Sa Unsang Paagi ang Pagkapari Mopanalangin sa Kabatan-onan
Kita gihatagan sa oportunidad sa pagpangalagad sama sa mga anghel, sa pagsangyaw sa ebanghelyo sa tanang mga kontinente sa yuta, ug sa pagtabang sa mga kalag nga moduol kang Kristo.
Mga kaigsoonan, ako sa tinuod mapasalamaton nga mamulong niining makasaysayang gabii bahin sa sagrado nga gasa sa pagkapari ug sa kahibulongang gahum niini sa pagpanalangin sa kabatan-onan niini nga dispensasyon. Ako nag-ampo nga bisan sa akong pagkadili hingpit, ang Espiritu motabang nako sa pagtudlo sa tinuod.
Ang Unang Kapangulohan nagpahinumdum sa mga naghupot sa Aaronic nga Pagkapari nga “nagpuyo kamo sa panahon nga adunay dagkong mga oportunidad ug mga hagit—usa ka panahon diin ang pagkapari napahiuli. Kamo adunay awtoridad sa pagpahigayon sa mga ordinansa sa Aaronic nga Pagkapari. Samtang kamo sa mainampuon ug takus nga paagi mogamit niana nga awtoridad, kamo mopanalangin kaayo sa mga kinabuhi niadtong naa sa inyong palibut.” 1 Isip batan-ong mga lalaki sa Simbahan, kita sab gipahinumduman nga kita “hinigugmang [mga anak nga lalaki] sa Dios, ug Siya dunay buluhaton nga ipabuhat [nato],” 2 ug kita motabang sa Iyang buhat “ang pagpahinabo sa “pagka-imortal ug sa kinabuhing dayon sa tawo”” (Moises 1:39).
Ang pagkapari mao ang awtoridad sa pagpahigayon sa mga ordinansa ug mga pakigsaad sa ebanghelyo sa Manluluwas ngadto niadtong takus nga modawat niini. Pinaagi niining mga ordinansa sa pagkapari ug sagradong mga pakigsaad moabut ang hingpit nga mga panalangin sa Pag-ula sa Manluluwas, nga makatabang nato nga makab-ot ang atong balaang padulngan.
Si Joseph Smith usa ka batan-ong lalaki kinsa gitawag sa Dios sa pagpahiuli sa ebanghelyo ni Jesukristo ug, alang niana nga katuyoan, gihatagan sa pagkapari, nga iyang gigamit sa pagpanalangin sa tanang katawhan. Ang Doktrina ug mga Pakigsaad 135 naghisgot og daghang panalangin nga gihatag ni Joseph sa kabatan-onan niini nga dispensasyon. Atong mabasa nga: “Si Joseph Smith … nakahimo og daghan pa, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo dinhi. … Siya nakapatungha sa Basahon ni Mormon … ; nakapadala sa kahingpitan sa walay katapusan nga ebanghelyo … ngadto sa upat ka mga dapit sa yuta; nakapatungha sa mga pagpadayag ug mga sugo nga naglangkob [sa] Doktrina ug mga Pakigsaad … ; nagpundok og daghan nga mga kaliboan nga mga Santos sa Ulahing mga Adlaw, … ug nagbilin og usa ka dungog ug ngalan nga dili mamatay” (Doktrina ug mga Pakigsaad 135:3).
Aron epektibong makaserbisyo sama ni Joseph, kita kinahanglang mahimong takus sa paggamit sa gahum sa pagkapari sa Ginoo. Samtang naghubad sa Basahon ni Mormon, si Joseph ug Oliver gustong mabunyagan, apan sila walay tukma nga awtoridad. Niadtong Mayo 15, 1829, sila nagluhod sa pag-ampo ug gibisita ni Juan Bautista, kinsa mihatag kanila sa mga yawe ug awtoridad sa Aaronic nga Pagkapari, nga nagsulti, “Diha kaninyo nga akong kauban nga mga sulugoon, sa ngalan sa Mesiyas, ako motugyan sa Pagkapari ni Aaron, nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala” (Doktrina ug mga Pakigsaad 13:1).
Kita gihatagan sa oportunidad sa pagpangalagad sama sa mga anghel, sa pagsangyaw sa ebanghelyo sa tanang mga kontinente sa yuta, ug sa pagtabang sa mga kalag nga moduol kang Kristo. Kini nga serbisyo nagbutang nato sa samang buhat uban ni Juan Bautista, Moroni, Joseph Smith, Presidente Russell M. Nelson, ug ubang kugihan nga sulugoon sa Ginoo.
Ang atong serbisyo diha ug uban sa Iyang pagkapari naghiusa niadtong kinsa mapahinunguron sa pagsunod sa mga pagtulun-an sa Ginoo sa tukma, diin ako mismo nasayud nga lisud samtang kita nag-atubang sa mga hagit sa kabatan-onan. Apan ang pakighiusa uban niining mga isig ka sulugoon sa Ginoo sa pagtuman sa Iyang buhat makatabang sa paglig-on nato batok sa mga tintasyon ug mga panglingla sa kaaway. Mahimo kamong maayong ehemplo sa tanan kinsa dili sigurado sa ilang kaugalingon. Ang inyong maayong ehemplo makita gyud nga ang tanang inyong gikauban mapanalanginan pinaagi lang sa pagpakig-uban ninyo. Malisud usahay ang pag-ila sa presensya sa atong espirituhanong mga kauban, apan ako mapasalamaton nga nasayud nga ako sakop sa usa ka matinud-anon nga korum sa pagkapari kinsa akong makauban sa pagpaningkamot nga mahiduol kang Kristo.
Uban sa atong mga higala ug pamilya, ang Espiritu Santo mao ang usa sa atong labing maunungon ug kasaligan nga kauban. Apan aron madapit ang Iyang kanunay nga pakig-uban, kinahanglan ibutang nato ang atong kaugalingon sa mga sitwasyon ug dapit diin gusto Siya nga maanaa. Mahimong magsugod kini sa atong mga panimalay samtang kita maningkamot sa paghimo niini nga balaang mga dapit pinaagi sa pag-apil sa inadlaw nga pagtuon sa kasulatan ug pag-ampo isip pamilya ug, mas importante, samtang kita personal nga magtuon sa kasulatan ug mag-ampo sa atong kaugalingon.
Sayo niining tuiga, ako gihatagan og makapahinam apan mapaubsanon nga oportunidad sa pagtabang sa akong manghud nga babaye, si Oceane, nga molambo sa dalan sa pakigsaad pinaagi sa pagdawat sa imbitasyon sa pagpabunyag ug pagtuman sa usa sa gitakda nga mga kinahanglanon aron makasulod sa celestial nga gingharian. Siya milangan sa iyang bunyag og usa ka bulan, hangtud nga ako gi-orden nga priest, aron sa paghatag nako og higayon sa pagpahigayon sa ordinansa, samtang ang among ubang mga igsoon nga babaye adunay higayon usab ubos sa tahas sa pagkapari nga mobarug isip mga saksi. Samtang kami nagbarug sa nag-atbang nga kilid sa bunyaganan, ug nangandam nga moubog sa tubig, akong namatikdan ang iyang kahinam, nga parehas sa akong kahinam. Ug ako mibati nga nahiusa niya, sa pagkakita nga siya naghimo sa husto nga desisyon. Kini nga oportunidad sa paggamit sa pagkapari nagkinahanglan nako nga mahimong mas mabinantayon ug dili kaayo kaswal sa akong pagsunod sa ebanghelyo. Aron makaandam, ako miadto sa templo kada adlaw niana nga semana, misuporta sa akong mama, lola, ug igsoong babaye, sa pagpahigayon og mga bunyag alang sa mga patay.
Kini nga kasinatian mitudlo nako og daghan bahin sa pagkapari ug unsaon nako paggamit niini sa takus nga paagi. Ako nasayud nga tanang naghupot sa pagkapari makabati sa samang mga butang nga akong gibati kon kita mosunod sa ehemplo ni Nephi nga “moadto ug mobuhat” (tan-awa sa 1 Nephi 3:7). Kita dili pwede magtinapulan ug magdahum nga ang Ginoo mogamit nato sa Iyang mahinungdanong buhat. Kita dili pwedeng maghulat niadtong kinsa nanginahanglan sa atong tabang nga mangita nato; atong katungdanan isip mga naghupot sa pagkapari sa pagpakita og ehemplo ug mobarug isip mga saksi sa Dios. Kon kita naghimo og mga desisyon nga nagpugong nato sa atong mahangturong pag-uswag, kita kinahanglan mag-usab karon. Si Satanas maningkamot gyud sa tanan niyang mahimo nga ipabilin kita sa kalibutanon nga kahimtang sa pagtinguha og yano nga mga kalingawan. Apan ako nasayud nga kon kita maningkamot, mangita niadtong kinsa mosuporta nato, ug maghinulsol matag adlaw, ang moabut nga mga panalangin talagsaon ug ang atong kinabuhi mausab sa kahangturan samtang kita mopadayon sa dalan sa pakigsaad.
Ako nasayud nga kini mao ang tinuod nga Simbahan ni Jesukristo, kinsa atong Manluluwas ug mitugyan sa mga yawe sa pagkapari ngadto sa Iyang Apostoles, kinsa mogamit niini sa paggiya nato, ilabi na niining mahagitong mga adlaw, ug aron sa pag-andam sa kalibutan sa Iyang pagbalik.
Ako nasayud nga si Joseph Smith usa ka propeta sa Pagpahiuli ug nga si Presidente Nelson mao ang atong buhing propeta karon. Ako modapit natong tanan sa pagtuon sa kinabuhi niining halangdong mga naghupot sa pagkapari ug magtinguha sa pagpalambo sa atong kaugalingon matag adlaw aron kita mahimong andam sa pagsugat sa atong Magbubuhat. Sa ngalan ni Jesukristo, amen.