Steven J. Lund

Kinatibuk-ang Presidente sa Young Men

Isip bag-ong Kinatibuk-ang Presidente sa Young Men, si Steven J. Lund midawat og sagrado nga responsibilidad nga motabang sa paggiya sa gatusan ka libo nga batan-ong mga lalaki nga anaa sa edad sa Aaronic nga Pagkapari sa pangtibuok kalibutan nga Simbahan.

Kon mahimo pa nga personal nga makighimamat sa matag usa kanila, nasayud gayud siya kon unsa ang iyang isulti: “Ang pagkahimong malampuson nga miyembro sa gingharian sa Dios dili komplikado. Ang Langitnong Amahan nahigugma kanimo. Kinahanglan lang nimo nga mobalos sa paghigugma Kaniya. Ug kon ato kanang buhaton, kita mahimong luwas ug malipayon. … Ang atong mga kinabuhi adunay kahulugan.”

Ang pagseryuso sa Simbahan dili lamang mahitabo sa Dominggo. Usa kini ka oportunidad sa matag adlaw, sumala sa abogado nga nahimong business executive.

“Ang pagbasa sa mga kasulatan, pagsimba, paghinulsol dayon kon matipas kita, pag-abli sa atong mga baba, ug pagkahimong usa ka ehemplo sa ebanghelyo—mao kana ang plano sa atong Langitnong Amahan,” miingon siya.

Si Brother Lund natawo niadtong Oktubre 30, 1953, ngadto kang Jay ug Toy Ellen Lund ug nagdako sa Amihanang California (Santa Rosa) ug sa Habagatang California (Long Beach), USA. Ang iyang pagserbisyo diha sa U.S. Army midala kaniya balik sa Uropa, usa ka kontinente nga nakat-unan niyang higugmaon atol sa iyang pagserbisyo sa Netherlands Amsterdam Mission.

Human sa iyang serbisyo militar, mi-enrol siya sa Brigham Young University, diin nahimamat niya pag-usab si Kalleen Kirk, usa ka batan-ong babaye nga iyang nakaila samtang nadestino sa Germany. Si Steven ug Kalleen sa katapusan nagminyo sa Salt Lake Temple niadtong Agosto 8, 1980. Mga ginikanan sila sa upat ka anak.

Human makaangkon og law degree sa BYU, si Brother Lund mitrabaho isip abogado hangtud nga nahimong presidente ug CEO sa Nu Skin Enterprises. Siya karon ang executive chairman sa board of directors sa kompaniya. Siya usab ang regent sa Utah System of Higher Education.

Si Brother Lund nakaserbisyo isip presidente sa Georgia Atlanta Mission ug isip coordinator sa Provo City Center Temple Dedication Committee. Siya usab nakaserbisyo isip sakop sa general board sa Young Men ug isip Area Seventy.