Elder Adeyinka A. Ojediran

General Authority Seventy

Ang Abril 2020 nga kinatibuk-ang komperensya maoy “usa ka dili makalimtan nga hinapos sa semana” alang ni Elder Adeyinka A. Ojediran.

Ang kinabig sa Simbahan gipaluyohan isip General Authority Seventy—pinakauna alang sa usa ka Nigerian ug West African nga Santos sa Ulahing mga Adlaw. Ang iyang naghingapin nga pasalamat ug kalipay nadugangan pa sa dihang si Presidente Russell M. Nelson mipahibalo nga ang ikatulo nga templo sa Nigeria pagatukuron diha sa Benin City.

“Wala ko magdahum niana,” miingon si Elder Ojediran, nga mipahiyum pag-ayo. “Ang pagkadungog sa atong propeta nga misulti nga laing templo ang pagatukuron diha sa Nigeria nindot gayud kaayo. Alang kanako, kumpirmasyon kini nga ang buhat sa Ginoo paspas nga naglihok. Kitang tanan adunay daghang buhaton aron maandam ang mga anak sa Dios alang sa Ikaduhang Pag-anhi sa Iyang Anak.”

Natawo sa Ibadan, Nigeria, niadtong Abril 5, 1967, ngadto kang Amos Adeniyi ug Caroline Anike Ojediran, si Adeyinka Ayodeji Ojediran nakadawat og bachelor‘s degree sa botany sa University of Ilorin niadtong 1991 diin pagkahuman nakaangkon og master’s of business administration degree gikan sa Ladoke Akintola University of Technology. Misugod siya og panarbaho sa finance ug business administration isip propesyonal nga chartered accountant. Nagtrabaho siya isip business finance manager sa Shell Nigeria sa wala pa ang iyang tawag isip General Authority.

Tulo ka tuig human sa iyang bunyag, iyang nahimamat si Olufunmilayo Omolola Akinbebije sa usa ka sosyal nga kalihokan. Ang duha sa wala madugay misugod sa pagpakig-date, apan ang pagpanarbaho sa lain-laing mga siyudad nagpasabut nga “magka-istorya lang kami pinaagi sa telepono.”

Ang magtiayon sa katapusan naminyo sa Nigeria niadtong 1998 ug nasilyo sa Johannesburg South Africa Temple niadtong Nobyembre 14, 2002. Ang mga Ojediran adunay usa ka anak nga babaye.

Si Elder Ojediran mapasalamaton kaayo sa matag calling sa Simbahan nga iyang nadawat sukad nga mipasakop sa Simbahan niadtong 1990 sa dihang 23 anyos pa siya. Ang matag eklesyastikanhong buluhaton nakatabang kaniya sa pag-uswag ug nakahatag kaniya og sagrado nga mga oportunidad sa pagtabang sa uban nga molambo diha sa ilang tagsa-tagsa ka mga calling ug mga katungdanan.

Si Elder Ojediran, nagserbisyo isip Area Seventy sa panahon sa iyang pagkatawag, nakaserbisyo usab isip magtatambag sa kapangulohan sa misyon, presidente sa stake, magtatambag sa kapangulohan sa stake, bishop, magtatambag sa bishopric, ug presidente sa branch.