Elder Thierry K. Mutombo

General Authority Seventy

Si Elder Thierry K. Mutombo adunay lig-ong pagpamatuod sa ebanghelyo sa dihang nadawat niya ang iyang mission call sa batan-on pa. Nabunyagan uban sa iyang pamilya sa dihang 10 anyos siya, iyang nasaksihan ang gamhanang paagi nga ang ebanghelyo miusab sa iyang pamilya.

Apan bisan sa iyang pagpangandam sa pagserbisyo og misyon sa Côte d’Ivoire Abidjan Mission, siya walay lig-on nga pagpamatuod sa Basahon ni Mormon. Wala pa gayud siya makabasa niini sukad.

Ang dinasig nga bishop ni Thierry mihagit kaniya sa pagbasa sa Basahon ni Mormon matag adlaw sa dili pa mobiya sa iyang misyon. Gihatagan pa gani niya si Thierry og yawe ngadto sa lokal nga meetinghouse sa simbahan aron makatuon siya nga malinawon.

Si Thierry mibasa matag adlaw sulod sa tulo ka bulan. Sa dihang misulod na siya sa natad sa misyon, wala lamang siya makaangkon og lig-ong pagpamatuod sa Basahon ni Mormon, apan siya usab nakapalambo og mga gawi sa pagtuon nga nakatabang kaniya isip misyonaryo.

“Ang labing mahinungdanong himan nga anaa kita sa pagdala sa katawhan ngadto sa kahayag sa ebanghelyo ug pagpundok sa nagkatibulaag nga Israel mao ang Basahon ni Mormon,” miingon siya.

Si Thierry Kasuangi Mutombo natawo sa Kinshasa, Democratic Republic of Congo, niadtong Enero 31, 1976, ngadto kang Antoine Kasuangi Mutombo ug Marie Therese Matsanga Mutombo. Giminyoan niya si Tshayi Nathalie Sinda sa sibil nga seremonya niadtong Nobyembre 29, 2002. Wala madugay nasilyo sila sa Johannesburg South Africa Temple niadtong Nobyembre 19, 2004. Sila adunay unom ka anak.

Si Elder Mutombo migradwar niadtong 2010 gikan sa University of Cepromad nga adunay degree sa business management ug niadtong 2012 nga adunay bachelor‘s degree sa human resources management. Mitrabaho siya alang sa Simbahan didto sa Democratic Republic of Congo isip manager sa Family History ug Human Resources Department ug isip supervisor sa Materials Management Department.

Sa panahon sa iyang pagkatawag isip General Authority Seventy, si Elder Mutombo nagserbisyo isip presidente sa Maryland Baltimore Mission. Kaniadto nagserbisyo siya isip presidente sa stake, magtatambag sa kapangulohan sa stake, ward mission leader, magtutudlo sa Sunday School, ug executive stake secretary.