Bradley R. Wilcox

Ikaduhang Magtatambag sa Kinatibuk-ang Kapangulohan sa Young Men

Samtang miapil sa usa ka komperensya sa kabatan-onan sa California, si Brother Bradley (Brad) R. Wilcox nakahimamat og batan-ong lalaki kinsa dili gusto nga maanaa didto. Gikuyogan niya ang tin-edyer ubos sa malandong nga kahoy, ug sa wala madugay naghisgot na sila sa paboritong hilisgutan sa batan-on—skateboarding.

Si Brother Wilcox mihangyo sa batan-on sa pagpakita kaniya og pipila ka lihok sa skateboarding. Nakadayeg, gidapit niya ang batan-on nga mohimo og demonstrasyon sa skateboarding sa Especially for Youth niana nga ting-init. Ang batan-ong lalaki mibalibad apan sa katapusan miuyon. Sa EFY, nakaangkon siya og kasinatian nga nakapausab sa kinabuhi ug nakaplagan ang iyang pagpamatuod sa ebanghelyo.

“Miadto siya sa EFY tungod sa skateboard, apan mibiya siya isip usa ka misyonaryo,” miingon si Brother Wilcox.

“Akong gigahin ang akong kinabuhi uban sa kabataan ug mga tin-edyer,” miingon si Brother Wilcox, “ug gimahal nako ang kabatan-onan.”

Si Bradley Ray Wilcox natawo sa Provo, Utah, USA, niadtong Disyembre 25, 1959, ngadto kang Ray T. Wilcox ug Val C. Wilcox. Nagdako siya sa Provo gawas sa iyang paggahin og pipila ka tuig sa pagkabata didto sa Ethiopia.

Human miserbisyo og full-time nga misyon sa Chile Viña del Mar Mission, si Brother Wilcox naminyo kang Deborah Gunnell sa Provo Utah Temple niadtong Oktubre 7, 1982. Mga ginikanan sila sa lima ka anak.

Si Brother Wilcox nakadawat sa iyang bachelor’s ug master‘s degree gikan sa Brigham Young University ug sa iyang doctorate sa edukasyon gikan sa University of Wyoming. Si Brother Wilcox napasidunggan og pipila ka ganti tungod sa iyang buhat sa edukasyon, migahin og sobra sa 30 ka tuig sa Especially for Youth nga programa sa BYU, ug ganahan nga mahimong usa ka instruktor sa Campus Education Week.

Si Brother Wilcox ug ang iyang pamilya nakapuyo sa New Zealand ug Spain samtang midumala siya og mga study abroad program alang sa BYU. Nakasulat siya og pipila ka mga libro ug karon usa ka propesor sa Department of Ancient Scripture sa BYU.

Si Brother Wilcox nakaserbisyo isip presidente sa Chile Santiago East Mission ug isip usa ka sakop sa general board sa Sunday School, magtatambag sa kapangulohan sa stake, ug bishop sa usa ka ward sa mga young single adult. Sa panahon sa iyang pagkatawag, nagserbisyo siya isip high councilor ug isip presidente sa Young Men sa stake.