Mga Espirituhanong Panumduman nga Angay Hinumduman
Kon ang personal nga mga kalisdanan, o kon ang mga kahimtang sa kalibutan nga lapas sa atong pagkontrolar mopangitngit sa atong dalan, ang espirituhanong panumduman nga angay hinumduman gikan sa libro sa atong kinabuhi mahisama sa sanag nga mga bato nga modan-ag sa unahan.
Diseotso ka tuig human sa Unang Panan-awon, misulat si Propeta Joseph Smith og detalyadong sugilanon sa iyang kasinatian. Siya nagsagubang og mga oposisyon, pagpanglutos, pagpanghasi, pagpanghulga, ug bangis nga mga pagsulong.1 Sa gihapon sa walay lipud-lipod padayon siyang nagpamatuod sa iyang Unang Panan-awon: “Ako sa tinuod nakakita og usa ka kahayag, ug sa taliwala niana nga kahayag ako nakakita sa duha ka mga Personahe, ug sila sa kamatuoran namulong ngari kanako; ug bisan pa ako gikasilagan ug gigukod sa pag-ingon nga ako nakakita og usa ka panan-awon, apan kini tinuod. … Nasayud ako niini, ug ang Dios nasayud niini, ug ako dili makalimud niini.”2
Sa iyang pait nga mga oras, gihinumduman ni Joseph ang hapit duha na ka dekadang milabay nga kasiguradoan sa gugma sa Dios kaniya ug ang mga hitabo nga mihangop sa dugay nang gitagna nga Pagpahiuli. Sa pagpamalandong sa espirituhanon niyang panaw, miingon si Joseph: “Dili nako mabasol si bisan kinsa sa dili pagtuo sa akong kasaysayan. Kon ako wala makasinati unsay akong nasinati, mismo ako dili motuo niini.”3
Ang maong mga kasinatian tinuod, ug wala siya makalimot o molimud niini, hilum niyang gipamatud-an ang iyang panghimatuod samtang padulong siya sa Carthage. “Ako moadto sama sa usa ka karnero ngadto sa ihawanan,” “apan ako malinawon ingon sa kabuntagon sa ting-init; ako adunay tanlag nga walay sala ngadto sa Dios ug ngadto sa tanan nga mga tawo.”4
Imong mga Espirituhanon nga Kasinatian nga Angay Hinumduman
Adunay leksyon para kanato sa ehemplo ni Propeta Joseph. Kauban sa malinawong direksyon nga atong nadawat gikan sa Espiritu Santo, sa matag karon ug unya, ang Dios sa impluwensyal ug sa personal kaayo nga paagi misiguro sa matag usa kanato nga Siya nakaila ug nahigugma kanato ug Siya nanalangin kanato sa piho ug sa dayag nga paagi. Dayon, sa atong mga kalisdanan, kining mga kasinatian ibalik sa Manluluwas diha sa atong hunahuna.
Hunahunaa ang kaugalingon nimong kinabuhi. Sulod sa mga katuigan, namati ako sa mahinuklugong espirituhanong mga kasinatian gikan sa liboan ka mga Santos sa Ulahing mga Adlaw sa tibuok kalibutan, nagmatuod kanako sa dili ikalimud nga ang Dios nakaila ug nahigugma sa matag usa kanato ug matinguhaon kaayo nga mopadayag sa Iyang kaugalingon ngari kanato. Kini nga mga kasinatian posibling moabut sa importanting mga panahon sa atong kinabuhi, ug tingali sa sinugdanan daw dili kaayo importanting mga hitabo, apan kanunay kining giubanan og linahi nga kumpirmasyon sa espirituhanong gahum sa gugma sa Dios.
Ang paghinumdom niining espirituhanon angay hinumduman nga mga kasinatian mopaluhod kanato, nga magpahayag sama ni Propeta Joseph: “Ang akong nadawat naggikan sa Dios. Ako nasayud niini, ug ako dili makalimud niini.”5
Upat ka Sanglitanan
Pamalandungi ang kaugalingon nimong mga espirituhanong panumduman nga angay hinumduman samtang mopaambit ko og pipila ka ehemplo gikan sa uban.
Mga tuig nang milabay, usa ka gulangon nga patriarch nga dunay problema sa duha ka ugat sa kasingkasing mihangyo sa kaniadto-Dr. Russel M. Nelson nga motabang, bisan og niadtong higayona wala pay pag-opera nga maoy sulbad sa nadaot nga ugat. Si Dr. Nelson sa katapusan miuyon sa pag-opera. Kini ang mga pulong ni Presidente Nelson:
“Human matangtang ang naka-ali sa unang ugat, gisunod namo ang ikaduha. Among nakita nga tibuok ra kini apan grabe ang paghubag niini nga dili na kini makalihok og tarung. Samtang gisusi kini nga ugat, usa ka mensahe misulod sa akong hunahuna: Pagamyi ang gidak-on sa buka. Gipahibalo nako ang mensahe sa akong assistant. ‘Ang tissue paigo ra kon matarung nato sa pagpagamay ang buka ngadto sa normal niini nga gidak-on.’
“Apan unsaon? … Usa ka hulagway klaro kaayo sa akong hunahuna nagpakita unsaon nako pagpahimutang ang mga tahi—nga ipilo diri ug ipalapus didto. … Akong mahinumduman gihapon kadtong mental nga imahe—nga may kompletong tuldok-tuldok kon asa ipahimutang ang mga tahi. Nahuman ang pag-opera sigun sa gi-diagram sa akong hunahuna. Among gitestingan ang ugat ug nakita nga migamay ang buka sa talagsaong paagi. Miingon ang akong assistant, ‘Milagro.’”6 Nabuhi ang patriarch og daghan pang mga tuig.
Si Dr. Nelson gigiyahan. Ug nahibalo siya nga ang Dios nahibalo nga siya nahibalo nga gigiyahan siya.
Si Kathy ug ako unang nakahimamat ni Beatrice Magré sa France 30 ka tuig nang milabay. Si Beatrice bag-o lang misulti nako og kasinatian nga nakaepekto sa iyang espirituhanong kinabuhi wala madugay human sa iyang bunyag niadtong tin-edyer pa siya. Kini ang iyang mga pulong:
“Ang kabatan-onan sa among branch mibiyahe kuyog sa ilang mga lider ngadto sa Lacanau Beach, usa ka oras ug tunga gikan sa Bordeaux.
“Sa wala pa mamauli, usa sa mga lider mihukom nga mosawom una siya ug mi-dive ngadto sa mga balud nga nag-antipara. Sa iyang pagtunga, wala na ang iyang antipara. … Nawala kini sa dagat.
“Sa pagkawala sa iyang antipara dili na siya maka-drive sa iyang sakyanan. Matanggong kami layo sa balay.
“Usa ka sister nga puno sa pagtuo misugyot nga mag-ampo kami.
“Miyam-id kong nag-ingon nga walay kahimoan ang pag-ampo, ug wala kaayo ko ganahing miapil sa pag-ampo sa publiko samtang nagbarug kami kutob sa hawak sa lubugon nga tubig.
“Pagkahuman sa pag-ampo, gituyhad nako aron i nako akong mga kamot aron sabligan og tubig ang tanan. Sa akong pagkawos aron mosablig sa tubig, ang antipara nasangit sa akong kamot. Usa ka kusog kaayong pagbati midulot sa akong kalag nga ang Dios sa tinuod makadungog sa atong mga pag-ampo.”7
Kwarenta y singko ka tuig na ang milabay, gihinumduman niya kini sama og nahitabo kini kagahapon. Si Beatrice napanalangingan, ug nasayud siya nga ang Dios nasayud nga napalanginan siya.
Ang mga kasinatian ni Presidente Nelson ug ni Sister Magré managlahi kaayo, apan alang sa duha, ang dili angay hikalimtan nga espirituhanong panumduman sa gugma sa Dios nakulit sa ilang mga kasingkasing.
Kini nga importanting mga hitabo sa kasagaran moabut diha sa pagkat-on mahitungod sa gipahiuli nga ebanghelyo o sa pagpaambit sa ebanghelyo ngadto sa uban.
Kini nga litrato kuha sa São Paulo, Brazil, niadtong 2004. Si Floripes Luzia Damasio sa Ipatinga Brazil Stake 114 anyos na. Sa paghisgot bahin sa iyang pagkakabig, giingnan ko ni Sister Damasio nga ang mga misyonaryo sa iyang balangay mihatag og panalangin sa pagkapari sa grabe og sakit nga bata kinsa milagrusong naayo. Gusto siyang mahibalo pa og daghan. Samtang nag-ampo siya kabahin sa ilang mensahe, usa ka dili malimud nga pagsaksi sa Espiritu mikumpirmar kaniya nga si Joseph Smith usa ka propeta sa Dios. Sa edad nga 103, gibunyagan siya, ug sa edad nga 104, na-endow siya. Matag tuig human niadto, mobiyahe siya og 14-ka oras sa bus sa paggahin og usa ka semana sa templo. Si sister Damasio nakadawat og langitnong panghimatuod, ug nasayud siya nga ang Dios nasayud nga siya nasayud nga ang pagsaksi tinuod.
Aniay espirituhanon nga panumduman gikan sa una nakong misyon sa France 48 ka tuig nang milabay.
Samtang nag-trakting, ako ug ang akong kompanyon mibilin og Basahon ni Mormon sa gulangon na nga babaye. Dihang namalik mi sa apartment sa maong babaye mga usa ka semana human niadto, giablihan niya ang pultahan. Sa wala pay gilitok nga mga pulong, klaro nakong gibati, ang espirituhanon nga gahum. Ang kusog kaayong pagbati padayon dihang gipasulod kami ni Madam Alice Audubert ug misulti kanamo nga iyang gibasa ang Basahon ni Mormon ug nahibalo nga kini tinuod. Sa among pagbiya sa iyang apartment nianang adlawa, nag-ampo ko, “Langitnong Amahan, palihug tabangi ko nga dili nako kalimtan ang bag-o lang nakong gibati.” Wala gyud ko makalimot.
Sa daw ordinaryo nga gutlo, dapit sa pultahan sama sa daghan kaayong gatusan ka ubang mga pultahan, mibati ko sa gahum sa langit. Ug nasayud ako nga ang Dios nasayud nga ang bintana sa langit giablihan.
Gitinagsa-tagsa ug Dili Ikalimud
Kining espirituhanon dili angay hikalimtang mga gutlo moabut sa managlahing panahon ug managlahing paagi, nga gitinagsa-tagsa sa matag usa kanato.
Hunahunaa ang paborito ninyong mga ehempo diha sa mga kasulatan. Kadtong naminaw ni Apostol Pedro “gisakitan sa ilang [mga] kasingkasing.”8 Ang babayeng Lamanite nga si Abish mituo sa “talagsaon nga panan-awon sa iyang amahan.”9 Ug ang tingog miabut diha sa hunahuna ni Enos.10
Ang higala nakong si Clayton Christensen mihulagway og usa ka kasinatian atol sa mahinuklugon kaayong pagbasa sa Basahon ni Mormon niini nga paagi: “Usa ka matahum, mainiton, mahigugmaong Espiritu … mipalibut kanako ug mikuyanap sa akong kalag, miputos kanako sa pagbati sa gugma nga dili nako masabut nga akong gibati, [ug kini nga pagbati nagpadayon gabii human sa usa ka gabii].”11
Dunay mga panahon nga ang espirituhanong mga pagbati motuhop sa atong kasingkasing sama sa kalayo, nga mosanag sa atong kalag. Si Joseph Smith mipasabut nga usahay makadawat kita og “hinanaling pagsantup sa mga ideya” ug panagsa sa tiunay nga pagdagayday sa salabutan.12
Si Presidente Dallin H. Oaks, sa pagtubag sa sinsero nga tawo kinsa miingon nga wala pa gayud siyay ingon niana nga kasinatian, mitambag, “Tingali ang imong mga pag-ampo balik-balik nang gitubag, apan ikaw nangita og usa ka timailhan nga klaro kaayo o tingog nga kusog kaayo nga nagtuo na noon ka nga wala ka tubaga.”13 Ang Manluluwas Mismo namulong kabahin sa mga tawo nga adunay hugot nga pagtuo kinsa “[napanalanginan] sa kalayo ug uban sa Espiritu Santo, [apan sila] wala masayud niini.”14
Unsaon Ninyo sa Pagkadungog Kaniya?
Bag-o lang natong nadungog si Presidente Russell M. Nelson nga miingon: “Ako modapit kaninyo sa paghunahuna og maayo ug sa kanunay bahin niining mahinungdanon nga pangutana: Unsaon nimo sa pagkadungog Kaniya? Ako usab modapit kaninyo sa paghimo og mga lakang aron mas makadungog Kaniya ug mas kanunay.”15 Gisubli niya ang imbitasyon karong buntag.
Makadungog kita Kaniya sa atong mga pag-ampo, sa atong mga balay, sa atong mga kasulatan, sa atong mga himno, samtang takus kitang moambit sa sakramento, samtang magserbisyo kita sa uban, ug samtang naa kita sa templo kauban sa isigka-tumutuo. Ang espirituhanong mga panumduman nga angay hinumduman moabut kon mainampuon kitang maminaw sa kinatibuk-ang komperensya ug kon mas maayo ang pagsunod nato sa mga sugo. Ug mga bata, kini nga mga kasinatian para kaninyo usab. Hinumdumi, si Jesus, “mitudlo ug mialagad ngadto sa anak sa mga katawhan … ug [ang mga anak] namulong … sa mahinungdanon ug katingalahan nga mga butang.”16 Ang Ginoo miingon:
“[Kini nga kahibalo] gihatag pinaagi sa akong Espiritu nganha kaninyo, … gawas kon kini pinaagi sa akong gahum kamo dili makabaton [niini];
“Busa, kamo makapamatuod nga kamo nakadungog sa akong tingog, ug nahibalo sa akong mga pulong.”17
Kita “makadungog Kaniya” tungod sa panalangin sa dili ikatandi nga Pag-ula sa Manluluwas.
Samtang dili kita makapili sa tayming alang sa pagdawat niining angay hinumduman nga mga gutlo, si Presidente Henry B. Eyring mihatag niini nga tambag sa atong pagpangandam: “Karong gabii, ug ugma sa gabii, tingali mag-ampo kamo ug mamalandong, nga mangutana: Ang Dios nagpadala ba og mensahe nga alang lang gayud kanako? Nakita ba nako ang Iyang kamot sa akong kinabuhi o sa kinabuhi sa akong [pamilya]?”18 Ang pagtuo, kamasulundon, pagpaubos, ug tinuod nga katuyoan moabli sa mga bintana sa langit.19
Usa ka Paghulagway
Tingali maghunahuna kamo sa inyong mga espirituhanong panumduman niini nga paagi. Pinaagi sa kanunay nga pag-ampo, determinasyon sa pagtuman sa atong mga pakigsaad, ug sa gasa sa Espiritu Santo, gidumala nato ang atong dalan sa kinabuhi. Kon ang personal nga kalisdanan, pagduhaduha, o pagkaluya mopangitngit sa atong dalan, o kon ang mga kahimtang sa kalibutan nga lapas sa atong pagkontrolar mopahunahuna kanato sa umaabut, ang espirituhanong panumduman nga angay hinumduman gikan sa libro sa atong kinabuhi ng espirituhanong panumduman nga angay hinumduman gikan sa libro sa atong kinabuhi mahisama sa sanag nga mga bato nga modan-ag sa unahan, nagsiguro kanato nga ang Dios nakaila ug nahigugma kanato, ug mipadala sa Iyang Anak, si Jesukristo, sa pagtabang kanato nga makabalik sa panimalay. Ug kon may tawo nga mobaliwala sa iyang mga panumduman nga angay hinumduman ug nahisalaag o nalibug, ato silang ipaatubang sa Manluluwas samtang mopaambit kita sa atong pagtuo ug mga panumduman uban nila, sa pagtabang nga madiskobrihan nila og balik ang mga bililhon espirituhanong mga gutlo nga kaniadto ilang gibahandi.
Ang ubang mga kasinatian sagrado kaayo nga kini atong tagoan diha sa atong espirituhanong panumduman ug dili kini ipaambit.20
“Ang mga anghel mamulong pinaagi sa gahum sa Espiritu Santo; busa, sila namulong sa mga pulong ni Kristo.”21
Ang mga anghel [wala mohunong] sa pagpangalagad sa katawhan.
“Kay tan-awa, sila mga alagad [kang Kristo], nga mangalagad sumala sa … iyang pagmando, nagpakita sa ilang kaugalingon ngadto kanila sa hugot nga pagtuo og usa ka malig-on nga panghunahuna diha sa matag dagway sa pagka-diosnon.”22
Ug “ang Maghuhupay, nga mao ang Espiritu Santo, … magatudlo kaninyo sa tanang butang, ug magapahinumdom kaninyo.”23
Hangupa ang sagrado ninyong mga panumduman. Tuohi kini. Isulat kini. Ipaambit kini sa inyong pamilya. Saligi nga miabut kini kaninyo gikan sa inyong Langitnong Amahan ug sa iyang Hinigugma nga Anak.24 Tuguti nga magdala kini og pailub sa inyong mga pagduhaduha ug panabut sa inyong mga kalisdanan.25 Mosaad ko ninyo nga samtang kamo andam nga moila ug mainampingon nga mobahandi sa espirituhanong mga hitabo nga angay hinumduman sa inyong kinabuhi, magkadaghan pa ang moabut kaninyo. Ang Langitnong Amahan nakaila ug nahigugma kaninyo!
Si Jesus mao ang Kristo, ang Iyang ebanghelyo napahiuli na, ug kon padayon kitang magmatinud-anon, ako mosaad nga kita Iya gayud sa hangtud, sa ngalan ni Jesukristo, amen.