Tokin Kawaira Mairoun te Atua
E maeka te tia korokaraki i Buranti.
E aki toki raoraou ni kukurei n taainako. Tera te bwai ae na kona n tabeaianga iai?
Kamataata n te tamnei iroun Reginald Swinney
Ngai kaain Buranti, ma Ngai ma mwaneu ti kabanea teuana te ririki bwa ataein te reirei aika ti kaibibitaki n te United States mainiku. N te tai anne, ti kaitibo ma aomata aika mwaiti, ma temanna ae anaa nanou bon te aine ae arana Destiny. E riki bwa ngaia raoraou ae moan te tamaroa. Ti bobotaki ni karaoi aekakin bwaai ni kabane, n tain te reirei ao imwiin te reirei ma mwaneu. Destiny bon te aine ae kukurei n tainako. Anne bukin te bwai ae I rangin n tangiria iai.
Ngkanne n te bong teuana I nooria n ae kanga iai ana kaangaanga ae I tuai n nooria iai mai imwaina. I titirakinna bwa tera ae riki. E taku bwa e aki tangiria n taekinna. Imwiina I kunea te beeba inanon baina. I anaia ao ni warekia.
Iai ae a tia ni korea te taeka aika buakaka nakoina. Te koroboki ae aki ataaki bwa antai ae koroia e taekinna bwa e teibuaka, akea ae tangiria, ao akea uaan maiuna, ao e riai n nako ao ni kamatea. I aki kona ni kakoaua temanna n airon neiei ae e na kona ni kataereaki n aron aei. E rootai n ae korakora aron atakin te maraki ae rinanona neiei.
Mai ikanne, I karaoa te mwakuri ae korakora riki na riki bwa raoraon Destiny—tiaki n ti kabanea te tai ma ngaia, ma ni boutokaia n tainako, ao riki n tangiria. I kabwarabwara nakoina bwa ngaia bon natin te Atua, ae kakabwaiakaki n arona mairoun te Atua, n tau ni karineaki ao n tau nakon bwaai aika kakawaki.
E kaangaanga bwa ko na tangiriko bon iroum ngkana tabeman a karaoa ae buakaka nakoim ao ni kabuakakako. Ngke I buoka Destiny, I kunea bwa n tabetai te kabanea n tamaroa ni kawai ni buokiia tabeman bon ti man tangirakiia ao buokaia ni kaotaia bwa antai ngaia.
N tokin te ririki, ngke n nang oki nako Buranti, e tuangai Destiny te bwai ae n na ururingnga n tainako. “Emma,” e taku, “ko kamaiuai. Imwain ae ko roko, I tangiria ni bwakabureai. Ma ngkoe ao mwanem kamwa tia ni buokai, ti man tabeakinakiu. N te bong aei ao I tangirai, ao I tangiri ngkami.”
A mwaiti ataei n te reirei aika a rinanon te bwainikirinaki, aika kakeaaki bonganaia ke ni katinanikuaki. Kakaea te kawai ni karoko irouiia. Taetae nakoia, iangoia, bwaina te tangira nakoia. Bon te bwai ae na karaoia te Tia Kamaiu nakoia, ao n tabetai te ibuobuoki ae rangi bebete nakoia bon te moangare are ngaia ae kona ni bitii bwaai ni kabane.