Pagpaambit sa Mensahe sa Pagpahiuli ug sa Pagkabanhaw
Ang Pagpahiuli iya sa kalibutan, ug ang mensahe niini labihan ka dinalian karon.
Sa tibuok niining kinatibuk-ang komperensya naghisgut kita ug nanganta uban sa hingpit nga kalipay mahitungod sa katumanan sa dugay na nga gipanagna nga “pagtuman na sa tanan,”1 mahitungod sa pagpahinabo sa “laraw sa paghiusa diha kang Kristo sa tanang mga butang,”2 mahitungod sa pagbalik sa kahingpitan sa ebanghelyo, pagkapari, ug sa Simbahan ni Jesukristo dinhi sa yuta, tanan niini atong gisulod sa ulohan nga “ang Pagpahiuli.”
Apan ang Pagpahiuli dili lamang alang kanato kinsa nagmaya karon. Ang mga pagpadayag bahin sa Unang Panan-awon dili lamang alang kang Joseph Smith apan gitanyag isip kahayag ug kamatuoran alang ni bisan kinsa nga “nakulangan og kaalam.”3 Ang Basahon ni Mormon iya sa katawhan. Ang mga ordinansa sa pagkapari alang sa kaluwasan ug kahimayaan giandam alang sa matag indibidwal, lakip na niadtong wala na magpuyo sa mortalidad. Ang Simbahan ni Jesukristo sa mga Santos sa Ulahing mga Adlaw ug ang mga panalangin niini gitumong alang sa tanang gusto niini. Ang gasa sa Espiritu Santo gituyo alang sa tanan. Ang Pagpahiuli iya sa kalibutan, ug ang mensahe niini labihan ka dinalian karon.
“Busa, unsa ka dako ang pagkamahinungdanon sa paghimo niini nga mga butang nga masayran ngadto sa mga lumulupyo sa yuta, aron sila masayud nga walay tawo nga makapuyo nga buhi atubangan sa Dios, gawas pinaagi sa mga maayo nga buhat, kalooy, ug grasya sa Balaang Mesiyas, kinsa mitugyan sa iyang kinabuhi sumala sa unod, ug gikuha pag-usab pinaagi sa gahum sa Espiritu, nga siya unta makapahinabo sa pagkabanhaw sa mga patay.”4
Gikan sa adlaw nga ang igsoon sa Propeta nga si Samuel Smith, mipuno sa iyang kartera [satchel] sa bag-o pa lang naimprinta nga mga kopya sa Basahon ni Mormon ug nagsugod sa paglakaw aron mopaambit sa bag-ong kasulatan, ang mga Santos nagtrabaho nga walay paghunong “sa paghimo niini nga mga butang nga masayran ngadto sa mga lumulupyo sa yuta.”
Niadtong 1920, si Elder David O. McKay nianang higayuna sa Korum sa Napulog Duha ka mga Apostoles nagsugod og usa ka tuig nga paglibut sa mga misyon sa Simbahan. Pagka-Mayo 1921, nagbarug siya sa usa ka gamay nga sementeryo didto sa Fagali’i, Samoa, atubangan sa maayo pagkaatiman nga mga lubnganan sa tulo ka gagmayng mga bata, ang anak nga babaye ug duha ka anak nga lalaki nila ni Thomas ug Sarah Hilton. Kining gagmayng mga bata—ang kinamagulangan dos anyos—namatay atol sa panahon nga sila si Thomas ug Sarah nagserbisyo isip batan-ong magtiayon nga misyonaryo sa ulahing bahin sa mga 1800.
Sa wala pa siya mobiya sa Utah, si Elder McKay misaad kang Sarah, nga karon usa na ka biyuda, nga iyang bisitahan ang mga lubnganan sa iyang mga anak didto sa Samoa kay wala pa gayud siya makabalik didto. Si Elder McKay misulat ngadto kaniya, “Ang imong gagmay nga mga anak, Sister Hilton, bisan sa kamingaw nakaimpluwensya sa uban … mipadayon sa inyong halangdong misyonaryo nga buhat nga gisugdan dul-an sa traynta ka tuig na ang milabay.” Dayon midugang siya og usa ka bersikulo nga iyang hinimo:
Pinaagi sa mahigugmaong mga kamot gipiyung ang ilang mga mata,
Pinaagi sa mahigugmaong mga kamot gipahimutang ang ilang mga bukton ug tiil nga gagmay pa,
Pinaagi sa langyaw nga mga kamot nga sa ilang mga lubnganan miadorno,
Pinaagi sa mga estranghero nga mipasidungog ug mipahisubo.5
Kini nga istorya usa lamang sa liboan, gatusan ka liboan, nga naghisgot bahin sa panahon, bahandi, ug mga kinabuhi nga gisakripisyo sobra sa miaging 200 ka tuig sa pagpaambit sa mensahe sa Pagpahiuli. Ang atong pangandoy nga maabut ang matag nasud, kaliwat, pinulongan, ug katawhan wala makuhai karon, sigun sa gisaksihan sa sobra sa liboan ka batan-ong mga lalaki, mga babaye, ug mga managtiayon nga kasamtangang nagserbisyo ubos sa full-time nga mga tawag sa misyon; sa kinatibuk-an pinaagi sa mga miyembro sa Simbahan, nga mipalanog sa pagdapit ni Felipe nga moduol ug motan-aw;6 ug pinaagi sa minilyon ka dolyar nga gigasto kada tuig aron mapadayon kini nga paningkamot sa tibuok kalibutan.
Samtang ang atong mga pagdapit dili pinugsanay, nanghinaut kita nga ang mga tawo makakita niini nga madanihon. Aron mahitabo kana, nagtuo ko nga dili mominus sa tulo ka butang ang gikinahanglan: una, ang inyong gugma; ikaduha, ang inyong ehemplo; ug ikatulo, ang inyong paggamit sa Basahon ni Mormon.
Ang atong mga pagdapit dili butang alang sa kaugalingong interes; kondili, kinahanglan gayud kini nga usa ka pagpahayag sa dili hinakog nga gugma.7 Kini nga gugma, nga nailhan isip gugmang putli, ang tiunay nga gugma ni Kristo, ato lang kining pangayuon aron maangkon kini. Kita gidapit, gani gimanduan, sa “pag-ampo ngadto sa Amahan uban sa tibuok kusog sa kasingkasing, nga [kita] unta mapuno niini nga gugma.”8
Isip ehemplo, akong ipaambit ang kasinatian nga gisaysay ni Sister Lanett Ho Ching, kasamtangang nagserbisyo uban sa iyang bana, si Presidente Francis Ho Ching, kinsa nagdumala sa Samoa Apia Mission. Si Sister Ho Ching misaysay:
“Mga katuigan ang milabay, ang among bag-ong pamilya mibalhin sa usa ka gamay nga balay didto sa Laie, Hawaii. Ang grahian sa among balay gihimo nga usa ka studio apartment, diin nagpuyo ang usa ka lalaki nga ginganlan og Jonathan. Si Jonathan usa namo ka silingan sa laing dapit. Mibati nga morag dili kadto sulagma nga gipundok kami sa Ginoo, nakahukom kami nga mas mahimong dayag sa among mga kalihokan ug pagkamiyembro sa Simbahan. Si Jonathan nalingaw sa among panaghigalaay ug ganahan nga mogahin og panahon sa among pamilya. Siya ganahan nga makakat-on mahitungod sa ebanghelyo, apan dili siya interesado nga mopasalig ngadto sa Simbahan.
“Paglabay sa panahon, nahimo nang angga ni Jonathan ang ‘Tiyo Jonathan’ ngadto sa among mga anak. Samtang padayong nagkadako ang among pamilya, mao usab ang interes ni Jonathan sa mga panghitabo sa among kinabuhi. Ang among mga imbitasyon sa mga party sa holiday, mga birthday, mga kalihokan sa eskwelahan, ug mga kalihokan sa Simbahan milakip hangtud sa mga family home evening ug mga bunyag sa mga bata.
“Usa ka adlaw nakadawat ko og tawag sa telepono gikan ni Jonathan. Siya nagkinahanglan og tabang. Siya nag-antus og diabetes ug dunay grabe nga impeksyon sa tiil nga kinahanglang putlon. Ang among pamilya ug kasilinganang mga miyembro sa ward mitabang niya nianang panahon sa pagsulay. Kami nagpuli-puli sa ospital, ug mga panalangin sa pagkapari gitanyag. Samtang nagpaalim pa si Jonathan, uban sa tabang sa mga sister sa Relief Society, among gilimpyuhan ang iyang apartment. Ang mga kalalakin-an sa pagkapari mihimo og kanaugan sa iyang pwertahan ug kabatanan diha sa kasilyas. Sa dihang mipauli na si Jonathan sa balay, napuno siya sa emosyon.
“Si Jonathan nagsugod pag-usab sa mga leksyon sa misyonaryo. Sa semana sa wala pa ang Bag-ong Tuig, mitawag siya nako ug nangutana, ‘Unsay inyong buhaton sa Bisperas sa Bag-ong Tuig?’ Gipahinumduman nako siya sa among tinuig nga party. Apan hinoon, mitubag siya, ‘Gusto ko nga moanhi mo sa akong bunyag! Gusto nakong sugdan kining bag-ong tuig og sakto.’ Human sa 20 ka tuig nga ‘dali ug tan-awa ninyo,’ ‘dali ug tabang kamo,’ ug ‘dali ug pagpabilin,’ kining bililhong kalag andam na nga mabunyagan.
“Niadtong 2018, sa dihang gitawag kami nga mahimong presidente sa misyon ug kompanyon, nagkaluya na ang panglawas ni Jonathan. Gihangyo namo siya nga magpabiling lig-on nga maghulat sa among pagbalik. Nakalahutay siya sulod sa hapit usa ka tuig, apan giandam siya sa Ginoo nga mopauli na. Namatay siya nga malinawon niadtong Abril 2019. Ang akong mga anak nga babaye mitambong sa lubong sa ilang ‘Tiyo Jonathan’ ug mikanta sa sama nga awit nga among gikanta atol sa iyang bunyag.”
Ako mopaila og ikaduhang gikinahanglan alang sa malampusong pagpaambit sa mensahe sa Pagpahiuli pinaagi niining pangutana: unsay makapahimo sa inyong pagdapit nga madanihon sa usa ka tawo? Dili ba kamo man, ang ehemplo sa inyong kinabuhi? Daghan sa nakadungog ug nakadawat sa mensahe sa Pagpahiuli nagsugod sa pagkadani sa unsay ilang nakita diha sa usa ka miyembro o mga miyembro sa Simbahan ni Jesukristo. Kini tingali mao ang paagi sa ilang pagtratar sa uban, ang mga butang nga ilang gisulti o wala gisulti, ang pagkamakanunayon nga ilang gipakita sa lisud nga mga sitwasyon, o sa ilang panagway lang.9
Bisan unsa pa man kini, dili kita makaeskapo sa kamatuoran nga kinahanglan natong masabtan ug mosunod sa mga baruganan sa gipahiuli nga ebanghelyo kutob sa atong mahimo aron mahimong madanihon ang atong mga pagdapit. Kini ang butang nga gipasabut karon isip pagkatinuod [authenticity]. Kon ang gugma ni Kristo anaa kanato, ang uban masayud nga ang atong gugma alang kanila tinuod. Kon ang kahayag sa Espiritu Santo nagdilaab sa sulod kanato, modagkut kini sa Kahayag ni Kristo diha kanila.10 Kon unsa kamo mopakita sa pagkatinuod sa inyong pagdapit nga moduol aron makasinati sa hingpit nga kalipay sa kahingpitan sa ebanghelyo ni Jesukristo.
Ang ikatulong gikinahanglan mao ang kanunay nga paggamit sa instrumento sa pagkabig nga gitakda sa Ginoo alang niining katapusang dispensasyon sa ebanghelyo, ang Basahon ni Mormon. Kini ang makita nga ebidensya sa propetikanhong tawag ni Joseph Smith ug ang makapakumbinser nga ebidensya sa pagkabalaan ug Pagkabanhaw ni Jesukristo. Ang eksposisyon niini sa plano sa atong Langitnong Amahan bahin sa katubsanan dili hitupngan. Kon mopaambit kamo sa Basahon ni Mormon, mopaambit kamo sa Pagpahiuli.
Sa dihang tin-edyer pa si Jason Olsen, balik-balik siyang gipasidan-an sa mga sakop sa pamilya ug sa uban batok sa pagkahimong usa ka Kristiyano. Siya adunay duha ka buotang mga higala, hinoon, kinsa mga miyembro sa Ang Simbahan ni Jesukristo sa mga Santos sa Ulahing mga Adlaw, ug kanunay silang maghisgot bahin sa relihiyon. Ang iyang mga higala, sila si Shea ug Dave, matinahurong mitubag sa mga argumento nga gihatag sa uban ngadto ni Jason batok sa hugot nga pagtuo diha ni Jesukristo. Sa katapusan, gihatagan nila siya og kopya sa Basahon ni Mormon, nga nag-ingon, “Kini nga libro motubag sa imong mga pangutana. Palihug basaha kini.” Siya nagpanagana nga midawat sa libro ug gibutang kini sa iyang backpack, diin nagpabilin kini sulod sa pipila ka bulan. Siya dili gustong mobilin niini sa balay basin makit-an kini sa iyang pamilya, ug dili siya gustong masagmuyo silang Shea ug Dave pinaagi sa pag-uli niini. Sa katapusan, nakahukom siya sa solusyon nga sunugon ang libro.
Usa ka gabii, dala ang lighter sa usa ka kamot ug ang Basahon ni Mormon sa pikas, hapit na niya sunuga ang libro sa dihang nakadungog siya og tingog diha sa iyang hunahuna nga nag-ingon, “Ayaw sunuga ang akong libro.” Nahibulong, mihunong siya kadali. Dayon, naghunahuna nga iya ra tong gihunahuna ang tingog, gisulayan na usab niya pagpasiga ang lighter. Usab, ang tingog misantup sa iyang hunahuna: “Adto sa imong kwarto ug basaha ang akong libro.” Gipadaplin ni Jason ang lighter, mibalik sa iyang kwarto, miabli sa Basahon ni Mormon, ug nagsugod sa pagbasa. Nagpadayon siya kada adlaw, kasagaran hangtud sa sayong mga oras sa buntag. Sa pag-abut ni Jason sa katapusan ug nag-ampo, siya mirekord, “Napuno ko sa Espiritu gikan sa akong alimpulo hangtud sa mga tikod sa akong mga tiil. … Mibati ko nga napuno sa kahayag. … Kadto ang labing malipayon nga kasinatian sukad sa akong kinabuhi.” Siya nagtinguha nga mabunyagan ug sa wala madugay nahimo mismong usa ka misyonaryo.
Tingali dili na angayang isulti nga bisan pa man sa tinuod nga gugma ug sinseridad, daghan, kon dili man kasagaran, sa atong mga pagdapit nga mopaambit sa mensahe sa Pagpahiuli balibaran. Apan hinumdumi kini: ang tanan angayan sa maong pagdapit—“ang tanan managsama ngadto sa Dios”;11 ang Ginoo nahimuot sa matag paningkamot nga atong gibuhat, bisan unsa pa man ang resulta; ang usa ka gibalibaran nga pagdapit dili rason aron matapos ang atong panag-uban; ug ang kakulang sa interes karon mahimong usa ka interes ugma. Bisan unsa pa man, ang atong gugma magpabilin sa kanunay.
Dili gayud nato kalimtan nga ang Pagpahiuli miresulta sa hilabihan nga kalisud ug sakripisyo. Usa kana ka hilisgutan alang sa laing adlaw. Karon nagmaya kita sa mga bunga sa Pagpahiuli, usa sa labing molabaw nga butang mao ang gahum na usab sa pagbugkos dinhi sa yuta ug didto sa langit.12 Sigun sa gipahayag ni Presidente Gordon B. Hinckley, “Kon wala nay lain pang moresulta gikan sa tanang kaguol ug pagbudlay ug kasakit sa pagpahiuli kay sa gahum sa pagsilyo sa balaang pagkapari sa pagbugkos sa mga pamilya sa kahangturan, angay lamang kini sa tanang bugti niini.”13
Ang kinatas-ang saad sa Pagpahiuli mao ang katubsanan pinaagi ni Jesukristo. Ang Pagkabanhaw ni Jesukristo mao ang pamatuod nga Siya, sa pagkatinuod, adunay gahum nga motubos sa tanan nga moduol Kaniya—motubos kanila gikan sa kasub-anan, kawalay kaangayan, pagmahay, sala, ug bisan sa kamatayon. Karon Dominggo sa Lukay; usa ka semana gikan karon mao ang Pasko sa Pagkabanhaw. Atong hinumduman, ato kanunayng hinumduman, ang pag-antus ug kamatayon ni Kristo aron moula alang sa atong mga sala, ug atong saulugon kanang labing talagsaon sa mga Dominggo, ang adlaw sa Ginoo, diin mibangon Siya gikan sa pagkamatay. Tungod sa Pagkabanhaw ni Jesukristo, ang Pagpahiuli adunay kahulugan, ang atong mortal nga kinabuhi adunay kahulugan, ug sa katapusan ang ato mismong pagpakabuhi adunay kahulugan.
Si Joseph Smith, ang halangdong propeta sa Pagpahiuli, nagtanyag sa nag-unang pagpamatuod alang sa atong panahon bahin sa nabanhaw nga Kristo: “Nga siya buhi! Kay kami nakakita kaniya, gani diha sa tuo nga kilid sa Dios.”14 Mapainubsanon kong modugang sa akong pagsaksi ngadto sa pagsaksi ni Joseph ug sa tanang apostoles ug mga propeta nga nag-una kaniya ug sa tanang apostoles ug mga propeta nga misunod kaniya, nga si Jesus sa Nazaret mao ang gisaad nga Mesiyas, ang Bugtong Anak sa Dios, ug ang nabanhaw nga Manunubos sa tanang katawhan.
“Kami mopamatuod nga kadtong mainampuong magtuon sa mensahe sa Pagpahiuli ug molihok uban sa pagtuo mapanalanginan nga makaangkon og ilang kaugalingong pagsaksi sa kabalaan niini ug sa katuyoan niini sa pag-andam sa kalibutan alang sa gisaad nga Ikaduhang Pag-anhi sa atong Ginoo ug Manluluwas, si Jesukristo.”15 Ang Pagkabanhaw ni Kristo nakapasiguro sa Iyang mga saad. Sa ngalan ni Jesukristo, amen.