Paminaw Kaniya
Ang atong Amahan nakahibalo nga kon kita gilibutan sa walay kasiguroan ug sa kahadlok, ang labing makatabang nato mao ang pagpaminaw sa Iyang Anak.
Minahal kong kaigsoonan, mapasalamaton ko nga, pinaagi sa paggamit sa teknolohiya, kita nagkapundok aron sa pagsimba niining buntag sa Dominggo. Pagkabulahan nato nga nahibalo nga ang ebanghelyo ni Jesukristo gipahiuli sa yuta!
Sa milabayng mga semana, kadaghanan nato nakasinati og pagkabalda sa atong personal nga kinabuhi. Mga linog, mga sunog, mga baha, mga sakit, ug ang mga resulta niini nakabalda sa mga naandan, ug nakaingon sa kakulang sa mga pagkaon, nag-unang mga panginahanglan ug mga tinigum.
Taliwala niining tanan, kami nagdayeg ug nagpasalamat ninyo sa pagpili sa pagpaminaw sa pulong sa Ginoo niining panahon sa walay kasiguroan pinaagi sa pag-apil namo sa kinatibuk-ang komperensya. Ang nagkadugang nga kangitngit nga nag-uban sa kalisdanan nakapasanag sa kahayag ni Kristo. Hunahunaa lang ang kaayohan nga atong mahimo atol niining tibuok kalibutan nga kalisdanan. Ang inyong gugma ug hugot nga pagtuo sa Manluluwas mahimong hinungdan nga makadiskobre ang usa ka tawo sa Pagpahiuli sa kahingpitan sa ebanghelyo ni Jesukristo.
Sa miaging duha ka tuig, si Sister Nelson ug ako nakahimamat sa liboan kaninyo sa tibuok kalibutan. Kami nakigmiting ninyo sa mga arena ug mga ballroom sa hotel. Sa matag dapit, ako mibati nga ako anaa sa presensya sa pinili sa Ginoo ug nga ako nakakita sa panagpundok sa Israel.
Kita nagpuyo sa adlaw nga “mahinamong gipaabut sa atong mga katigulangan.”1 Kita nakasaksi gayud unsay nakita ni propeta Nephi sa panan-awon lamang, nga ang “gahum sa Kordero sa Dios” mokunsad “diha sa mga katawhan sa pakigsaad sa Ginoo, kinsa nagkatibulaag sa ibabaw sa yuta; ug sila gisangkapan sa katarung ug uban sa gahum sa Dios sa dako nga himaya.”2
Kamo, akong kaigsoonan, apil niadtong mga lalaki, mga babaye, ug mga bata nga nakita ni Nephi. Hunahunaa kana!
Bisan asa pa kamo magpuyo o unsay inyong kahimtang, ang Ginoo nga si Jesukristo mao ang inyong Manluluwas, ug ang propeta sa Dios, si Joseph Smith, mao ang inyong propeta. Siya giorden nang daan sa wala pa ang pundasyon niini nga yuta nga mahimong propeta niining katapusang dispensasyon, diin “walay itago”3 gikan sa mga Santos. Ang pagpadayag nagpadayon sa paggawas gikan sa Ginoo niining nagpadayon nga proseso sa pagpahiuli.
Alang kaninyo unsay gipasabut nga ang ebanghelyo ni Jesukristo gipahiuli sa yuta?
Kini nagpasabut nga kamo ug ang inyong pamilya mabugkos sa kahangturan! Kini nagpasabut nga tungod kay kamo nabunyagan pinaagi sa dunay awtoridad gikan ni Jesukristo ug nakumpirmahan nga miyembro sa Iyang Simbahan, kamo makatagamtam sa kanunay nga pakig-uban sa Espiritu Santo. Siya mogiya ug manalipod kaninyo. Kini nagpasabut nga kamo dili biyaan nga wala mahupay o walay magamit nga gahum sa Dios sa pagtabang ninyo. Kini nagpasabut nga ang gahum sa pagkapari makapanalangin ninyo sa inyong pagdawat sa importanting mga ordinansa ug paghimog mga pakigsaad uban sa Dios ug pagtuman niini. Kini nga mga kamatuoran nakahatag og kalig-on sa atong mga kalag, ilabi na niining panahon nga ang unos mapintas.
Ang Basahon ni Mormon miistorya sa pabangon ug pagkapukan sa duha ka dagkong mga sibilisasyon. Ang ilang kasaysayan nagpakita kon unsa ka sayon nga ang kadaghanan sa mga tawo makalimot sa Dios, pagsalikway sa mga pasidaan sa mga propeta sa Ginoo, ug pagtinguha og gahum, pagkabantugan, ug mga tawhanong kalipay.4 Mibalik-balik, ang mga propeta kaniadto mipahayag og “mahinungdanon ug kahibulongan nga mga buhat ngadto sa mga katawhan, diin sila wala motuo.”5
Dili kini lahi sa atong panahon. Sa milabayng katuigan, ang mahinungdanon ug kahibulongan nga mga butang nadungog gikan sa gihalad nga mga pulpito sa tibuok yuta. Apan kadaghanan sa mga tawo wala modawat niini nga mga kamatuoran—tingali kay sila wala makahibalo asa kini pangitaa6 o kay sila naminaw sa mga tawo nga wala sa tanang kamatuoran o kay sila misalikway sa kamatuoran tungod sa kalibutanong mga butang.
Ang kaaway abtik. Liboan na ka tuig nga siya mihimo sa maayo nga dautan ug sa dautan nga maayo.7 Ang iyang mga mensahe ingon og kusog, isug, ug mapagarbuhon.
Hinoon, ang mga mensahe gikan sa atong Langitnong Amahan makita nga lahi. Siya makigsulti sa yano, sa hilom, ug sa labihan kayano nga kita makasabut gayud Kaniya.8
Pananglitan, matag higayon nga Siya mopaila sa Iyang Bugtong Anak ngadto sa mga mortal sa yuta, Siya mihimo pinaagi sa pipila lamang ka pulong. Sa Bungtod sa Transpigurasyon ngadto ni Pedro, Santiago, ug Juan, ang Dios miingon, “Kini ang akong hinigugma nga Anak: paminaw kaniya.”9 Ang Iyang mga pulong ngadto sa mga Nephite sa karaang Bountiful mao “Tan-awa ang akong Hinigugmang Anak, kinsa Ako nahimuot kaayo, kang kinsa Ako mihimaya sa akong ngalan—paminaw kamo kaniya.”10 Ug ngadto ni Joseph Smith, nianang mahinungdanong pamahayag nga miabli niini nga dispensasyon, ang Dios yanong miingon, “Kini ang Akong Hinigugma nga Anak. Paminaw Kaniya!”11
Karon, minahal kong kaigsoonan, hunahunaa ang kamatuoran niining tulo ka higayon nga gihisgutan, sa wala pa ipaila sa Amahan ang Anak, ang mga tawo nga nalakip anaa sa kahadlok ug, sa pila ka bahin nabalaka.
Ang mga Apostoles nahadlok sa dihang ilang nakita si Jesukristo nga gilibutan sa panganud sa Bungtod sa Transpigurasyon.
Ang mga Nephite nahadlok tungod kay sila nakasinati og kalaglagan ug kangitngit sulod sa pipila ka adlaw.
Si Joseph Smith gigunitan sa gahum sa kangitngit sa wala pa moabli ang kalangitan.
Ang atong Amahan nakahibalo nga kon kita gilibutan sa walay kasiguroan ug sa kahadlok, ang labing makatabang nato mao ang pagpaminaw sa Iyang Anak.
Tungod kay kon kita magtinguha nga maminaw—tinuod nga pagpaminaw—sa Iyang Anak, kita giyahan nga makahibalo unsay buhaton sa bisan unsa nga sirkumstansya.
Ang unang pulong sa Doktrina ug mga Pakigsaad mao ang patalinghug.12 Kini nagpasabut “sa pagpaminaw uban sa tumong sa pagsunod.”13 Sa pagpatalinghug nagpasabut sa “[Pag]paminaw Kaniya”—sa pagpaminaw unsay isulti sa Manluluwas ug dayon sa pagpatalinghug sa Iyang tambag. Niining duha ka pulong—“Paminaw Kaniya”—Ang Dios mihatag nato og sundanan alang sa kalampusan,ug hingpit nga kalipay niini nga kinabuhi. Kita kinahanglan nga maminaw sa mga pulong sa Ginoo, mopatalinghug niini, ug mamati unsay Iyang gisulti kanato!
Isip mga disipulo ni Jesukristo, ang atong mga paningkamot sa pagpaminaw Kaniya kinahanglan nga mas gitinguha nato. Kinahanglan og tininoud ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulun-an, sa Iyang mga kamatuoran.
Kita dili gyud makasalig sa impormasyon nga atong makita sa social media. Sa binilyong mga pulong sa online ug sa usa ka kalibutan nga puno sa materyalismo nga pahinumdom nga kanunay apilan sa masaba, dautan nga mga paningkamot sa kaaway, asa man kita makapaminaw Kaniya?
Kita makaadto sa mga kasulatan. Kini nagtudlo nato bahin ni Jesukristo ug sa Iyang ebanghelyo, sa gidak-on sa Iyang Pag-ula, ug mahinungdanong plano sa Amahan sa kalipay ug katubsanan. Inadlaw nga pagbasa sa pulong sa Dios importante alang sa espirituhanong kaluwasan, ilabi na niining panahon sa nagkagrabe nga kaguliyang. Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalisud nga wala nato mahunahunai nga atong atubangon.
Kita usab [maka] paminaw Kaniya diha sa templo. Ang balay sa Ginoo mao ang balay sa pagkat-on. Didto ang Ginoo nagtudlo sa Iyang kaugalingong paagi. Didto ang matag ordinansa nagtudlo bahin sa Manluluwas. Didto kita makat-on unsaon sa pag-abli sa tabil ug makigsulti sa langit sa mas klaro. Didto kita makat-on unsaon sa pagpapahawa sa kaaway ug paggamit sa gahum sa pagkapari sa Ginoo sa paglig-on nato ug niadtong atong gimahal. Kinahanglan ang matag usa nato magtinguha og kadangpan didto.
Kon kining temporaryo nga mga restriksyon sa COVID-19 mahuman na, palihug pag-iskedyul og regular nga panahon sa pagsimba ug pagserbisyo sa templo. Ang matag minuto niana nga panahon mopanalangin kaninyo ug sa inyong pamilya sa mga paagi nga walay lain ang makahimo. Paggahin og panahon sa pagpamalandong unsay inyong nadungog ug nabati samtang didto kamo. Hangyoa ang Ginoo sa pagtudlo ninyo unsaon sa pag-abli sa kalangitan aron mapanalanginan ang inyong kinabuhi ug mga kinabuhi sa inyong gimahal ug giserbisyohan.
Samtang ang pagsimba sa templo dili posible karon, ako modapit ninyo nga dugangan ang inyong pag-apil sa family history, lakip ang family history research ug indexing. Ako mosaad nga kon inyong dugangan ang inyong panahon sa buhat sa templo ug sa family history mouswag ug molambo ang inyong abilidad sa pagpaminaw Kaniya.
Kita usab [maka] paminaw Kaniya nga mas klaro kon atong hashasan ang atong abilidad sa pag-ila sa mga hung-hong sa Espiritu Santo. Wala gayud sukad nga mas importante nga makahibalo unsaon sa pagpaminaw sa Espiritu nga mamulong kaninyo kay sa karon. Sa Dios nga Kapangulohan, ang Espiritu Santo mao ang mensahero. Siya modala sa mga hunahuna diha sa inyong alimpatakan nga gusto sa Amahan ug sa Anak nga inyong madawat. Siya mao ang Maghuhupay. Siya mohatag og pagbati sa kalinaw sa inyong kasingkasing. Siya mopamatuod sa kamatuoran ug mokumpirma unsa ang tinuod samtang kamo maminaw ug mobasa sa pulong sa Ginoo.
Ako mousab sa akong hangyo alang ninyo nga inyong buhaton bisan unsa ang makapadugang sa inyong espirituhanong kapasidad sa pagdawat og personal nga pagpadayag.
Ang pagbuhat sa ingon makatabang ninyo unsaon sa pagpadayon sa inyong kinabuhi, unsay buhaton sa panahon sa krisis, ug unsaon sa pag-ila ug paglikay sa mga tintasyon ug mga pagpanglimbong sa kaaway.
Ug, sa katapusan, kita [maka] paminaw Kaniya samtang kita mamati sa mga pulong sa mga propeta, mga manalagna, ug mga tigpadayag. Ang naordinahan nga mga Apostoles ni Jesukristo kanunay nga nagpamatuod Kaniya. Sila nagtudlo sa dalan samtang kita nagsubay sa malisud nga dalan sa atong mortal nga mga kasinatian.
Unsay mahitabo kon kamo maminaw pag-ayo, mopatalinghug, ug mamati unsay gisulti sa Manluluwas ug unsay Iyang gisulti pinaagi sa Iyang mga propeta? Ako mosaad nga kamo mapanalanginan og dugang gahum sa pag-atubang sa tintasyon, mga pakigbisog, ug kahuyang. Ako mosaad og mga milagro sa inyong kaminyoon, mga relasyon sa pamilya, ug inadlaw nga trabaho. Ug ako mosaad nga ang inyong kapasidad sa pagbati og hingpit nga kalipay madugangan bisan kon ang unos magkadaghan sa inyong kinabuhi.
Kining Abril 2020 nga kinatibuk-ang komperensya mao ang atong panahon sa paghandom sa panghitabo nga nakapusab sa kalibutan. Samtang kita nagpaabut niining ika-200 nga anibersaryo sa Unang Panan-awon ni Joseph Smith, ang Unang Kapangulohan ug Konseho sa Napulog Duha ka mga Apostoles namalandong unsay among mabuhat aron sa pagsaulog sa tukmang paagi niining importanting hitabo.
Kana nga pagpakita sa dios mipasiugda sa Pagpahiuli sa kahingpitan sa ebanghelyo ni Jesukristo ug mipahiluna sa dispensasyon sa kahingpitan sa panahon.
Kami naghunahuna kon angay ba nga mopabarug og monumento. Apan samtang among gikonsiderar ang talagsaon nga makasaysayanon ug internasyonal nga epekto sa Unang Panan-awon, nadasig kami sa paghimo og usa ka monumento dili sa granite o bato apan sa mga pulong—mga pulong sa ligdong ug sagrado nga mga pamahayag—gisulat, dili ikulit diha sa “papan nga bato” apan hinoon ikulit diha sa “papan” sa atong mga kasingkasing.14
Sukad nga na-organisar ang Simbahan, lima lamang ka pamahayag ang gipagawas, nga ang katapusan mao ang “Ang Pamilya: Usa ka Pamahayag ngadto sa Kalibutan,” nga gipresentar ni Presidente Gordon B. Hinckley niadtong 1995.
Karon samtang kita mamalandong niining importanting panahon sa kasaysayan sa kalibutan ug sa mando sa Ginoo sa pagpundok sa nagkatibulaag nga Israel agig pagpangandam alang sa Ikaduhang Pag-anhi ni Jesukristo, kami, ang Unang Kapangulohan ug Konseho sa Napulog Duha ka mga Apostoles, mopagawas sa mosunod nga pamahayag. Ang ulohan niini mao ang “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibutan sa Ikaduhang Siglo nga Kasaulogan.” Ang tagsulat niini mao ang Unang Kapangulohan ug ang Konseho sa Napulog Duha ka mga Apostoles sa Ang Simbahan ni Jesukristo sa mga Santos sa Ulahing mga Adlaw. Gipetsahan kini og Abril 2020. Aron maandam alang karong adlawa, ako na kining girekord daan nga pamahayag diha sa Sagradong Kakahoyan, diin unang nakita ni Joseph Smith ang Amahan ug ang Anak.
“Kami ligdong nga mamahayag nga ang Dios nagmahal sa Iyang mga anak sa matag nasud sa kalibutan. Ang Dios nga Amahan mihatag kanato sa balaanong pagkatawo, walay sama nga kinabuhi, ug walay kinutuban nga maulaong sakripisyo sa Iyang Pinalanggang Anak, si Jesukristo. Pinaagi sa gahum sa Amahan, si Jesus mibangon pag-usab ug nakaangkon og kadaugan batok sa kamatayon. Siya ang atong Manluluwas, atong Ehemplo, ug atong Manunubos.
“Duha ka gatus ka tuig na ang milabay, sa usa ka matahum nga buntag sa tingpamulak niadtong 1820, ang batan-ong si Joseph Smith, nagtinguha nga masayud kon hain nga simbahan ang apilan, miadto sa kakahoyan aron mag-ampo duol sa iyang panimalay sa amihanang bahin sa New York, USA. Aduna siyay mga pangutana kalabut sa kaluwasan sa iyang kalag ug misalig nga ang Dios mogiya kaniya.
“Uban sa kamapainubsanon, kami modeklarar nga agig tubag sa iyang pag-ampo, ang Dios nga Amahan ug ang Iyang Anak, si Jesukristo, mipakita kang Joseph ug mipasiugda sa pagpabalik sa tanang butang (Mga Buhat 3:21) sama sa gipanagna diha sa Biblia. Dinhi niini nga panan-awon, iyang nakat-unan nga human mamatay ang orihinal nga mga Apostoles, ang Simbahan ni Kristo sa Bag-ong Tugon nawala sa kalibutan. Si Joseph ang mahimong himan sa pagbalik niini.
“Kami momatuod nga ubos sa direksyon sa Amahan ug sa Anak, ang langitnon nga mga mensahero mianhi aron sa pagtudlo kang Joseph ug sa pag-establisar og usab sa Simbahan ni Jesukristo. Ang nabanhaw nga si Juan Bautista mipahiuli sa awtoridad sa pagbunyag pinaagi sa pagpaunlod alang sa kapasayloan sa mga sala. Tulo sa orihinal nga napulog duha ka mga Apostoles—si Pedro, Santiago, ug Juan—mipahiuli sa pagka-apostol ug sa mga yawe sa awtoridad sa pagkapari. Ang uban mianhi usab, lakip ni Elijah, kinsa mipahiuli sa awtoridad sa paghiusa sa mga pamilya hangtud sa kahangturan diha sa mahangturon nga mga pakigrelasyon nga molungtad lapas sa kamatayon.
“Dugang kaming mosaksi nga si Joseph Smith gihatagan sa gasa ug gahum sa Dios sa paghubad sa usa ka karaan nga rekord: ang Basahon ni Mormon—Lain nga Tugon ni Jesukristo. Ang mga pahina niining sagrado nga teksto naglakip og usa ka asoy sa personal nga pagpangalagad ni Jesukristo taliwala sa katawhan sa Kasadpang Bahin sa Kalibutan human sa Iyang Pagkabanhaw. Nagtudlo kini sa katuyoan sa kinabuhi ug nagpasabut sa doktrina ni Kristo, nga mahinungdanon alang niana nga katuyoan. Isip kauban nga kasulatan sa Biblia, ang Basahon ni Mormon nagpamatuod nga ang tanang tawhanong nilalang mga anak nga lalaki ug mga anak nga babaye sa usa ka mahigugmaong Amahan sa Langit, nga Siya adunay balaan nga plano alang sa atong kinabuhi, ug nga ang Iyang Anak, si Jesukristo, namulong karon sa samang paagi sa karaang panahon.
“Kami modeklarar nga Ang Simbahan ni Jesukristo sa mga Santos sa Ulahing mga Adlaw, nga giorganisar niadtong Abril 6, 1830, mao ang Simbahan ni Kristo sa Bag-ong Tugon nga gipahiuli. Kini nga Simbahan nakaangkla sa hingpit nga kinabuhi sa ulohang bato sa pamag-ang niini, si Jesukristo, ug diha sa Iyang walay kinutoban nga Pag-ula ug literal nga Pagkabanhaw. Si Jesukristo mitawag na usab og mga Apostoles ug mihatag kanila og awtoridad sa pagkapari. Midapit Siya kanatong tanan sa pagduol ngadto Kaniya ug sa Iyang Simbahan, sa pagdawat sa Espiritu Santo, sa mga ordinansa sa kaluwasan, ug sa pag-angkon og malungtarong kalipay.
“Duha ka gatus ka tuig na ang milabay sukad nga gipasiugdahan sa Dios nga Amahan ug sa Iyang Pinalanggang Anak, si Jesukristo kini nga Pagpahiuli. Minilyon sa tibuok kalibutan ang mihangop sa kahibalo mahitungod niining gipanagna nga mga panghitabo.
“Malipayon kaming modeklarar nga ang gisaad nga Pagpahiuli padayon nga mahitabo pinaagi sa nagpadayon nga pagpadayag. Ang kalibutan dili na gayud mahimong sama kaniadto, tungod kay ang Dios ‘[mo]hiusa diha kang Kristo sa tanang mga butang’ (Mga Taga-Efeso 1:10).
“Uban sa balaang pagtahud ug pagpasalamat, kami isip Iyang mga Apostoles modapit sa tanan nga masayud—sama kanamo—nga ang kalangitan bukas. Kami momatuod nga ang Dios mipahibalo sa Iyang kabubut-on alang sa Iyang pinalanggang mga anak nga lalaki ug mga anak nga babaye. Kami mopamatuod nga kadtong mainampuong magtuon sa mensahe sa Pagpahiuli ug molihok uban sa pagtuo mapanalanginan nga makaangkon og ilang kaugalingong pagsaksi sa kabalaan niini ug sa katuyoan niini sa pag-andam sa kalibutan alang sa gisaad nga Ikaduhang Pag-anhi sa atong Ginoo ug Manluluwas, si Jesukristo.”15
Hinigugmang mga kaigsoonan, mao kana ang among pamahayag sa ikaduhang siglo nga kasaulogan ngadto sa kalibutan kabahin sa Pagpahiuli sa ebanghelyo ni Jesukristo diha sa kahingpitan niini. Nahubad kini sa 12 ka mga pinulongan. Ang ubang mga pinulongan mosunod sa dili madugay. Kini mahimong anaa dayon sa website sa Simbahan, diin kamo makaangkon og kopya. Tun-i kini sa pribado nga paagi ug uban sa sakop sa inyong pamilya ug mga higala. Pamalandungi ang mga kamatuoran ug paghunahuna sa epekto niadtong mga kamatuoran sa inyong kinabuhi kon kamo maminaw niini, mopatalinghug niini, ug motuman sa mga sugo ug mga pakigsaad nga nag-uban niini.
Ako nasayud nga si Joseph Smith giorden nang daan nga propeta nga gipili sa Ginoo sa pag-abli niining katapusang dispensasyon. Pinaagi kaniya ang Simbahan sa Ginoo gipahiuli nganhi sa yuta. Si Joseph misilyo sa iyang pagpamatuod uban sa iyang dugo. Gihigugma ug gitahud ko siya!
Ang Dios buhi! Si Jesus mao ang Kristo! Ang Iyang Simbahan gipahiuli! Siya ug ang Iyang Amahan, ang atong Langitnong Amahan, nagbantay kanato. Sa ingon ako mopamatuod pinaagi sa sagradong ngalan ni Jesukristo, amen.