Ahmad S. Corbitt

Unang Magtatambag sa Kinatibuk-ang Kapangulohan sa Young Men

Si Ahmad S. Corbitt, 57, natawo niadtong Agosto 1962 ngadto kang James Earl Corbitt ug Amelia Corbitt. Ang pamilya kabus ug nagpuyo sa mga housing project sa Philadelphia, Pennsylvania, USA, nga gilibutan sa mga krimen ug kagubot sa mga gang. Dili luwas ang pagbiyahe gikan sa kasilinganan ngadto sa laing kasilinganan.

Apan ang espirituhanong mga impresyon sa iyang inahan migiya sa 10 ka anak niini ug mipabilin kanila nga luwas. Nahibalo siya kon kanus-a angay nga magdula ang iyang mga anak sa gawas ug kanus-a sila angay nga magpabilin sa sulod.

Kana nga espirituhanong kasensitibo ang migiya kaniya sa wala madugay sa pagdapit sa mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw ngadto sa iyang panimalay. Sa hapit tibuok niyang pagkabata ug pagkabatan-on, si Ahmad ug ang iyang pamilya misimba uban sa Nation of Islam [Nasud sa Islam], ug sa kadugayan nabunyagan siya isip Protestante. Apan karon gibati niya nga gimahal sa lokal nga kongregasyon sa mga Santos sa Ulahing mga Adlaw.

Ang iyang inahan ug pipila ka igsoon nabunyagan pagkasunod bulan. Niadtong Agosto 16, 1980, sa iyang ika-18 nga adlawng natawhan, si Ahmad usab nagpabunyag. Ang iyang ama-ama, si Henry Brandford Campbell, mipasakop sa Simbahan pagkasunod tuig.

“Dili gayud kadto mahitungod kanamo,” miingon siya. “Mahitungod kadto sa Dios ug sa unsay gusto Niya nga among buhaton. Andam kami nga magmapaubsanon ug bukas. Gigiyahan Niya kami.”

Human mitambong sa Ricks College ug miserbisyo sa Puerto Rico San Juan Mission gikan sa 1982 hangtud 1984, nahimamat niya si Jayne Joslin atol sa usa ka temple trip sa mga young single adult. Ang magtiayon naminyo niadtong Agosto 24, 1985, sa Washington D.C. Temple ug karon ginikanan sa unom ka mga anak.

Sa misunod nga siyam ka tuig, mitrabaho siya sa adlaw ug mieskwela sa gabii, nakaangkon og mga degree gikan sa The Richard Stockton College sa New Jersey ug Rutgers University Law School.

Nakaserbisyo siya isip magtatambag sa kapangulohan sa stake, presidente sa stake, high councilor, ug presidente sa Dominican Republic Santo Domingo East Mission.

Si Brother Corbitt nakatrabaho isip trial lawyer, sa public relations ug isip direktor sa New York Office of Public and International Affairs sa Simbahan. Kasamtangan siya karong nagtrabaho sa Missionary Department sa Simbahan.