke I uarereke riki, I ongo taekaia aomata aika iai aia kaangaanga ma tamnei aika tangako ao nanou are I bon un iai ao riki te nanomwara. Ma ngke e tuangai raraou taekan ana kaangaanga, iai irou nanoangakina ma karauan nanona ibukina bwa I a ikawai riki man atatai riki n oin au bure ma au kabwaka inanon maiu.
I ataia ngkai bwa te arorao n riibuaka e aki nakoraoi. Iesu Kristo, bon ara banna ni katooto ae kororaoi, ukoriia aomata ake a kakeaaki bonganaia irouia tabeman. E taetae ma Itamaria ao taan bure. Kristo, e aki kona n “taraa te bure ma ni kariaia karaoana naba teutana” (Reirei ao Berita aika Tabu 1:31), n “taraira, n arora n aki kororaoi, n aki mwaing nako mai iai inanon te maaku ao n nanomwara.”1 Ngaia are rinanon te maroro ae nano ma raraou, I kataia n iangoa aron Iesu n arona ni kaeka. Rongorongon te aine ae kuneaki ni wene ni bure e buokai n ataa arou ni kaeka.
Te Kaeka ma te Nanoanga
Taan reirei ao Bwaretaio ake a maiuakina ana tua Mote n ana tai Iesu ni karaoa ana mwakuri bon ti teutana aia nanoanga. A bon rangi n onoti, akea te nanoanga, e na iai te rekenikai ake a karaoa te bure, ao ake a wenenibure a na kareaki n te atibu. Ma ngke e a uotaki te tia wenenibure nakon Iesu, E aki ribaaia ma—E kaota te nanoanga nakoina. Riki nakon kamoamoakiia taan bukibuki ni kuneakin temanna ni karaoia, E kauringiia taan bukibuki n oin aia bure (taraa Ioane 8:3–7). Ni bon arona, ngaira “ni kabane ti a tia ni karaoa te buakaka, ao ni kamatauninga mimitongin te Atua” (I-Rom 3:23). Kristo e aki kabuakaka te tia bure, ao ti riai naba ngaira n aki (taraa Ioane 13:34–35).
N te tai are a nako taan bukibuki, n taona nako n oin aia bure, Kristo e taetae nakon te aine. Ti tabeua ana taeka ma a rangi n tamaroa. E titiraki moa, “Neiko, a nga te koraki? akea ane motika taekam?” Ao ngke e kaeka bwa a tia n nako, E ti taekinna, “Ao Ngai I aki motika naba taekam: ko na nako; tai manga bure.” (Ioane 8:10–11).
Te katuaa e na bon aki buoka te aine aei ni bitaki, ma te Tia Kamaiu e ataia bwa te tangira e kona.
Nako; ao Tai Manga Bure
Te tangira bon te moan mwaneka ni buokakin temanna n tokanikai iaon tamnei aika tangako. Aron kamaoana n taainako e bon onoti nakon te aomata, ma iai mwaneka tabeua are a kona ni kabane ake a rinanon te kaangaanga ae a riai ni karaoia. Kaungaiia bwa a na kawara aia bitiobi; iai irouna bwaai n ibuobuoki ake e kona ni ibuobuoki iai. Ngkana e riai, buokiia ni kinai bwaai ake a karikii ao ni katea te baire ni buokiia bwa a na totokoi. Kaungaiia bwa a na kawara te tia rabakau ke ni kaaina te kurubu ni boutoka. Ao reitinako n tangiriia ao ni boutokaiia n rinanon mwakuriana.
Kristo e kaota te tangira nakon te aine ao e kakoaua bwa e ataia bwa E aki tangiria bwa e na reitinako n ana bure. Te tangira ae itiaki ni koaua e aki nanonna bwa ti na katinanikuia tabeman aika a kairua, ma ti na riai n atai aia konabwai ao ni kaungaira bwa ti na buokiia bwa a na waaki nako.
Te Mwananga n te Onimaki
I tangira raraou, ma I tangiria riki imwiin ae e a tia n taekina te bwai ae raba. N aki taraia bwa tera ae ko a tia ngkoe ke temanna ae ko tangira ni karaoia, “Ko aki kona ni karinanoko riki nakon otan ana Mwakuri ni Kamaiu Kristo ae akea tokina ae otamwaaka.”2
Ngkana ko ataa temanna ae iai ana kaangaanga ma tamnei aika tangako, tai kabwara nanom mairouia! Arora baim ma te tangira ao te nanoanga n ai aron are e karaoia te Tia Kamaiu. E na bon aki bebeete; kaangaanga aikai aki kona ni waekoa n nako. Bwaina te tataonaki n nano ma ake ko tangiriia ao boni ngkoe. Reiakinan te tangira ao te mataata iroun temanna are e rinanon te bwai ae rangi ni kaangaanga e aki kakukurei n taainako ke ni bebete. Ma I onimakinna bwa te tangira ni kabane ake ti anga e aki banebuaka, n aki taraaki abwakina ke mwiin aia mwananga naake ti tangiriia.