Elder Kelly R. Johnson

General Authority Seventy

Si Elder Kelly R. Johnson makahinumdom pag-ayo sa adlaw nga gitawag siya isip bishop sa edad nga 31. Nianang sama nga adlaw nahiling siya nga adunay Bell’s palsy—usa ka kahimtang diin ang kaunuran sa pikas bahin sa nawong naparalisar o nahuyang.

Lisud kadto nga panahon, dili lamang tungod sa kakulian ug kaulaw nga resulta sa kondisyon apan tungod usab sa iyang daghang bag-o nga mga responsibilidad. Apan kanang lisud nga panahon nahimong usa ka panalangin.

“Wala masayud kon unsa ang sitwasyon sa kadugayan, nakapalambo ko og kalooy sa mga tawo nga nagpabilin kanako sa tibuok nakong kinabuhi,” miingon siya. “Nakakat-on gyud ko nga ang mga tawo makasinati og lisud ug subo nga mga butang nga dili nila makontrolar nga makaapekto sa ilang mga abilidad, mga pagbati, ug pagsalig.”

Usahay, dili sayon ang pagserbisyo diha sa Simbahan sa Ginoo. Apan sama nga ang mga disipulo sa Manluluwas “diha-diha gibiyaan nila ang ilang mga laya” (Mateo 4:20) sa pagsunod Kaniya, “bisan unsa nga ipabuhat kanamo, kami andam sa pagbuhat niini,” miingon si Elder Johnson.

Bisan asa siya o ang iyang pamilya tawagon sa Ginoo, moadto sila uban sa andam nga kasingkasing ug hunahuna, magtinguha nga makakaplag sa maayo bisan unsa pa ang ilang kahimtang.

Si Kelly Ray Johnson natawo sa Pleasant View, Utah, niadtong Enero 16, 1963, ngadto kang Harold Raymond Johnson Jr. ug Helen Cragaun Johnson. Nagdako siya sa Ogden, Utah, ug naminyo kang Teressa Lynn Bartrum sa Salt Lake City Temple niadtong Marso 27, 1986. Sila adunay lima ka mga anak.

Si Elder Johnson migradwar gikan sa Weber State University niadtong 1987 sa bachelor of science degree sa accounting ug nakadawat sa iyang master of business administration degree gikan sa Brigham Young University niadtong 1989. Nakatrabaho siya isip usa ka forensic accountant alang sa KPMG International Cooperative ug sa labing ulahi nagtrabaho isip forensic accountant ug partner sa Norman, Townsend, and Johnson.

Si Elder Johnson, kinsa nagserbisyo isip Area Seventy sa panahon sa iyang pagkatawag, nakaserbisyo isip presidente sa misyon sa Thailand Bangkok Mission, diin didto siya miserbisyo sa iyang full-time nga misyon, ug isip presidente sa stake, magtatambag sa kapangulohan sa stake, high councilor, bishop, presidente sa elders quorum, ward mission leader, ug magtutudlo sa pagpangandam sa misyonaryo sa stake.