Te Bwara ae e Mainaina ibukin Florence
E maeka te tia korokaraki i Michigan, USA.
E roko n ana tabo Florence Onyejekwe are e tataneiai iai i tinanikun te tabo ni mwakete ae e onrake kaina i Onitsha, Nigeria. E onrake te kawai irouia taan kabonakoi bwaai ni weweteia ake a roko ni bobwai. Aine a kabaerantii bwantoro iaon atuia ngkai a nakonako. E a toki te reirei ibukin te motirawa, ao e ataia Florence ae raoraona a kukurei n tain motirawan te kiraati. Ma Florence e kabanea ana motirawa ni kabonakoi aroka ae bitterleaf ikai n te mwakete. Bon ti aio ana tai ni kareke mwane ibukin roona n te reirei.
Ma, e bon aki ngurengure Florence. Irarikin akanne, tinana e kabanea te tai ae e abwabwaki ni tiku n te mwakete ni katoa bon ni kabonakoi taian yam bwa boon te amwarake ibukin te utu. E rangi ni mwakuri korakora Mama. Ana karo a bon mwakuri korakora. Ma akean te reirei ae e tau, e bon karako te bwai ae a kona ni karaoia. E a bon kani bane ana tai Florence man te moan n rinan. Tao ngkana e kona n reitanako ana reirei, e kona ni karekea ana mwakuri ae e raoiroi te boo iai ao ni buokiia ana utu.
Ngke e okira mweengana, Florence e kuneia ana karo ao e titirakiniia, “N ami iango I kona n nako n te reirei n te kauarinan? Ao tao te iuniwetiri?”
Mama e tara Nnam (tamau) ao e ioioa atuna. “E korakora te kabanemwane n te iuniwetiri nakon are ti karekea,” e taku Nnam. E baraaki Florence n tarai ana kau. E aki tangira Mama ao Nnam n noria ae e rangi n nanokawaki.
Tabeua te bong imwiina, e tei Florence n te onaoraki n anai tabeua bwai n aoraki. E bon rangi ni ibetutu naba kain te onaoraki n aron te mwakete, ma e aki rang karongoa. E katoka matana Florence n taraia neeti ma bwaraia ae mainaina, ni itiaki. E katamneia n ana iango ae e kunikaina n te kabooraoi n aron anne, ni buokiia aoraki ao n tararuaia ataei n te onaoraki ae e rangi ni bubura. Tao n taina e kona n riki bwa te neeti.
E ataia Florence ae a eti ana karo—karekean te reirei e na rangi ni matoatoa. Ma Florence e ata aron te mwakuri korakora. E iangoia bwa e na kataia.
N aki tabe bwa mwaitira katabeana ae e kaona ana bong, Florence e karekea naba ana tai ni kamatebwai. E bwaati ana ukeuke nakon te kauarinan, ao Nnam e tangoa te mwane ae e tau ibukina bwa e na nako. Imwiina e kunea bwa te tautaeka e kona ni ibuobuoki ni kabwaka boon te reirei n neeti. E a bon kan koro nanon ana iango!
Ma ngke e a roko te tai ni moana te reirei n neet, e namakina te raraoma Florence. Ao tera ngkana e rangi ni matoatoa? Ao ngkana e a maroaa? E kabwaraka atuna Florence ao e tataro, “O te Atua, taiaoka anganai te korakora bwa na nako n te reirei n neeti ao ni mwakuri korakora.”
N te kura n neeti, Florence e reiakina aron anganakon bwai n aoraki ao ni kateimatoa itiakin bwaai ni mwakuri man te manaoraki. N tabetai ana aoraki a marurug, ma n tabetai a manga aki. E tatataro Florence ni katoa tai ibukin te ninikoria. Imwiin tenua te ririki ae e a bwabwaki, e a anga beba Florence ma te kaniwanga ibukin te kabanea n tamaron n ataei n ana kiraati. E a koro bukin ana iango! E a kona ni bwaina bwaraia neeti are e mainaina, ao e karekea boona ae tau ni buokiia ana utu.
Inanon ririki aika a mwaiti imwiina, Florence e kawara te mwaanga ae e uarereke n te Ghana Accra Mitin. Kainabana, Christopher Chukwurah, bon te beretitenti n te mitin ikekei. E kaitibo Florence ma tabeman ataei n te mwaanga ake a bon aki kona n nako n te reirei. A aki koaua raoi bwa tera ae ana karaoia n tai aika i mwaiia. A kauringa Florence arona ngke e uarereke. “Tera ae I kona ni karaoia ni buokiia?” E tataro Florence ni karaurau.
Ngkanne e namakina te wirikiriki: Tuangiia aron tein maeum.
E iango Florence n aron maiuna. E a tia ni mwakuri n taian n onaoraki i Nigeria ao i Amerika. E mareaki ma te mwaane ae tamaroa, ao a uaia ni kunea Ana Ekaretia Iesu Kristo Ibukiia Aika a Itiaki ni Boong Aika Kaitira. E riki bwa te tina. Ngkai e a buokiia mitinare bwa ana marurung ao ni mwakuri korakora. Tamara are i Karawa e a tia ni buokia bwa e na riki n neeti. E a tia ni buokia ni karaoi aika a mwaiti nakon are e kona ni iangoia. E kona ni karaoa naba aio nakoia ataei aikai.
Florence e taraia ataei ao ni wingare. “Kam norii bwaara ake a mainaina ake a kabonganai neeti akekei? I nora aekakin te bwara anne ao I a iangoia bwa na riki n neeti …”