Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi

Mayo 2020

2:3

Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi

Ni Elder Quentin L. Cook

Sa Korum sa Napulog Duha ka mga Apostoles

Ang nagpadayon nga pagpadayag nadawat ug gidawat pa pinaagi sa mga pamaagi nga giestablisar sa Ginoo.

Karon mamulong ako kalabut sa nagpadayon nga pagpadayag ngadto sa mga propeta ug sa nagpadayon nga personal nga pagpadayag aron sa paggiya sa atong kinabuhi.

Usahay makadawat kita og pagpadayag bisan kon wala kita masayud sa mga katuyoan sa Ginoo. Sa wala pa matawag si Elder Jeffrey R. Holland nga mahimong Apostol niadtong Hunyo 1994, duna akoy nindot nga kasinatian sa pagpadayag nga siya pagatawagon. Usa ako ka regional representative kaniadto ug walay nakitang rason nga hatagan ako niana nga kahibalo. Apan nagkauban kami isip batan-ong mga misyonaryo sa England sa sayong bahin sa 1960, ug dako ang akong gugma alang kaniya. Akong gikonsiderar ang kasinatian nga malumo nga kalooy alang kanako. Sa bag-o lang nga katuigan, naghunahuna ko kon giandam ba ko sa Ginoo nga mahimong junior diha sa Napulog Duha ngadto sa talagsaong misyonaryo nga kauban kinsa akong junior companion sa dihang batan-on pa kami nga mga misyonaryo.¹ Akong pasidan-an usahay ang batan-ong mga misyonaryo nga magmabination ngadto sa ilang mga junior companion tungod kay wala gayud sila mahibalo basin mahimo unya kini nilang senior companion.

Ako adunay lig-ong pagpamatuod nga kining gipahiuli nga Simbahan gigiyahan sa atong Manluluwas, si Jesukristo. Nasayud Siya kinsa ang tawagon isip Iyang mga Apostoles ug sa unsang han-ay sila pagatawagon. Nasayud usab Siya unsaon sa pag-andam sa Iyang senior nga Apostol nga mahimong propeta ug Presidente sa Simbahan.

Napanalanginan kita karong buntaga nga makadungog sa atong pinalanggang propeta, si Presidente Russell M. Nelson, nga mihatag og seryusong pamahayag ngadto sa kalibutan sa ikaduhang siglo nga kasaulogan kalabut sa Pagpahiuli sa kahingpitan sa ebanghelyo ni Jesukristo.² Kining importanting deklarasyon ni Presidente Nelson nagklaro nga ang kagikan, pagkaanaa, ug direksyon alang sa umaabut sa Simbahan ni Jesukristo anaa tungod sa baruganan sa nagpadayon nga pagpadayag. Kining bag-ong pamahayag nagrepresentar sa komunikasyon sa usa ka mahigugmaong Amahan ngadto sa Iyang mga anak.

Sa milabay nga panahon, si Presidente Spencer W. Kimball mipahayag sa mga pagbati nga aduna ako karon. Miingon siya: “Sa tanang mga butang, nga kita kinahanglan nga labing mapasalamaton … mao nga ang mga langit sa tinuoray naabli na gayud ug nga ang gipahiuli nga simbahan ni Jesukristo natukod diha sa bato sa pagpadayag. Ang nagpadayon nga pagpadayag sa pagkatinuod mao ang mismong dugo sa kinabuhi sa ebanghelyo sa buhing Ginoo ug Manluluwas, nga si Jesukristo.”³

Si propeta Enoch nakakita nang daan sa panahon diin kita nagpuyo. Ang Ginoo miangkon ngadto kang Enoch sa hilabihang kadautan nga mokuyanap ug nanagna sa “dako nga mga katalagman” nga mahitabo. Bisan pa, ang Ginoo misaad, “Apan ang akong mga katawhan Ako mopatunhay.”⁴ “Ug pagkamatarung Ako mopakanaog gikan sa langit, ug kamatuoran Ako mopadala gikan sa yuta, aron sa pagpamatuod sa akong Bugtong Anak.”⁵

Si Presidente Ezra Taft Benson mitudlo uban sa dakong gahum nga ang Basahon ni Mormon, ang sukaranan sa atong tinuohan, mitungha gikan sa yuta agig pagtuman sa gipamulong sa Ginoo ngadto ni Enoch. Ang Amahan ug ang Anak ug mga anghel ug mga propeta nga mipakita ngadto ni Propeta Joseph Smith “gigiyahan sa langit sa pagpahiuli sa gikinahanglan nga mga gahum ngadto sa gingharian.”⁶

Si Propeta Joseph Smith nakadawat og daghang nagsunod nga mga pagpadayag. Ang uban gihisgutan dinhi niini nga komperensya. Daghang mga pagpadayag nga nadawat ni Propeta Joseph gipreserbar alang kanato diha sa Doktrina ug mga Pakigsaad. Ang tanang sumbanan nga mga basahon sa Simbahan naglangkob sa hunahuna ug kabubut-on sa Ginoo alang kanato niining katapusang dispensasyon.⁷

Agig dugang niining talagsaong sukaranan nga mga kasulatan, napanalanginan kita sa nagpadayon nga pagpadayag ngadto sa buhi nga mga propeta. Ang mga propeta “sinugo nga mga tinugyanan sa Ginoo, gitugutan nga mamulong alang Kaniya.”⁸

Ang ubang mga pagpadayag hilabihan ka importante, ug ang uban nakadugang sa atong pagsabut sa mahinungdanon nga balaanong mga kamatuoran ug naghatag og giya sa atong panahon.⁹

Mapasalamaton kaayo kita sa pagpadayag ngadto ni Presidente Spencer W. Kimball nga naghatag sa mga panalangin sa pagkapari ug templo ngadto sa tanang takus nga lalaki nga mga miyembro sa Simbahan niadtong Hunyo 1978.¹⁰

Nakaserbisyo ko uban sa daghan sa Napulog Duha kinsa anaa kaniadto ug miapil sa dihang nadawat kana nga bililhong pagpadayag. Ang matag usa kanila, sa personal nga mga pakig-istorya, mikumpirma sa gamhanan ug makahiusa nga espirituhanong giya nga nasinati nila ug ni Presidente Kimball. Daghan ang miingon nga kadto ang labing gamhanang pagpadayag nga ilang nadawat sa wala pa o human niana nga panahon.¹¹

Kami nga nagserbisyo karon sa Korum sa Napulog Duha ka mga Apostoles napanalanginan sa among panahon samtang ang mahinungdanong mga pagpadayag miabut pinaagi sa bag-ohay nga mga propeta.¹² Si Presidente Russell M. Nelson usa ka sinugo nga tinugyanan sa Ginoo ilabi na kon kalabut sa mga pagpadayag sa pagtabang sa mga pamilya sa pagtukod og mga santuwaryo sa pagtuo diha sa ilang mga panimalay, pagpundok sa nagkatibulaag nga Israel sa duha ka habig sa tabil, ug pagpanalangin sa natugahan nga mga miyembro diha sa sagrado nga mga ordinansa sa templo.

Sa dihang ang importanting mga kausaban sa pagpanalangin sa atong mga panimalay gipahibalo niadtong Oktubre 2018 nga kinatibuk-ang komperensya, nagpamatuod ko “nga sa mga deliberasyon sa Konseho sa Unang Kapangulohan ug Korum sa Napulog Duha ka mga Apostoles didto sa templo, … human nangamuyo sa Ginoo ang atong minahal nga propeta alang sa pagpadayag … , usa ka gamhanang kumpirmasyon ang nadawat sa tanan.”¹³

Niana nga panahon, ang ubang pagpadayag kalabut sa sagrado nga mga ordinansa sa templo nadawat apan wala ipahibalo o i-implementar.¹⁴ Kini nga giya nagsugod sa indibidwal nga mapanagnaong pagpadayag ngadto ni Presidente Russell M. Nelson ug sa malumo ug kusganong kumpirmasyon ngadto niadtong miapil sa proseso. Si Presidente Nelson pihong milakip sa mga sister nga nangulo sa mga organisasyon sa Relief Society, Young Women, ug Primary. Ang katapusang giya, diha sa templo, ngadto sa Unang Kapangulohan ug sa Korum sa Napulog Duha ka mga Apostoles hilabihan ka espirituhanon ug kusganon. Matag usa kanamo nasayud nga among nadawat ang hunahuna, kabubut-on, ug tingog sa Ginoo.¹⁵

Ako modeklarar sa tumang kaligdong nga ang nagpadayon nga pagpadayag nadawat ug gidawat pa pinaagi sa mga pamaagi nga giestablisar sa Ginoo. Ako mopamatuod nga ang bag-ong pamahayag nga gihatag ni Presidente Nelson karong buntaga usa ka pagpadayag nga mopanalangin sa tanang tawo.

Among Dapiton ang Tanan sa Pagbusog diha sa Lamesa sa Ginoo

Kami usab mopahayag sa among kinasingkasing nga tinguha nga mahiusa pag-usab niadtong nanglimbasug sa ilang mga pagpamatuod, dili na kaayo aktibo, o gipatangtang ang ilang mga ngalan sa mga rekord sa Simbahan. Kami nagtinguha nga magpakabusog uban ninyo “sa mga pulong ni Kristo” diha sa lamesa sa Ginoo, aron makat-on sa mga butang nga kinahanglang buhaton natong tanan.¹⁶ Nagkinahanglan kami kaninyo! Ang Simbahan nagkinahanglan kaninyo! Ang Ginoo nagkinahanglan kaninyo! Among kinasingkasing nga pag-ampo nga moapil kamo kanamo sa pagsimba sa Manluluwas sa kalibutan. Kami nasayud nga ang pipila kaninyo tingali nakasinati og pagkasilo, pagpanglupig, o ubang binuhatan nga dili Kristohanon. Kami usab nasayud nga ang pipila adunay mga hagit sa ilang pagtuo nga tingali wala sa hingpit mamatnguni, masabti, o maresolbar.

Ang pipila sa atong labing lig-on ug matinud-anon nga mga miyembro nag-antus og hagit sa ilang pagtuo sulod sa usa ka panahon. Ganahan ko sa tinuod nga istorya ni W. W. Phelps, kinsa misalikway sa Simbahan ug mipamatuod batok ni Propeta Joseph Smith sa usa ka korte sa Missouri. Human maghinulsol, misulat siya ngadto ni Joseph, “Nasayud ako sa akong sitwasyon, nasayud kamo niini, ug ang Dios nasayud niini, ug gusto ko nga maluwas kon ang akong mga higala motabang kanako.”¹⁷ Si Joseph mipasaylo kaniya, mipatrabaho kaniya og balik, ug mapinanggaong misulat, “Managhigala sa sinugdanan mga higala pag-usab sa katapusan.”¹⁸

Mga kaigsoonan, bisan unsa pa ang inyong sitwasyon, palihug hibaloi nga ang Simbahan ug mga miyembro niini mohangup kaninyo og balik!

Personal nga Pagpadayag nga Mogiya sa Atong Kinabuhi

Ang personal nga pagpadayag maanaa sa tanan kinsa mapaubsanong magtinguha og giya gikan sa Ginoo. Kini sama kaimportante sa pagpadayag nga nadawat pinaagi sa propeta. Ang personal, espirituhanong pagpadayag gikan sa Espiritu Santo miresulta sa minilyon nga nakadawat og pagpamatuod nga gikinahanglan aron mabunyagan ug makumpirmahan nga mga miyembro sa Ang Simbahan ni Jesukristo sa mga Santos sa Ulahing mga Adlaw.

Ang personal nga pagpadayag mao ang dakong panalangin nga madawat human sa bunyag sa dihang kita “pagasantoson pinaagi sa pagdawat sa Espiritu Santo.”¹⁹ Akong mahinumduman ang usa ka espesyal nga espirituhanong pagpadayag sa dihang 15 anyos pa ako. Ang akong minahal nga igsoong lalaki nagtinguha og giya gikan sa Ginoo kon unsaon sa pagtubag ang among pinanggang amahan, kinsa dili gusto nga magmisyon ang akong igsoon. Ako usab nag-ampo sa kinasingkasing ug nakadawat og personal nga pagpadayag sa kamatuoran sa ebanghelyo.

Ang Tahas sa Espiritu Santo

Ang personal nga pagpadayag nakabase sa espirituhanon nga mga kamatuoran nga nadawat gikan sa Espiritu Santo.²⁰ Ang Espiritu Santo mao ang tigpadayag ug tigpamatuod sa tanang kamatuoran, ilabi na sa Manluluwas. Kon wala ang Espiritu Santo, kita dili gayud masayud nga si Jesus mao ang Kristo. Ang Iyang importanting tahas mao ang pagsaksi mahitungod sa Amahan ug sa Anak ug sa Ilang mga titulo ug sa Ilang himaya.

Ang Espiritu Santo makaimpluwensya sa tanan sa gamhanang paagi.²¹ Kini nga impluwensya dili magpadayon gawas kon ang tawo mabunyagan ug makadawat sa gasa sa Espiritu Santo. Ang Espiritu Santo nagsilbi usab nga makalimpyong gahum sa proseso sa paghinulsol ug kapasayloan.

Ang Espiritu mopahayag sa talagsaon nga mga paagi. Ang Ginoo migamit niining maanindot nga paghulagway:

“Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing.

“Karon, tan-awa, kini mao ang espiritu sa pagpadayag.”²²

Bisan kon ang impluwensya niini hilabihan ka gamhanan, kasagaran nga moabut kini sa ligdong, hinagawhaw nga tingog.²³ Ang mga kasulatan naglakip og daghang ehemplo kon sa unsang paagi ang Espiritu mo-impluwensya sa atong hunahuna, lakip ang pagpamulong og kalinaw sa atong hunahuna,²⁴ pag-okupar sa atong hunahuna,²⁵ paglamdag sa atong hunahuna,²⁶ ug gani pagpadala og tingog sa atong hunahuna.²⁷

Ang pipila ka baruganan nga nag-andam kanato sa pagdawat og pagpadayag naglakip sa:

Pag-ampo alang sa espirituhanong giya. Sa matinahuron ug mapaubsanong paagi kita kinahanglang magtinguha ug mangayo²⁸ ug magmapailubon ug manunuton.²⁹
Pagpangandam alang sa inspirasyon. Kini nagkinahanglan nga nahiuyon kita sa mga pagtulun-an sa Ginoo ug nagsunod sa Iyang mga sugo.
Takus nga pag-ambit sa sakramento. Kon ato kining buhaton, kita mosaksi ug mopakigsaad sa Dios nga kita modala diha sa atong kaugalingon sa ngalan sa Iyang balaang Anak ug nga kita mohinumdom Kaniya ug mosunod sa Iyang mga sugo.

Kini nga mga baruganan nag-andam kanato sa pagdawat, pag-ila, ug pagsunod sa aghat ug giya sa Espiritu Santo. Kini naglakip sa “malinawon nga mga butang … nga nagdala og hingpit nga kalipay [ug] … kinabuhi nga dayon.”³⁰

Ang atong espirituhanong pagpangandam mapalambo pag-ayo kon kanunay kitang magtuon sa mga kasulatan ug mga kamatuoran sa ebanghelyo ug mamalandong diha sa atong hunahuna sa giya nga atong gitinguha. Apan hinumdumi nga magmapailubon ug mosalig sa panahon sa Ginoo. Ang giya ihatag sa Ginoo nga nahibalo sa tanan kon Siya “tuyo nga motudlo kanato.”³¹

Pagpadayag diha sa Atong mga Calling ug mga Buluhaton

Ang Espiritu Santo mohatag usab og pagpadayag diha sa atong mga calling ug mga buluhaton. Sa akong kasinatian, ang mahinungdanong espirituhanong giya kasagarang moabut kon maningkamot kita sa pagpanalangin sa uban diha sa pagtuman sa atong mga responsibilidad.

Makahinumdom ko isip batan-ong bishop nga nakadawat og desperadong tawag gikan sa usa ka magtiayon sa hapit na ko mosakay og eroplano alang sa usa ka sabut sa negosyo. Nangamuyo ko sa Ginoo sa wala pa sila moabut aron masayud unsaon nako sa pagpanalangin kanila. Gipadayag ngari nako ang matang sa problema ug ang tubag nga angay nakong ihatag. Kanang mapadayagong giya nagtugot kanako sa pagtuman sa sagradong mga responsibilidad sa akong calling isip bishop bisan pa sa kalimitado sa panahon. Ang mga bishop sa tibuok kalibutan adunay susama kanako nga mga matang sa mga kasinatian. Isip stake president, wala lamang ako makadawat og importanting pagpadayag apan nakadawat usab og personal nga pagkorihir nga gikinahanglan aron matuman ang mga katuyoan sa Ginoo.

Akong isiguro kaninyo nga ang mapadayagong giya mahimong madawat sa matag usa kanato samtang mapaubsaon kitang maghago diha sa ubasan sa Ginoo. Kadaghanan sa atong giya magagikan sa Espiritu Santo. Usahay ug alang sa pipila ka mga katuyoan, direkta kining magagikan sa Ginoo. Personal akong mopamatuod nga tinuod kana. Ang giya alang sa Simbahan, sa kinatibuk-an, moabut diha sa Presidente ug propeta sa Simbahan.

Kami, isip moderno nga mga Apostoles, adunay pribilehiyo nga makatrabaho ug makauban sa pagbiyahe ang atong propeta karon, si Presidente Nelson. Akong lahion pagsulti ang giingon ni Wilford Woodruff mahitungod ni Propeta Joseph Smith; masulti usab kini ngadto ni Presidente Nelson. Akong nakita ang “mga gibuhat sa Espiritu sa Dios uban kaniya, ug sa mga pagpadayag ni Jesukristo ngadto kaniya ug ang katumanan niadto nga mga pagpadayag.”³²

Ang akong mapaubsanong pangamuyo karon mao nga ang matag usa kanato magtinguha sa nagpadayong pagpadayag nga mogiya sa atong kinabuhi ug mosunod sa Espiritu samtang mosimba kita sa Dios nga Amahan sa ngalan sa atong Manluluwas, si Jesukristo, kang kinsa ako mosaksi sa ngalan ni Jesukristo, amen.