Elder William K. Jackson

General Authority Seventy

Human sa 23 ka tuig isip usa ka regional medical officer sa U. S. Foreign Service, si William K. Jackson gihangyo nga mopaambit sa 20 ka labing nindot nga kasinatian niya samtang nagpuyo ug nagtrabaho sa labing hilit nga mga rehiyon sa kalibutan.

Samtang naghunahuna siya niana nga hangyo sa wala pa ang seremonya sa iyang pagretiro, nakaamgo siya nga “ang tanang 20 sa akong labing nindot nga 20 adunay kalabutan sa Simbahan o sa pamilya,” miingon siya.

Si William King Jackson natawo niadtong Marso 29, 1956, sa Washington, D.C., USA, ngadto kang E. William ug Lois Andrey Jackson. Nagdako siya sa Ojai, California, USA, apan tungod sa boluntaryo nga trabaho sa iyang mga ginikanan, nakaeskwela usab siya sa Honduras, Algeria, ug Afghanistan.

Human makaserbisyo og misyon sa Bolivia La Paz mission, nahimamat ni Elder Jackson si Ann Kesler niadtong ting-init sa 1977.

“Kadto gugma sa unang pagkakita alang kanako,” miingon siya. “Akong gigahin ang nahabilin niana nga ting-init sa pagpaningkamot nga makombinser siya nga ako ang lalaki para niya.”

Nagminyo sila niadtong Disyembre 29, 1977, sa Los Angeles California Temple. Sila ang mga ginikanan sa walo ka bata, diin ang tulo sinagop—gikan sa India, Nepal, ug Cambodia.

Si Elder Jackson mieskwela sa Brigham Young University, nakaangkon og bachelor of science degree gikan sa University of California, Berkeley, ug nakadawat og doctor of medicine degree gikan sa University of California, San Francisco, niadtong 1983.

Human sa iyang medical residency, mitrabaho sila sa gawas sa nasud sulod sa 26 ka tuig. Mitrabaho siya sa labing ulahi isip medical director sa Valley Family Health Care, nga adunay mga lokasyon sa Idaho ug Oregon, USA.

Sa dihang nagpuyo sila sa gawas sa Estados Unidos, siya ug si Sister Jackson migahin sa kadaghanan sa ilang panahon taliwala sa unang henerasyon nga mga miyembro sa Simbahan.

“Usa sa labing dako nga mga bahin sa akong pagpamatuod sa ebanghelyo mao ang pagtan-aw sa mabuhat sa ebanghelyo ngadto niini nga mga tawo nga among gimahal,” miingon siya. “Nakausab kini kanila.”

Si Elder Jackson nakaserbisyo isip Area Seventy, presidente sa India New Delhi Mission, presidente sa Young Men sa branch, magtutudlo sa institute, ug magtutudlo sa Doktrina sa Ebanghelyo. Sa panahon sa iyang pagkatawag aron mahimong General Authority Seventy, nagserbisyo siya isip bishop.