Sa Kahiladman sa Atong Kasingkasing

Ni Douglas D. Holmes

Bag-ong Gi-release nga Unang Magtatambag sa Kinatibuk-ang Kapangulohan sa Young Men

Ang Ginoo nagsulay sa pagtabang kanato—tanan kanato—nga mas motuhop ang Iyang ebanghelyo sa kahiladman sa atong mga kasingkasing.

Mga kaigsoonan, pagkamahimayaon sa adlaw nga atong gipuy-an. Sa atong pagsaulog sa sinugdanan sa Pagpahiuli, angay usab nga saulogon ang padayon nga Pagpahiuli nga atong gisaksihan. Ako nagmaya uban kaninyo nga nabuhi niining panahona. ¹ Ang Ginoo padayon nga mipahimutang sa tanang gikinahanglan, pinaagi sa Iyang mga propeta, nga makatabang kanato aron maandam sa pagdawat Kaniya. ²

Usa nianang gikinahanglan nga mga butang mao ang bag-ong inisyatibo alang sa mga Kabataan ug Kabatan-onan. Daghan kaninyo ang pamilyar sa gihatagan og gibug-aton niini nga programa sa paghimo og mga tumong, bag-ong mga timailhan sa pagkahisakop, ug Alang sa Kalig-on sa mga Kabatan-onan nga mga komperensya. Apan dili gayud nato kini tugutan nga mobalda sa atong panabut bahin sa mga baruganan diin kini nga programa giestablisar ug sa katuyoan niini: pagtabang aron ang ebanghelyo ni Jesukristo motuhop sa kahiladman sa mga kasingkasing sa atong mga kabataan ug kabatan-onan. ³

Ako nagtuo nga kon mas klaro natong makita kini nga mga baruganan, maila nato kini nga mas labaw pa kay sa programa alang sa mga miyembro nga nag-edad og 8 hangtud sa 18. Atong makita giunsa sa Ginoo pagsulay sa pagtabang kanato —tanan kanato—nga mas motuhop ang ebanghelyo sa kahiladman sa atong mga kasingkasing. Ako nag-ampo nga ang Espiritu Santo motabang kanato nga mag-uban sa pagkat-on.

Mga Relasyon—”Pakig-uban Kanila” ⁴

Ang unang baruganan mao ang mga relasyon. Tungod kay natural kaayo kini nga bahin sa Simbahan ni Jesukristo, usahay makalimot kita sa kaimportante sa mga relasyon diha sa atong padayon nga panaw padulong ni Kristo. Wala laumi nga kita mangita o maglakaw diha sa dalan sa pagkigsaad nga mag-inusara. Kita nagkinahanglan og gugma ug suporta gikan sa mga ginikanan, ubang mga sakop sa pamilya, mga kahigalaan, ug mga lider kinsa naglakaw usab diha sa dalan sa pakigsaad.

Kini nga mga matang sa mga relasyon nagkinahanglan og panahon. Panahon sa pagpakig-uban. Panahon sa pagkatawa, pagdula, pagkat-on, pagserbisyo nga magkauban. Panahon sa pagdayeg sa mga interes ug mga hagit sa matag usa. Panahon sa pagpadayag ug pagmatinud-anon sa matag usa samtang kita maningkamot nga magkauban sa pag-uswag. Kini nga mga relasyon maoy usa sa nag-unang mga katuyoan sa pagpundok isip mga pamilya, mga korum, mga klase, ug mga kongregasyon. Mao kini sila ang pundasyon sa epektibo nga pagpangalagad. ⁵

Si Elder Dale G. Renlund mihatag kanato og usa ka yawe sa pag-ugmad niining mga relasyon dihang siya miingon: “Aron epektibong makaserbisyo sa uban kinahanglan ato silang makita … pinaagi sa panan-aw sa Langitnong Amahan. Niana lamang nga masugdan nato pagsabut ang tinuod nga bili sa usa ka kalag. Niana lamang nga mabati nato ang gugma sa Langitnong Amahan alang sa tanan Niyang mga anak.” ⁶

Ang pagtan-aw sa uban sama sa pagtan-aw sa Dios usa ka gasa. Gidapit nako ang tanan kanato sa pagtinguha niini nga gasa. Samtang ang atong mga mata gibuka aron makakita, ⁷ kita usab makatabang sa uban sa pagtan-aw sa ilang mga kaugalingon sama sa pagtan-aw sa Dios. ⁸ Si Presidente Henry B. Eyring mipasabut pag-ayo sa gahum niini dihang siya miingon: “Ang mas mahinungdanon mao ang unsay makat-unan sa [uban] gikan [kaninyo] kon si kinsa gayud sila ug kon unsa gayud sila sa umaabut. Ang akong tag-an nga dili kaayo kini nila makat-unan sa mga lektyur. Makuha nila kini gikan sa mga pagbati kon si kinsa kamo, kinsa sila para ninyo, ug unsa sa inyong hunahuna nga mamahimo sila sa umaabut .” ⁹ Ang pagtabang sa uban nga makasabut sa ilang tinuod nga pagkatawo ug katuyoan maoy usa sa pinakadakong mga gasa nga atong mahatag. ¹⁰ Ang pagtan-aw sa uban ug sa atong mga kaugalingon sama sa pagtan-aw sa Dios tinuod nga mobugkos sa atong mga kasingkasing “diha sa pagkahiusa ug diha sa gugma.” ¹¹

Sa kanunay nga nagkadugang nga sekular nga mga impluwensya nga nagbira kanato, atong gikinahanglan ang kusog nga nagagikan sa mahigugmaong mga relasyon. Busa sa atong pagplano og mga kalihokan, mga miting, ug ubang mga panagpundok, hinumduman nato ang labing dakong katuyoan niining mga panagpundok nga mao ang pag-ugmad og mahigugmaong mga relasyon nga mohiusa kanato ug makatabang nga ang ebanghelyo ni Jesukristo mas motuhop sa kahiladman sa atong mga kasingkasing. ¹²

Pagpadayag, Kabubut-on, ug Paghinulsol—“Ikonektar Sila ngadto sa Langit” ¹³

Siyempre, dili igo nga basta lang magkahiusa. Adunay daghang grupo ug mga organisasyon nga nahiusa tungod sa nagkalain-lain nga mga kawsa. Apan ang pagkahiusa nga atong gitinguha mao ang pagkahiusa diha ni Kristo, ang pagkonektar sa atong kaugalingon ngadto Kaniya. ¹⁴ Aron makonektar ang atong mga kasingkasing ngadto sa langit, atong gikinahanglan ang indibidwal nga espiritwal nga mga kasinatian, sama sa bag-ohay lang nga hapsay kaayong gipamulong ni Elder Andersen. ¹⁵ Kana nga mga kasinatian moabut samtang ang Espiritu Santo modala sa pulong ug gugma sa Dios ngari sa atong hunahuna ug kasingkasing. ¹⁶

Kini nga pagpadayag moabut pinaagi sa mga kasulatan, ilabi na sa Basahon ni Mormon; pinaagi sa dinasig nga mga pulong sa buhing mga propeta ug ubang matinud-anong mga disipulo; ug pinaagi sa ligdong nga hinagawhaw nga tingog. ¹⁷ Kini nga mga pulong labaw pa kay sa tinta diha sa pahina, mga tunog diha sa atong dalunggan, mga hunahuna sa atong mga pangisip o mga pagbati diha sa atong kasingkasing. Ang pulong sa Dios usa ka espiritwal nga gahum. ¹⁸ Kini mao ang kamatuoran ug kahayag. ¹⁹ Kini ang paagi nga kita makadungog Kaniya! Ang pulong mopasiugda ug mopalig-on sa atong pagtuo ni Kristo ug modasig sa atong tinguha nga mas mahisama sa Manluluwas—nga mao, ang paghinulsol ug paglakaw diha sa dalan sa pakigsaad. ²⁰

Sa miaging Abril, si Presidente Russell M. Nelson mitabang kanato sa pagsabut sa mahinungdanon nga tahas sa paghinulsol niining makahatag og pagpadayag nga panaw. ²¹ Siya miingon: “Kon kita mopili nga maghinulsol, kita mopili nga mag-usab! Atong tugutan ang Manluluwas nga mousab kanato ngadto sa labing maayo nga bersyon sa atong mga kaugalingon. … Kita mopili nga mas mahisama ni Jesukristo!” ²² Kini nga proseso sa pag-usab, dinasig sa pulong sa Dios, mao ang atong paagi sa pagkonektar ngadto sa langit.

Ang sukaranan sa pagdapit ni Presidente Nelson sa paghinulsol mao ang baruganan sa kabubut-on. Kita kinahanglan gayud nga mopili sa paghinulsol alang sa atong kaugalingon. Ang ebanghelyo dili mahimong ipugos sa atong mga kasingkasing. Sa giingon ni Elder Renlund, “Ang tumong sa atong Langitnong Amahan sa pagkaginikanan dili ang pagpabuhat sa Iyang mga anak sa unsay matarung; kini ang pagpapili sa Iyang mga anak sa pagbuhat sa matarung.” ²³

Diha sa mga programa nga gipulihan sa Kabataan ug Kabatan-onan, adunay sobra sa 500 ka lain-laing mga gikinahanglan nga kompletuhon aron makadawat og lain-lain nga mga pasidungog. ²⁴ Karon, usa na lang gayud. Kini usa ka pagdapit sa pagpili nga mas mahisama sa Manluluwas. Ato kining buhaton pinaagi sa pagdawat sa pulong sa Dios pinaagi sa Espiritu Santo ug pagtugot ni Kristo nga mousab nato ngadto sa labing maayo nga bersyon sa atong mga kaugalingon.

Labaw pa kini kay sa pagbansay sa paghimo og tumong o kaugalingong paglambo. Ang mga tumong usa lamang ka himan nga makatabang nato sa pagkonektar ngadto sa langit pinaagi sa pagpadayag, kabubut-on, ug paghinulsol—sa pagduol ni Kristo ug pagdawat sa Iyang ebanghelyo sa kahiladman sa atong mga kasingkasing.

Pag-apil ug Pagsakripisyo—“Tugoti Sila nga Mangulo” ²⁵

Sa katapusan, aron ang ebanghelyo ni Jesukristo motuhop sa kahiladman sa atong mga kasingkasing, kinahanglang moapil kita diha niini—mohatag sa atong panahon ug mga talento ngadto niini, mosakripisyo alang niini. ²⁶ Kitang tanan nagtinguha nga magpuyo og makahuluganon nga kinabuhi, ug tinuod gayud kini ilabi na sa bag-ong henerasyon. Ganahan sila og kawsa.

Ang ebanghelyo ni Jesukristo mao ang pinakadako nga kawsa sa kalibutan. Si Presidente Ezra Taft Benson miingon: “Gimanduan kita sa Dios sa pagdala niining ebanghelyo sa tibuok kalibutan. Mao kana ang kawsa nga kinahanglang mohiusa kanato karon. Ang ebanghelyo lamang ang makaluwas sa kalibutan gikan sa katalagman sa iyang kaugalingong pagkagun-ob. Ang ebanghelyo lamang ang mohiusa sa kalalakin-an [ug kababayen-an] sa tanang kaliwatan ug nasyonalidad diha sa kalinaw. Ang ebanghelyo lamang ang modala og hingpit nga kamaya, kalipay, ug kaluwasan sa tawhanong pamilya.” ²⁷

Si Elder David A. Bednar misaad, “Samtang atong hatagan og katungod ang kabatan-onan pinaagi sa pagdapit ug pagtugot nila nga molihok, ang Simbahan magpadayon sa milagrosong mga paagi.” ²⁸ Sa kasagaran wala nato dapita ug tugoti ang mga kabatan-onan sa pagsakripisyo alang niining dakong kawsa ni Kristo. Si Elder Neal A. Maxwell nakaobserbar, “Kon ang [atong] kabatan-onan dili pabug-atan [sa buhat sa Dios], sila sigurado nga mabug-atan sa kalibutan.” ²⁹

Ang programa sa Kabataan ug Kabatan-onan nagtutok sa paghatag og katungod sa kabatan-onan. Mopili sila sa ilang kaugalingong mga tumong. Ang mga kapangulohan sa korum ug sa klase ibutang sa ilang tukmang dapit. Ang konseho sa kabatan-onan sa ward, sama sa konseho sa ward, nakatutok sa buhat sa kaluwasan ug kahimayaan. ³⁰ Ang mga korum ug mga klase magsugod sa mga miting pinaagi sa pagpakigtambag kon unsaon paglihok sa buhat sa Dios nga gihatag kanila. ³¹

Si Presidente Nelson misulti sa kabatan-onan sa Simbahan: “Kon pilion ninyo, kon gustuhon ninyo, … mahimo kamong dakong parte sa usa ka dakong butang, mahinungdanong butang, halangdong butang! … Kamo usa sa mga labing maayo nga gipadala sa Ginoo sukad dinhi sa kalibutan. Aduna kamoy kapasidad nga mahimong mas lantip ug mas maalamon ug adunay mas dakong epekto sa kalibutan kay sa nangaging henerasyon!” ³² Sa laing okasyon, si Presidente Nelson miingon sa kabatan-onan: “Ako adunay hingpit nga pagsalig kaninyo. Nagmahal ko ninyo, ug mao usab ang Ginoo. Kita Iyang katawhan, nagtinabangay diha sa Iyang balaang buhat.” ³³ Mga batan-on, nabati ba ninyo ang pagsalig ni Presidente Nelson diha kaninyo ug kon unsa kamo kaimportante niini nga buhat?

Mga ginikanan ug hamtong nga mga lider, dapiton ko kamo nga motan-aw sa kabatan-onan sama ni Presidente Nelson. Samtang ang kabatan-onan mobati sa inyong gugma ug pagsalig, samtang inyo silang dasigon ug tudloan unsaon sa pagpangulo—ug pasagdan sila nga molihok nga sila lang—mahingangha kamo sa ilang mga panabut, mga abilidad, ug pasalig sa ebanghelyo. ³⁴ Sila mobati sa hingpit nga kalipay sa pagpili nga moapil ug mosakripisyo alang sa kawsa ni Kristo. Ang Iyang ebanghelyo mas motuhop sa kahiladman sa ilang mga kasingkasing, ug ang buhat magpadayon sa milagroso nga mga paagi.

Saad ug Pagpamatuod

Ako mopamatuod, nga kon motutok kita niini nga mga baruganan—mga relasyon, pagpadayag, kabubut-on, paghinulsol, ug sakripisyo—ang ebanghelyo ni Jesukristo mas motuhop sa kahiladman sa tanan natong mga kasingkasing. Atong makita ang Pagpahiuli nga magpadayon sa lintungangay niini, ang katubsanan sa Israel ug ang pag-establisar sa Zion, ³⁵ diin si Kristo magmando isip Hari sa mga hari.

Ako mopamatuod nga ang Dios padayong nagbuhat sa tanang butang nga gikinahanglan aron maandam ang Iyang katawhan alang niana nga adlaw. Makita unta nato ang Iyang kamot niining mahimayaon nga buhat samtang kitang tanan maningkamot nga “[mo]duol ngadto kang Kristo, ug [magma]hingpit diha kaniya.” ³⁶ Sa ngalan ni Jesukristo, amen.