COVID-19: Mga Mensahe sa Paggiya, Pag-ayo, ug Paglaum
Ang mga miyembro mipamatuod nga nakakita sa impluwensya sa Ginoo bisan niining panahon sa kausaban, kabalaka, ug kadaut.
Uban Siya Kanako Kaniadto; Uban Siya Kanako Karon
Samtang naglingkod ko sa balay nga naningkamot sa pagpakalma sa akong kabalaka sa unsay nahitabo sa kalibutan, pinasulagma nakong giablihan ang akong journal ug nakita ang mosunod: “Adunay daghan kaayong kahadlok nga kauban sa pagbangon matag adlaw niining kalibutan, apan uban sa pagtuo diha sa mga pagtulun-an sa ebanghelyo, makauswag kita sa hinay-hinay. … Ang pagtuo kanunay nga makabuntog sa kahadlok.”
Nasayud ko nga nakadawat ako niana og gamhanang personal nga pagpadayag ug nga ang Langitnong Amahan mihatag niini kanako pinaagi sa akong kaugalingong mga sinulat sa journal nga nasulat pipila ka tuig na ang milabay. Napanalanginan ko og panahon sa kalinaw ug sa kahibalo nga ang Langitnong Amahan nag-uban kanako kaniadto, ug uban Siya kanako dinhi karon.
Danette Gray, Utah, USA
Ang Espiritu Santo Mahimong Molihok pinaagi sa Internet
Nadasig ko nga magsugod sa paghimo og mga klase sa seminary pinaagi sa mga group video chat. Duha ka adlaw sa wala pa ipaubos sa quarantine ang among siyudad, ang among klase mihimo sa unang leksyon niini pinaagi sa internet.
Pipila sa mga ginikanan miapil usab sa among klase, lakip niadtong dili mga miyembro. Akong gipugngan ang akong mga luha samtang dungan namong gitun-an ang Mosiah kapitulo 2. Kaming tanan mibati sa Espiritu samtang among nakat-unan nga ang pagserbisyo sa uban pagserbisyo usab sa Dios. Daghan ko og nakat-unan mahitungod sa pagdawat ug pag-ila og personal nga pagpadayag. Ang Espiritu Santo mopakita sa kamatuoran sa ebanghelyo sa daghang pamaagi. Bisan pa sa mga panghitabo sa kalibutan, walay makapugong sa buhat sa Langitnong Amahan alang sa kaluwasan sa Iyang mga anak sa pag-uswag.
Marites Pineda, Mindanao, Philippines
Wala Kami Makapalta bisan usa ka Adlaw sa Seminary
Bisan pa sa tanang nahitabo tungod sa coronavirus, malipayon ko nga mosulti nga wala kami makapalta bisan usa ka adlaw sa seminary! Ang pagtudlo sa akong mga klase pinaagi sa video chat mipresentar og pipila ka hagit, apan ganahan ko nga motan-aw sa mga ginikanan ug mga manghud nga maminaw sa among pag-istoryahanay. Ganahan ko nga nakahatag kini og pagbati sa pagkamakanunayon ug buluhaton sa among mga pamilya, ug ilabi na akong ganahan nga makapadayon kami sa pagsaksi ngadto sa usag usa mahitungod ni Jesukristo ug sa Iyang gugma alang kanato.
Mandi Crandell, Yigo, Guam
Pagserbisyo Niadtong anaa sa Duha ka Habig sa Tabil
Nagserbisyo ko isip senior nga sister nga misyonaryo sa Missouri Independence Mission sa dihang gikanselar ang mga miting sa Simbahan ug misugod kami sa paghiklin sa among kaugalingon diha sa among apartment. Gigamit namo ang among mga telepono ug computer aron makontak ang mga miyembro ug makig-istorya niadtong among gitabangan, kinsa dili kanunay motambong sa simbahan.
Aron dunay mabuhat, nakahukom ko nga motrabaho og family history, bisan og taud-taod na nga naglisud ko sa pagpangita og bag-o nga mga ngalan. Sa akong pag-log in sa FamilySearch, akong nakita ang usa ka pahibalo sa usa ka rekord nga naghulat nga i-attach. Kana nga rekord migiya kanako nga makakita og mga 70 ka tawo diha sa akong linya. Human sa lima ka adlaw, nahunong ang pagkaplag og bag-ong mga ngalan. Wala madugay nianang adlawa, among nasayran nga i-release kaming tanan aron makapauli. Naguol ko nga mobiya, apan mibati usab ko nga napanalanginan nga nakahimo ko sa pagserbisyo sa pamilya sa pikas habig sa tabil atol niining malisud nga panahon.
Kim Nielson, Oregon, USA
Paghimo sa Among Bahin aron Mapadayon ang Pag-uswag sa Buhat sa Ginoo
Samtang ang mga misyonaryo sa among dapit gitambagan nga magpabilin sa ilang mga apartment, naningkamot kami sa pagbuhat sa among bahin, midapit og usa ka higala nga magkat-on mahitungod sa Simbahan. Ang mga misyonaryo mipaambit sa ilang mga leksyon pinaagi sa telepono ngadto sa among higala. Among gibati ang kalig-on sa Espiritu sa among panimalay tungod sa teknolohiya nga anaa kanato karon. Nindot kaayo nga makita ang buhat sa Ginoo nga nagpadayon gihapon bisan pa sa tanang mga hagit sa kalibutan.
Elaina Reich, Washington, USA
Ang Manluluwas Nakadungog sa Among Pagkanta
Nagserbisyo ko isip usa ka Church-service missionary sa PathwayConnect nga programa sa Kyiv Ukraine stake. Ang mga lider sa programa nakahukom sa pagbansay kanamong tanan kinsa mangulo sa mga panagpundok sa mga tawo aron makapahigayon kami niini pinaagi sa internet. Pagkasunod gayud nga adlaw, ang gobyerno mipahibalo og pang-quarantine nga mga lagda diha sa Kyiv.
Ganahan ko sa oportunidad nga magkapundok alang sa PathwayConnect. Ug ganahan ko sa oportunidad nga magkapundok aron dungan nga mosimba ug manganta diha sa panimalay ma-Dominggo. Mapasalamaton ko sa kasiguroan nga kon ang duha o tulo magpundok diha sa Iyang ngalan, anaa Siya. Walay usa nga nasayud kon unsa ka dugay kami nga ma-quarantine sa Kyiv, apan nasayud kami nga ang Manluluwas makadungog sa among pagpanganta.
Kateryna Serdyuk, Kyiv, Ukraine
“Panahon na nga Kuhaon og Balik ang Imong Pamilya”
Sa dihang ang balita naghisgot mahitungod sa COVID-19, akong gibati nga nasobrahan ra kini og paukyab. Dayon paglabay sa mga adlaw, misugod ko sa pagbati og kabalaka ug gani nataranta mahitungod sa umaabut sa atong kalibutan.
Usa ka buntag dili ko makabalik sa pagkatulog ug milingkod nga namalandong kon alang sa unsa kining tanan. Dayon miabut ang kalinaw. Ang Espiritu mitudlo kanako nga ang Ginoo mihatag kanako og usa ka gasa. “Panahon na nga kuhaon og balik ang imong pamilya,” miingon Siya.
Ang kinabuhi mahimong okupado kaayo. Kini nga pandemic mihatag sa among pamilya sa oportunidad nga matutukan ang unsay importante: ang ebanghelyo ni Jesukristo. Makahimo ako sa pagtabon sa pipila niadtong makadaut nga mga impluwensya sa kalibutan ug tutokan ang pagtudlo sa akong mga anak sa pagtan-aw ngadto kang Kristo. Ang atong Amahan sa Langit kanunay nga naghunahuna kanato. Labaw ko kana nga gibati karon kay sa kaniadto.
Mary Ostler, Nebraska, USA
Ang Ginoo Miandam Kanato alang Niini
Sa dihang una ko nga gisultihan nga ang mga panagtigum sa Simbahan temporaryong gihunong, medyo naguol ko. Apan karon akong nakita kon sa unsang paagi ang Ginoo miandam kanato alang niini pinaagi sa Iyang mga propeta. Ang pagtuon sa ebanghelyo nga nakasentro sa panimalay makatabang kanato sa malisud nga mga panahon. Mapasalamaton ko nga makaambit gihapon ko sa sakramento ma-Dominggo ug maka-access sa mga pulong sa mga propeta. Makahupay ang masayud nga hangtud makahimo na usab kita sa pagpundok, atong mabati ang sama nga Espiritu.
Emma van As, Gauteng, South Africa
Gitudloan na Kita Unsaon sa Pagsimba
Samtang ang akong bana ug ako miapil sa ordinansa sa sakramento sa among panimalay sa unang higayon, kusganon nakong nabati ang Espiritu nga naglisud ko sa pagkanta sa himno nga among gipili. Sa akong sobra 70 ka tuig nga pagtambong sa atong mga tulumanon sa pagsimba, wala ko kahinumdom nga nagmapasalamaton pag-ayo sa mga panalangin nga among nadawat pinaagi sa among pagka-miyembro ug pag-apil sa Ang Simbahan ni Jesukristo sa mga Santos sa Ulahing mga Adlaw.
Gitudloan na kita unsaon sa pagsimba ug kinsa ang atong simbahon. Oo, mingawon kita nga makig-uban sa atong isig ka mga Santos ug malipay nga mobalik sa “normal” sa labing sayo nga mahimo, apan mapasalamaton ko sa mga leksyon nga kasamtangan natong nakat-unan samtang mosunod kita sa tambag sa propeta diha sa atong “nakasentro sa panimalay, gisuportahan sa Simbahan” nga pagsimba.
Susan Preator, Montana, USA
Pagkaplag og Kalinaw ug Paghiusa
Ang pagpahigayon og home evening maoy usa ka butang nga gikahinaman nako ug sa akong anak nga lalaki matag semana. Naanad na kami nga adunay mga miyembro, mga higala, ug mga misyonaryo nga mobisita sa among balay kanunay. Dayon grabe nga nausab ang mga butang tungod sa pandemic. Karon mopahigayon na kami og home evening uban sa among mga higala pinaagi sa telepono. Pinaagi niini nga panahon nga magkauban nakahimo kami og daghang butang nga mas nakapasuod kanamo.
Mapasalamaton kaayo ko alang sa atong minahal nga propeta, kinsa midapit kanatong tanan sa pagpuasa. Daghan kanato ang mibati sa gahum sa panaghiusa ug kalinaw pinaagi niana nga kasinatian. Sa mga panahon nga sama niini, ang kalinaw nga atong gikinahanglan moabut gikan sa Manluluwas nga si Jesukristo.
Roshene McKenzie, Kingston, Jamaica
Ang Dios Maoy Nagkontrolar
Nagsugod ko sa akong misyon duha ug tunga ka bulan lang ang milabay. Gi-assign ko nga moserbisyo sa Hermosillo, Mexico. Matag adlaw aduna koy oportunidad nga makahimamat og talagsaong mga tawo kinsa andam nga modawat sa gipahiuli nga ebanghelyo. Gibati nako nga nagsugod pa lang ko sa pagtuman sa akong katuyoan sa dihang ang COVID-19 mibalda sa akong misyon.
Sakit nga biyaan kadtong mga tawo nga gipangga nako pag-ayo, apan mibati usab ako og dakong kalinaw ug kasiguroan tungod kay ako nasayud nga ang Dios nagpabilin nga maoy nagkontrolar. Mapasalamaton ko nga kita adunay propeta ug mga Apostoles nga mogiya kanato niini nga panahon. Sama sa daghang mga misyonaryo sa kalibutan, masaligon ako nga dili kini ang katapusan sa akong misyon. Sa dili madugay makatabang na usab ako sa pagpadayon sa buhat sa Ginoo ug magpadayon sa pagkahimong himan diha sa Iyang mga kamot sa pagdala og daghang mga kalag ngadto sa paghinulsol.
Carolina Roman, Puerto Rico