Ang Gahum sa Basahon ni Mormon sa Pagkakabig

Ni Elder Benjamin M. Z. Tai

Sa Seventy

Ang Basahon ni Mormon naghatag og espirituhanong nutrisyon, nagresita og plano sa buhatunon, ug nagkonektar kanato sa Balaang Espiritu.

Human maribyu ang report gikan sa bag-o lang nga pisikal nga paghiling, akong nakat-unan nga kinahanglan nakong mohimo og mga kausaban sa paagi sa pagpakabuhi. Aron sa pagtabang nako, ang akong doktor miresita og plano sa nutrisyon ug ehersisyo, nga, kon mopili ko nga sundon kini, mousab nako ngadto sa mas himsog nga tawo.

Kon ang matag usa kanato mosinati og espiritwal nga paghiling, unsa kaha ang atong makat-unan mahitungod sa atong kaugalingon? Unsa kaha nga mga kausaban ang iresita sa atong espiritwal nga magtatambal? Aron mahimo kita kon kinsa kita angay nga mahimo, importante nga mahibalo kita unsay buhaton ug buhaton unsay atong nahibaloan.

Si Jesukristo mao ang Batid nga Magtatambal.¹ Pinaagi sa Iyang Pag-ula, mobugkos Siya sa atong mga samad, modala diha Kaniya sa atong mga kahuyang, ug moayo sa atong nadugmok nga kasingkasing.² Pinaagi sa Iyang grasya ang atong kahuyang mamahimong lig-on.³ Siya nagdapit kanato sa pagsunod Kaniya⁴ pinaagi sa pagkat-on mahitungod Kaniya, pagpaminaw sa Iyang mga pulong, ug paglakaw diha sa kaaghup sa Iyang Espiritu.⁵ Siya misaad nga motabang kanato⁶ niining tibuok kinabuhi nga proseso sa pagkakabig, nga mousab kanato ug magdala og walay katapusang kalipay.⁷

Ang Manluluwas mihatag kanato sa Basahon ni Mormon isip gamhanang himan nga motabang sa pagkakabig. Ang Basahon ni Mormon naghatag og espirituhanong nutrisyon, nagresita og plano sa buhatunon, ug nagkonektar kanato sa Balaang Espiritu. Gisulat alang kanato,⁸ naglangkob kini sa pulong sa Dios diha sa kayano⁹ ug nagsulti kanato sa atong pagkatawo, katuyoan, ug padulngan.¹⁰ Kauban sa Biblia, ang Basahon ni Mormon nagpamatuod kang Jesukristo¹¹ ug nagtudlo unsaon nato sa pagkasayud sa kamatuoran ug mahimong sama Kaniya.

Si Brother Saw Polo 58 anyos sa dihang gipaila siya sa gipahiuli nga ebanghelyo ni Jesukristo. Sa dihang nahimamat nako siya, nagserbisyo siya isip presidente sa branch sulod sa daghang katuigan, apan akong nasayran nga wala pa gayud siya makabasa sa Basahon ni Mormon tungod kay wala pa kini sa iyang lumad nga pinulongang Burmese. Sa dihang nangutana ko niya giunsa niya pagkasayud nga ang libro tinuod bisan wala pa makabasa niini, mitubag siya nga natun-an niya ang hulagway nga libro sa Mga Sugilanon sa Basahon ni Mormon kada adlaw pinaagi sa pagtan-aw sa mga paghulagway, paggamit og diksyonaryo sa paghubad sa Iningles nga mga pulong, ug mainampingong paghimo og mugbong sulat sa unsay iyang nakat-unan. Siya mipasabut, “Matag higayon nga nagtuon ko, mag-ampo ko kalabut sa unsay akong nakat-unan, ug mobati ko og kalinaw ug kalipay, matin-aw ang akong hunahuna, ug ang akong kasingkasing mahumok. Akong gibati ang Espiritu Santo nga nagmatuod kanako nga tinuod kini. Ako nasayud nga ang Basahon ni Mormon pulong sa Dios.”

Sama ni Brother Saw Polo, ang matag usa kanato makatuon sa Basahon ni Mormon sumala sa atong mga kahimtang. Samtang magtinguha kita nga motuo ug mamalandong sa mga pagtulun-an niini diha sa atong mga kasingkasing, kita makapangutana sa Dios uban sa pagtuo kon ang mga pagtulun-an tinuod.¹² Kon kita sinsero sa atong tinguha nga masayud ug dunay tinuod nga katuyoan nga mobuhat, Siya motubag kanato diha sa atong mga kasingkasing pinaagi sa Espiritu Santo. Kini pinaagi sa gahum sa Espiritu Santo nga kita mahimo nga masayud sa kamatuoran sa tanan nga mga butang.¹³ Kon makaangkon kita og balaanong pagpamatuod sa Basahon ni Mormon, kita usab masayud pinaagi sa samang gahum nga si Jesukristo mao ang Manluluwas sa kalibutan, nga si Joseph Smith Iyang propeta, ug nga Ang Simbahan ni Jesukristo sa mga Santos sa Ulahing mga Adlaw mao ang Iyang gipahiuli nga Simbahan.¹⁴

Isip batan-on pa nga nagsugod sa akong misyonaryo nga pagserbisyo, misakay ko og eroplano padulong sa Australia. Mibati nga nag-inusara, nabalaka, ug dili angayan apan mapasaligon nga moserbisyo, nanginahanglan gyud ko og kasiguroan nga ang akong gituohan tinuod. Matinud-anon akong nag-ampo ug nagbasa sa akong mga kasulatan, apan sa pagpadayon sa paglupad, migrabe ang akong pagduha-duha ug migrabe ang akong pisikal nga kondisyon. Human ko nanlimbasug sulod sa pipila ka oras, usa ka flight attendant milakaw sa agianan ug mihunong tupad sa akong lingkuranan. Iyang gikuha ang Basahon ni Mormon nga akong gibasa gikan sa akong mga kamot. Siya mitan-aw sa hapin ug miingon, “Nindot kana nga libro!” dayon gitunol og balik ang basahon kanako ug mipadayon sa paglakaw. Wala na ko kakita niya pag-usab.

Samtang naghunahuna ko sa iyang mga pulong, tataw nakong nadungog ug nabati sa akong kasingkasing ang, “Ania Ako, ug nasayud Ako kon asa ka. Buhata lang ang imong labing maayo, kay Ako na ang bahala sa tanan.” Niana nga eroplano ibabaw sa Kadagatan sa Pasipiko, nakadawat ko og personal nga pagsaksi pinaagi sa akong pagtuon sa Basahon ni Mormon ug sa mga pag-aghat sa Espiritu Santo nga ang akong Manluluwas nasayud kon si kinsa ako ug nga ang ebanghelyo tinuod.

Si Elder David A. Bednar mitudlo: “Ang pagkasayud nga ang ebanghelyo tinuod mao ang kahulugan sa pagpamatuod. Ang padayon nga magmatinuoron sa ebanghelyo mao ang kahulugan sa pagkakabig.”¹⁵ Ang pagkakabig nagkinahanglan kanato nga mahimong “[tigtuman sa] pulong, ug dili kay magpaminaw ra.”¹⁶ Ang plano sa buhatunon sa Ginoo alang kanato—ang doktrina ni Kristo—labing klaro nga gitudlo diha sa Basahon ni Mormon.¹⁷ Kini naglakip sa:

Una, pagpakita og hugot nga pagtuo kang Jesukristo pinaagi sa pagsalig Kaniya, pagsunod sa Iyang mga sugo, ug pagkasayud nga Siya motabang kanato.¹⁸
Ikaduha, paghinulsol matag adlaw sa atong mga sayop ug pagsinati og hingpit nga kalipay ug kalinaw kon Siya mopasaylo kanato.¹⁹ Ang paghinulsol nagkinahanglan kanato sa pagpasaylo sa uban²⁰ ug nagtabang kanato nga mopadayon sa unahan. Ang Manluluwas misaad nga mopasaylo kanato kutob nga kita maghinulsol.²¹
Ikatulo, paghimo ug pagtuman sa mga pakigsaad ngadto sa Dios pinaagi sa mga ordinansa sama sa bunyag. Kini magpabilin kanato diha sa dalan sa pakigsaad padulong Kaniya.²²
Ikaupat, pagdawat sa gasa sa Espiritu Santo. Kini nga gasa nagtugot kanato sa kanunay nga pakig-uban sa usa kinsa mobalaan, mohupay, ug mogiya kanato.²³
Ikalima, paglahutay hangtud sa katapusan pinaagi sa makanunayong pagpadayon samtang magbusog matag adlaw diha sa pulong ni Kristo.²⁴ Pinaagi sa pagbusog gikan sa Basahon ni Mormon ug hugtanong pagsunod sa mga pagtulun-an niini, atong mabuntog ang mga tintasyon ug makadawat og giya ug proteksyon sa tibuok natong kinabuhi.²⁵

Pinaagi sa makanunayong paggamit sa doktrina ni Kristo sa atong kinabuhi, atong mabuntog ang pagkaluya nga mobabag sa kausaban ug kahadlok nga mopugong sa paglihok. Makadawat kita og personal nga pagpadayag, kay ang Espiritu Santo “mopakita nganha kaninyo sa tanan nga mga butang nga kinahanglan inyong buhaton,”²⁶ ug “ang mga pulong ni Kristo magtug-an kaninyo sa tanan nga mga butang nga inyong buhaton.”²⁷

Sulod sa 20 ka tuig, si Brother Huang Juncong nanlimbasug sa ilimnong makahubog, sigarilyo, ug dili mapugngang pagsugal. Sa dihang gipaila kang Jesukristo ug sa Iyang gipahiuli nga ebanghelyo, si Brother Huang nagtinguha og kausaban alang sa kaayohan sa iyang batan-ong pamilya. Ang iyang labing dakong hagit mao ang pagpanabako. Walay puas ang pagpanigarilyo, kadaghan na siyang napakyas sa pagsulay nga moundang. Usa ka adlaw kini nga mga pulong gikan sa Basahon ni Mormon misulod sa iyang hunahuna: “kinasingkasing, uban sa tinuod nga katuyoan.”²⁸ Bisan og pakyas ang milabay nga mga paningkamot, gibati niya nga tingali mahimo siyang mausab uban sa tabang sa Langitnong Amahan ug ni Jesukristo.

Ang full-time nga mga misyonaryo mihiusa sa ilang pagtuo uban kaniya ug mihatag og plano sa mga yanong stratehiya, uban sa bug-os nga pag-ampo ug pagtuon sa pulong sa Dios. Uban sa kinasingkasing ug tinuod nga katuyoan, si Brother Huang milihok nga may matinud-anong determinasyon ug nakakaplag nga kon mas nakatutok siya sa bag-ong mga gawi nga gusto niyang mapalambo, sama sa pagtuon sa Basahon ni Mormon, maminosan ang iyang pagtutok sa mga gawi nga gusto niyang wagtangon.

Mihinumdom sa iyang kasinatian 15 ka tuig na ang milabay, siya miingon, “Wala ko kahinumdom kon kanus-a gyud ko mihunong sa pagpanigarilyo, apan samtang naningkamot ko pag-ayo kada adlaw sa pagbuhat sa mga butang nga kinahanglan nakong buhaton aron madapit ang Espiritu sa Ginoo sa akong kinabuhi ug padayon nga mobuhat niini, dili na ako madani sa sigarilyo ug wala na gayud sukad.” Pinaagi sa paggamit sa mga pagtulun-an sa Basahon ni Mormon, ang kinabuhi ni Brother Huang nausab, ug nahimo siya nga mas maayong bana ug amahan.

Si Presidente Russell M. Nelson misaad: “Kon mainampuon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako nga kon mamalandong kamo sa unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi. Mosaad ako nga kon inyong isubsob kada adlaw ang inyong kaugalingon diha sa Basahon ni Mormon, mapanalipdan kamo batok sa mga dautan niining panahona, bisan ang grabing pagtakboy sa pornograpiya ug sa ubang matang sa adiksyon.”²⁹

Minahal nga mga higala, ang Basahon ni Mormon mao ang pulong sa Dios, ug kita mas mapaduol Kaniya kon tun-an nato kini.³⁰ Samtang atong sulayan ang mga pulong niini, makaangkon kita og saksi sa katinuod niini.³¹ Samtang padayon kita nga magpuyo sumala sa mga pagtulun-an niini, wala na kitay “tinguha nga mobuhat og dautan.”³² Ang atong kasingkasing, panagway, ug kinaiya mausab aron mahimong mas sama sa Manluluwas.³³ Akong ipaambit ang akong siguradong pagsaksi nga si Jesus mao ang Kristo, atong Manluluwas, Manunubos, ug Higala. Sa ngalan ni Jesukristo, amen.