Te Kakabwaia ae Raka

Roberto Atúncar Nieto

Lima, Peru

Kainnabau, Carmen, ao Ngai e a tibwa reke natira ngke I weteaki bwa N na riki bwa te bitiobi n ara uoote. N te tai anne, iai ara kaangaanga n te kataumwane. E a roko te rawawata irou n arou ni karekei kainnanoia au utu ao n te tai naba anne N na tararuaia ao n tabeakiniia membwa n ara uoote.

N te Tabati teuana, I noora te tina ae akea buuna ma natina aika aman n te bootaki n toa. E tekateka mai buki n te kabanea ni kaintekateka ni kabanea korakorana bwa a na aki karongoa natina. I ataia bwa iai naba ana kaangaanga n te kataumwane, ma e tuai man bubuti te ibuobuoki. Ngkai e waaki nako te wiiki, ao ni katoa Tabati e roko n taromauri ma natina.

N te bong teuana, e reke au bwakabwai. I kakabwaiaki ni karekea te boo ae raka, I baireia bwa N na kabongana te tatara ni mwane ni kabooi bwaai ibukin te onobwai n au auti. Ma ngke I waaki nakon te mwakete, te aine aei ma natina a roko n au iango. I namakinna bwa I riai ni kabongana te raka ni mwane aei ni kabooi amwarake ibukiia. I wetea Carmen ao I tuangnga te bwai are I namakinna bwa I riai ni karaoia. E kariaia.

Ngke I bobwai, I noori tabeua kukii. I iango bwa tao ataei a bae n tangiri tabeua karewerewe. I kaoni baeki uoua ma amwarake ao I toua kawaiu nakon ana auti te titita aei.

I karebwerebwe iaon te mataroa ae karaoaki man te kai ae e a mka tabeua te tai. Ngke N nang kitanna, n tokin te tai e a kaukaki te mataroa. “Bitiobi,” e taku te titita, “I kubanako n nooriko ikai.” N te tai ae waekoa, natina a biri n otinaki mai akuna.

“I uoti amwarake ibukimi,” I taku.

Temanna natina te aine e kunei kukii ao e takarua, “Kukii!” Mwanena ma tarina a kukurei n ikotaki ni katobibi. Natina te aine ae itiua ana ririki e inga nakoiu. “Ko rabwa, Bitiobi!” e taku.

I taraa nanon aia auti ao I nooria bwa te aine aei e uaati kunnikia inanon te baen iaon te timanti. Akea aia taibora te utu aei ao a matu iaon te maetureti iaon te timanti. I kunea bwa e mwaiti kainnanoia. I karaoi babaire ake N na kakoaua bwa iai aia taibora ao bwa a na bane n reke aia kainiwene.

Te bwai ae I rinanona aei e buokai n ataia bwa te Uea e kairiiri ao e kakabwaiaia Ana toro. Ti aki kainnanoa te wewete ae onoti bwa ti na kona ni buokiia tarira ao mwanera. Ti tii riai ni kairaki iroun te Tamnei, n atai kainnanoia naake a kainnanoa ara ibuobuoki, ao n tauraoi n riki bwa tabonibain te Atua.