Jos Histri: Wan Ples blong Paoa mo Insperesen
Taem yumi lanem moa abaot Ol Sent long bifo, bae yumi kam moa strong blong winim misin blong yumiwan olsem wan gel o boe blong God.
Raet: foto blong wan woman we i kam long Getty Images; raet saed evriwan: Addison Pratt mo jenol blong hem, Franis Polinesia, 1844
Elda Cook: Jos histri i save stap olsem wan impoten ples blong karem fet, be blong sam pipol, oli save andastanem rong o no luksave. Sam pipol oli iven talem rong ol stori blong bifo blong bildimap tu tingting.
Blong stap lanem ol stret histri blong Jos, bae yumi joenem hat blong yumi tugeta wetem Ol Sent blong yestedei mo tedei. Bae yumi faenem ol eksampol blong ol pipol we oli no stret evriwan olsem yu mo mi we oli bin go fored wetem fet mo letem God blong i wok tru long olgeta blong mekem wok blong Hem. Mi promes se blong stap stadi histri blong Jos i save mekem fet blong yumi i kam bigwan moa mo gat gladhat ia blong laef folem gospel moa fulwan?
Stori blong Restoresen i wan stori blong sakrifaes, strong tingting, mo fet. Yumi evriwan i pat blong Restoresen mo Jos histri. Wanwan long yumi i gat wan misin blong mekem long laef ia we bae i helpem gospel ia blong fulumap wol. Taem yumi lanem moa abaot Ol Sent long bifo, bae yumi kam moa strong blong winim misin blong yumiwan olsem wan gel o boe blong God.
Long ova long 24 yia we mi bin wok olsem wan Jeneral Atoriti, gladhat ia blong Ol Elda ia i bin blong stap klia olsem we i save stap, long tugeta saed blong Jos histri mo long doktrin. Mifala i filim se efot ia blong putumaot ol niu risos—speseli The Joseph Smith Papers, insaed long Gospel Topics Essays, Church History Topics, mo naoia buk ia Ol Saints1—i wan gudfala wei blong mekem o pipol blong stadi ol samting we i stap insaed long hem we oli tru mo bae i helpem olgeta blong andastanem gospel blong Jisas Kraes long wan wei we i tru.
Wan long ol fevret stori blong mi insaed long Saints hem i stori blong Addison Pratt we i stap go long Saot Pasifik. Hem i bin mekem samples 60 baptaes. Waef blong mi, Mary, mo mi, i gat janis blong visitim Ol Ostral Aelan, Franis Polinesia, long ples we Addison Pratt i bin tij long hem.
Wan long ol eksperiens blong mi we mi bin gat we i naes tumas hem i blong harem wan yang woman long we i talem: “Mi mi wan namba seven jeneresen memba blong Jos.” Addison Pratt i bin baptaesem wan bubu blong hem blong bifo, bifo Ol Sent i bin go long Yuta.
Long wea ples we yu stap long hem long wol ia, wanem laen we yu kamaot long hem, yu yu impoten, yu yu pat blong Jos histri. Mifala i nidim yu tumas mo wantem yu. Bae yu yu blesem laef blong ol pipol.
?From wanem Jos i no tokbaot tumas sam long ol samting we i stap long histri blong hem?
I kam long Kate Holbrook
Lef: pikja droing i kam long David Green
Taem mi gat fo yia, mama blong mi mo bubu woman blong mi i bin wok long Haos blong Bi, long olfala haos blong Brigham Yang long Sol Lek Siti, Yuta. Oli bin tijim mi abaot Brigham Yang mo we hem i bin gat fulap waef. Samples 10 yia afta, mi bin lanem se Josef Smit i bin gat plante waef. Mi no bin lanem abaot ol sia ston we Josef i bin yusum blong help blong transletem Buk blong Momon, kasem taem we mi bin wan adalt. Jos i no bin haedem infomesen ia long mi, be oli no bin givim tumas histri infomesen taem mi bin yangfala.
Wanem we mi bin lanem long ol miting long Sandei mo long seminari klas, hem i wanem i stamba wok blong Jos. Mi bin lan blong sakem sin. Mi bin lan blong mekem laef blong mi i stret gud wetem gospel blong Jisas Kraes. Mi bin lanem hao blong gat wan gud rilesensip wetem Papa we i stap long Heven. Olgeta ia, oli ol samting insaed long laef blong mi, we mi holem i impoten tumas. Mi save se, long sam pipol, bae i soa tumas blong lanem abaot wan samting we yu ting se yu sapos blong save, be yu no save. From hemia nao, Matt mo mi i mekem wok we mitufala i stap mekem. Mitufala i hop se eksperiens ia, long ol pipol, bae i kam pat blong wanem i pas finis, from se yumi gat buk ia, Ol Sent, we i givimaot wan ful histri long ol pipol.
?Olsem wanem yumi save sapos wan sos abaot histri blong Jos, i wan sos we yumi save dipen long hem?
I kam long Matt Grow
Mi wok blong Jos long ol las naen yia mo mi stap raet abaot histri. Mi bin luk fasin we ol Jeneral Atoriti blong yumi oli gat wetem histri blong yumi. Ol storian oli no abaot “?Olsem wanem yumi haedem o blokem histri infomesen?” Be, ol storian oli abaot “?Olsem wanem yumi mekem histri ia i stap blong man i save ridim mo andastanem?”
Yumi evriwan i save se jalenj, long taem ia blong yumi tedei we i abaot infomesen, i no blong faenem ol ansa—ol ansa oli raonem gud yumi—be, hem i blong luksave bitwin ol gud ansa mo ol nogud ansa, gud infomesen mo nogud infomesen. I gat plante storian onlaen abaot histri, mo plante long ol storian ia oli givim moa faea bitim laet.
Lukaot gud abaot ol ples we infomesen ia i kamaot long hem; lukaot gud long infomesen ia se i jes wantem blong brebrekem wan pipol. Be, yufala i lukaotem ol ples blong kasem infomesen we oli stanap long ol histri we ol pipol ia nomo oli putum i stap, mo oli stret long olgeta. I rili isi blong pleiplei gem ia, “Ah mi kasem yu” wetem wanem i pas finis; i isi blong karem wan kwot o wan smol samting we i bin hapen mo no tokbaot hao i kam blong hapen, mo mekem se smol samting ia i kam bigwan mo man i mas lukaot long hem.
Olsem wan we i stap raetem histri, mi traem blong folem advaes blong wan man Inglan we i stap raetem buk. Hem i talem: “Wanem i pas bifo, i wan nara kantri: oli mekem samting i defren longwe” (L. P. Hartley, The Go-Between [1953], prologue). Hemia i minim se taem yumi stap gobak blong luk wanem i bin hapen bifo, yumi no wantem stap olsem wan “doti turis.” Yumi wantem traem blong andastanem ol pipol long taem we oli bin stap laef long hem, wetem ol kalja blong olgeta long tetaem ia. Yumi wantem gat longfala tingting wetem wanem we yumi luk se oli ol rong blong olgeta. Yumi wantem blong gat tingting i stap daon from save blong yumiwan i we i no longwe tumas. Mo yumi wantem gat spirit blong jareti abaot wanem i bin hapen bifo.
Josef Smit mo Buk blong Momon
Taem mi bin yangfala, mifala i bin tingting se bigfala brata blong mifala bae i no save go long wan misin from wod i gat raet blong sendem wan yang man nomo i go long misin long wan taem. Evri narawan bae i mas stap blong go joenem ami. Be bisop mo stek presiden blong mifala, tufala i faenem se oli save sendem moa yang man. Mekem se tufala i toktok long brata blong mi long saed ia, mo hem i kambak hom, mo talem long papa mo mama blong mi.
Papa blong mi i wan gudfala man, be hem i no aktiv long Jos. Ansa blong hem, i no—from sam defren kaen risen. Hem i no stap agensem Jos o wan misin, be brata blong mi i stap rere blong go long medikol skul. Papa blong mi i talem: “Yu bin mekem yuwan i rere blong go long medikol skul. Yu bin tekem ol klas. Yu save mekem moa gudfala samting sapos yu go long medikol skul bitim we yu go long wan misin.”
Long naet ia, fetful mo gudfala brata blong mi, i sidaon wetem mi, mo mitufala i toktok. Mitufala i faenem se i gat trifala kwestin we bae i talem wanem ansa blong givim long papa blong mifala. Faswan: “?Jisas Kraes, i Sevya blong wol o nogat?” Nambatu: “?I rili tru we Buk blong Momon i tok blong God.?” Nambatri: “?Josef Smit i rili wan profet?” Mi bin luksave se ol ansa long ol trifala kwestin ia bae i jenisim evri desisen we bae mi mi mekem long ful laef blong mi.
Mi bin lavem Sevya oltaem mo mi bin ridim Buk blong Momon, be mi luksave hamas ol ansa ia oli impoten, nao, mi bin prea long naet ia mo kasem, tru long Tabu Spirit, wan gudfala ansa long ol kwestin ia. Jisas Kraes i Sevya; Buk blong Momon hem i toktok blong God; mo Josef Smit i wan profet. Mi testifae se ol samting ia oli tru.
?From wanem ol stori blong Fas Visen blong Josef Smit oli defren smol?
I kam long Matt Grow
Josef Smit i bin raetem o i bin askem olgeta we oli raet blong hem blong oli raetem fo defren stori abaot Fas Visen. Ol stori ia oli talem wan semfala stori nomo, be sam samting nomo i defren. Hemia i no sapos blong mekem yumi sapraes. Sapos evri stori ia oli semsemmak, bae taem ia nao, mi, olsem wan man blong raetem histri, bae mi gat tu tingting, from se hemia i no wei we memori blong man i wok. Plante taem yumi luk semfala paten long ol stori insaed long histri o insaed long ol skripja Ol Wok 9:7; 22:9).
Mo tu, kipim long maen se i had tumas blong putum wan tabu eksperiens long toktok. Josef Smit i singaotem lanwis, se hem i wan “smol, bunbun kalabus” (insaed long History of the Church, 1:299). Tingbaot ol eksperiens blong yuwan we oli moa tabu. ?Hem i isi o no blong raetem evri stret samting we i hapen long ol toktok? Yumi sapos blong selebret se yumi gat plante defren stori from se oli givim yumi ol niu wei blong tingting mo ol niu wei blong lukluk samting. Go ridim ol fo fasfala stori blong Fas Visen we oli stap long ol “Gospel Topics”. Taem yu mekem olsem, bae i mekem yu talem tangkyu moa long wanem i bin hapen long dei ia.
?Wanem nao rol blong Yurim mo Tumim insaed long translesen blong Buk blong Momon?
I kam long Kate Holbrook
Lef: pikja droing i kam long David Green
Josef Smit i bin transletem Buk blong Momon tru long presen mo paoa blong God. Yurim mo Tumim, we oli tokbaot insaed long Buk blong Momon, oli bin berem wetem ol buk ia. Taem we Moronae i bin givim ol buk we oli wokem long gol i go long Josef, hem i bin givim tu Yurim mo Tumim. Sia ston ia, we Josef i bin yusum tu blong transletem ol toktok, oli no bin berem wetem ol buk ia. Hem i bin wan samting we Josef i bin faenem hemwan, sam yia bifo, we i bin helpem hem blong i filim revelesen long saed blong spirit. Mekem se hem i yusum tugeta samting ia.
Ema Smit, wan long olgeta we i stap raet blong hem, i bin tingbaot afta se eni taem we Josef i sidaon blong stat blong mekem translesen, bae hem i no askem: “?Mi stap wea nao? ?Mi bin stop wea?” Bae hem i stat nomo long stret ples we hem i bin stop. Sapos yu luk long pej blong jenol blong Josef Smit, we hem nomo i raetem tri yia afta we hem i bin transletem Buk blong Momon, hem i fulap long ol toktok we hem i krosemaot, ol tingting we i no finis, mo ol sentens we oli hafhaf. Taem yu lukluk long wan pej blong Buk blong Momon we hem i talem mo man i raetem, i no gat eni long ol samting ia. Hem i fulwan, lanwis i naes—i gat ful sentens, mo i no gat samting we oli krosemaot.
Evri samting ia i intresting blong tingting long hem, be wanem i mata moa i wanem i stap insaed long Buk blong Momon. Buk blong Momon i ples we King Benjamin i bin tijim mi blong gat, faswan, open hat mo tingting, be i no blong gat jajmen; i ples we Alma i tijim mi wanem mining blong kasem baptaes, wanem mi promes blong mekem blong ol nara Sent, mo wanem blong mekem wetem olgeta. Buk blong Momon i ples we Momon mo Moronae i tijim mi abaot hamas loa blong jastiti i impoten, mo wanem mi mas mekem blong kasem hemia. Buk ia i jenisim ol samting insaed long mi we i mekem huia mi tedei, mo wei we mi lukluk long wol.
Fasin blong Man i Maredem Fulap Woman
Mi wantem tokbaot tri poen abaot fasin we man i maredem fulap woman. Faswan, hem i klia se i bin gat plante praktis blong fasin blong man i maredem fulap woman. I bin gat plante lav mo yuniti, be tu, i bin gat sakrifaes, mo ol papa mo mama long ol mared ia oli bin tijim ol pikinini blong olgeta blong mekem sakrifaes. Plante long ol pikinini ia we oli kamaot long ol kaen mared ia, oli bin tekem gospel blong Jisas Kraes i krosem wol, mo oli bin blesem plante laef.
Nambatu, i bin gat sam, olsem Vilate Kimball, we i bin kasem revelesen blong hemwan—bifo oli bin save fulwan wanem i bin stap kam—se doktrin ia i bin kam long God.2
Mo nambatri, long ol senia kaonsel blong Jos, i bin gat wan filing se fasin blong man i maredem fulap woman, olsem we oli bin stap mekem bifo, i bin gat stamba tingting blong hem i stap. Yumi sapos blong givim ona long Ol Sent ia, be stamba tingting ia, i kamtru o i hapen finis nao.
Naoia, i gat ol kwestin we oli no gat ansa. Be mi wantem yufala blong save se yumi gat wan Papa long Heven we i gat lav, we i gat wan plan we i stret evriwan, we plan ia i wan plan blong stap hapi, mo yumi gat wan Sevya we i bin mekem evri samting blong yumi. Yumi save trastem Tufala.
?From wanem oli bin praktisim fasin blong maredem fulap woman long ol fas yia blong Jos?
I kam long Kate Holbrook
Instraksen long Buk blong Momon long saed blong fasin blong stap maredem fulap woman, i stap talem se tingting blong Lod blong ol pipol blong Hem, i blong wan man i maredem wan woman nomo; be i gat ol taem we bae i no olsem; ol taem we God i givim oda blong oli praktisim fasin blong maredem fulap woman blong resemap wan pipol we i stret mo gud (luk long Jekob 2:30). Hemia i wan taem ia nomo we Josef Smit i bin kasem oda blong statem hemia. Josef i pulum leg blong hem blong plante yia blong statem praktis ia, be long en, hem i bin mekem from se hem i bin wantem blong obei long komanmen we God i bin givim long hem. Hem i bin traem blong praktisim fasin blong maredem fulap woman long medel blong ol yia 1830, be rili, hem i long 1841, we sloslo, mo long wan moa ofisol fasin, we hem i stat blong putum hemia long praktis wetem olgeta we hem i bin stap wok wetem. Olgeta oli sek. Afta, oli bin prea strong long Papa blong olgeta we i stap long Heven blong oli andastanem prinsipol ia, mo oli bin kasem witnes long saed blong spirit, blong olgetawan, se hemia i bin raet blong olgeta oli mekem long tetaem ia.
Fasin blong maredem fulap woman, we oli bin praktisim long wan ofisol fasin blong 50 yia, i bin wan samting we ol pipol oli bin save jusum. Ol man blong stadi, oli stap traem yet blong faenemaot hamas adalt Ol Lata-dei Sent oli bin stap praktisim fasin blong maredem fulap woman, be yumi save se i wan smol namba blong Ol Sent nomo. Mo yumi save se plante long olgeta oli bin ol strong memba blong Jos blong yumi. Long 1890, Presiden Wilford Wudrof (1807–98) i putumaot wan pablik dikleresen blong endem praktis blong fasin blong maredem fulap woman. Taem sam pipol oli harem pablik dikleresen ia, oli harem gud tumas. Fasin blong maredem fulap woman, i bin had long olgeta. Taem sam narawan moa oli bin harem pablik dikleresen ia, oli harem nogud tumas. Oli bin sakrifaes long plante samting, mo oli bin kasem testemoni abaot prinsipol ia.
Sam memba blong Jos oli stap askem olgetawan se, praktis ia blong bifo, blong gat fulap woman, bae i minim wanem long nekis laef. Ol lida blong Jos oli bin tijim se fasin blong maredem fulap woman, i no wan nid blong kam olsem wan god, o blong kasem glori ia we i no save finis. Nomata we, mi, miwan, mi glad se fasin blong wan man i maredem wan woman nomo, i rul we i stap, mo fasin blong maredem fulap woman i wan samting we i hapen wanwan taem nomo, mi no ting nating long ol testemoni mo stret fasin blong obei blong ol bubu blong yumi bifo, we oli bin praktisim prinsipol ia. Oli bin obei, mo oli bin gat wan testemoni we i bin raet.
Tempol mo Ol Kavenan
Antap: Ketlan Tempol, i kam long Al Rounds; raet: Moses, Elaeas, mo Elaeja, i kam Gary Ernest Smith
Long Ketlan, Ohaeo, wan long ol bigfala samting we i bin hapen, i blong oli bildim mo dediketem Ketlan tempol. Dedikesen prea, we Josef i bin kasem tru long revelesen, i kamaot long 109 seksen blong Doktrin mo Ol Kavenan. Long prea ia, hem i askem Lod blong akseptem ol wok blong han mo sakrifaes blong Ol Sent, blong bildim tempol.
Wan wik afta long dedikesen blong tempol, Josef Smit mo Oliva Kaodri, tufala i gat wan nara visen. Hemia i bin hapen long Ista, we i taem blong Pasova tu. Lod i bin kam long wan visen mo i bin akseptem haos ia. Hem i talem long Ol Sent se oli mas glad from “we oli bin bildim haos ia long nem blong [Hem] wetem strong paoa blong olgeta” (Doktrin mo Ol Kavenan 110:6). Afta we visen ia i klos, trifala profet blong bifo oli kamkamaot: Moses, we i putumbak ol ki blong kam tugeta blong Isrel aot long ol fofala pat blong wol; Elaeas, we i bin komitim dispensesen blong gospel blong Ebraham; mo Elaeja, we i bin putumbak ol ki blong siling paoa (luk long Doktrin mo Ol Kavenan 110:11-16).
Restoresen blong ol ki ia, i wan mas blong mekem ol stamba tingting blong Lod oli kamtru. Yumi nidim Buk blong Momon, be tu, ol ki ia mo ol tempol odinens. Olgeta ki ia oli neva bin moa impoten bitim tedei.
Mi bin luk se taem wan long Olgeta Twelef Aposol, oli singaotem hem i kam profet, hat blong hem i tanem i go long ol odinens blong tempol long wan bigfala wei. Mi bin gat spesel janis ia blong stap long dedikesen blong Nauvu Ilinoa Tempol wetem Presiden Gordon B. Hinckley (1910–2008). Mi tingbaot se hem i tajem hat blong hem se bae oli bildim tempol ia mo hamas i bin impoten long hem blong tekem ol tempol i go long Ol Sent. Presiden Thomas S. Monson (1927–2018) i bin gohed wetem wok ia mo i bin kasem semfala insperesen we i kam long heven, we Presiden Hinckley i bin gat. Mo yumi bin luk insperesen ia long wan bigfala wei wetem Presiden Russell M. Nelson. Wok blong profet i kam long hem, mo hem i bin gat moa filing mo tingting se ol odinens blong tempol oli moa impoten.
Wan long ol fas mesej olsem Presiden blong Jos i bin blong leftemap tingting blong ol pipol blong go long tempol, kasem ol odinens blong olgeta, mo stap long kavenan rod ia. Stret afta long hemia, hem i talem se, sapos wan i bin foldaon mo kamaot long kavenan rod ia from eni risen, blong hem i kambak long rod ia.3
?Olsem wanem wok blong tempol i blesem ol fasfala Ol Lata-dei Sent?
I kam long Matt Grow
Taem we Josef Smit i bin ded, ol wol blong Nauvu Tempol oli no kasem haf wei yet, mo i bin kam klia long Presiden Brigham Yang (1801–1877) se bae oli ronemaot Ol Sent bakegen. Mekem se hem i askem Lod: “?Bae mifala i stap ia mo finisim tempol, from se mi save se bae mifala i mas lego tempol ia stret afta we i finis, o bae mifala i aot naoia?” Ansa i bin kam i klia: “Stap” (luk long Brigham Young diary, Jan. 24, 1845, Church Archives; Ronald K. Esplin, “Fire in His Bones,” Ensign, Mar. 1993, 46). Ol odinens blong endaomen mo blong siling i bin impoten tumas, mekem se Ol Sent oli mas stap.
Mo blong long nekis yia afta hemia, oli bin putum evri samting we oli bin gat insaed long tempol. Kolosap long en, man i bonem hom blong olgeta raon long Nauvu, mo Ol Sent oli stap rere blong muv i go Wes, jes long taem ia we oli stap finisim tempol. Long Disemba 1845, fulap samting long tempol i finis finis, mekem se Ol Sent oli save dediketem haf blong hem, mekem ol endaomen blong olgeta we oli bin klin inaf, mo silim ol hasban mo ol waef tugeta.
Ova long samfala manis afta, oli bin wok dei mo naet blong mekem evriwan oli rere long saed blong spirit from bigfala wokbaot ia i go long Wes. Long mi, hemia i bigwan mo i tabu tumas se mi mi sil, tru long semfala paoa ia, long waef blong mi, ol pikinini blong mi, mo ol jeneresen we oli go fastaem finis, mo ol jeneresen we oli no bon yet i kam long wol. Hemia i wanem Restoresen i mekem i posibol.
?Yu yu save serem wan taem blong Restoresen we i bin mekem testemoni i bin kam strong moa?
I kam long Kate Holbrook
Lef: pikja droing i kam long David Green
Mi tingbaot stori blong Ema Smit, we i stap traem blong ronwe long ol fasin blong agens long Misuri. Misisipi Reva, haf blong hem i kam aes—be aes i no strong inaf blong wan wagun wetem ol pipol mo ol samting we oli gat oli save travel long hem. Hem i wan reva we i bigwan, mo i denja blong krosem. Ema i gat wan pikinini blong sikis yia we i stap holem wan saed blong sket blong hem, wan eit yia we i stap holem narasaed, wan we i gat tu yia we hem i holem long wan han blong hem, mo wan bebi long nara han blong hem.
Tawi blong wan long ol man blong raet blong Josef, i bin somap ol koten bag we oli fasem raon long wes. Insaed long ol bag ia, andanit long sket blong hem, Ema i putum wan kopi ia nomo blong translesen blong Baebol we Josef i bin mekem, mo Josef i bin wok long hemia blong plante manis finis. Wetem ol pepa ia mo wetem ol pikinini blong hem, hem i tekem wan step afta narawan blong krosem reva ia we i aes, wetem hop ia se bae hem i no foldaon long aes ia.
Long mi, hemia i bigfala saen blong strong paoa long tingting mo blong fet—se taem yu nid blong mekem wan samting from samting we yu stap biliv long hem, yu jes muv i go fored, wan leg long fored blong narawan.
Antap: Pikja Foto i kam long Dan Burr; Merikel long Kwensi, i kam long Julie Rogers; Josef Smit long Libeti Kalabus, i kam long Greg K. Olsen
“Stap Glad”
Plante long yufala i gat ol tes mo ol hadtaem. Sam oli kam from se i gat fridom blong mekem joes. Sam oli kam from se i gat wan enemi. Be yufala i nid blong save se yumi gat wan Papa we i stap long Heven we i gat lav, mo Atonmen ia blong Jisas Kraes i save blesem yumi long ol wei we, maet yumi no andastanem fulwan.
Sam long ol man we oli raetem histri, oli talem se namba blong Ol Sent we oli bin ronwe long Misuri i go long Nauvu long taem blong Winta blong yia 1838 kasem 1839, i bin bigwan, i kasem 8,000 man. Hem i bin wintataem. ?Josef i bin stap wea? Hem i bin stap long Libeti Kalabus, wetem hat we i brok from ol samting we Ol Sent oli bin stap gotru long hem. Hem i bin filim se God i lego hem.
Long nogud taem ia, hem i bin kasem sam long ol naesfala skripja—ol seksen 121, 122 mo 123 long Doktrin mo Ol Kavenan. Oli impoten tumas. Mi hop se bae yu go ridim olgeta. Saints i gat wan sot histri blong taem ia.
“Josef i bin prea laod long bihaf blong ol sent ia we oli no gat rong. ‘O Lod, ?kasem wetaem nao bae oli harem nogud from ol fasin we oli rong mo i no folem loa, bifo we hat blong yu i kam sofsof long olgeta, mo ol insaed blong yu i filim lav mo sore long olgeta?’
“‘Boe blong mi, bae pis i stap long sol blong yu,’ Lod i ansa. “Ol samting we oli kam agensem yu mo ol hadtaem blong yu, oli blong smol taem nomo; mo afta, sapos yu mekem gud blong stap strong, God bae i leftemap nem blong yu long heven; bae yu win ova long evri enemi blong yu.’
Lod i talem gud long Josef se Hem i no fogetem Josef. “Sapos ol stret jo blong hel oli open bigwan blong solemdaon yu,’ Lod i talem long Josef, ‘nao yu mas save, boe blong mi, se evri samting ia bae i givim eksperiens long yu, mo bae i blong gud blong yu.’
“Sevya i bin talem bakegen long Josef se Ol Sent oli no save safa i bitim wanem we Hem i bin safa. Hem i lavem olgeta mo i no save mekem sobodi blong olgeta i stop, be Hem i jusum blong i safa wetem olgeta, i tekem ol harem nogud mo krae sore blong olgeta, olsem pat blong sakrifaes blong Hem we i bin pem praes from sin. Kaen safaring ia i bin fulumap Hem wetem sore, mo i bin givim Hem paoa blong givhan, mo mekem evriwan we oli tanem olgeta i long Hem long taem blong tes blong olgeta, oli kam gud moa. Hem i askem strong long Josef blong holemtaet hem, mo i promesem hem blong i neva lego hem.”
Elda Hiba J. Kimbol (1801–68) i ting se ol jastis long Misuri Suprim Kot bae oli lego Josef i fri, be oli disaed blong no mekem. Hiba i gobak long Libeti Kalabus mo oli no letem hem i go insaed long kalabus. Nao hem i singaotem Josef i talem rabis nius long hem.
Josef i bin kaen mo i toktok gud long hem. “Stap glad,” hem i talem. Afta, hem i givim instraksen long Hiba blong “tekem evriwan long Ol Sent oli go longwe olsem we i posibol.”4
I gat wan lesen blong yu long ples ia: stap glad i nomata wanem jalenj yu stap fesem. Sapos i gat samfala samting we oli kam temtem yu, ronwe long olgeta. Dipen long Tabu Spirit. Eksampol blong Josef long Libeti Kalabus mo Ol Sent we oli stap ronwe long Misuri i go long Nauvu, oli ol gudfala eksampol blong paoa mo fet long Lod Jisas Kraes.
Olsem wan Aposol, mi talem witnes blong mi long saed blong Jisas Kraes. Mi mi wan tru witnes we Hem Hem i Hae Tumas. Mi wantem yufala i save se Hem i stap soem rod mo i stap lidim Jos ia long wan wei we bae i blesem yufala evriwan. Mi testifae long yufala se Hem i stap laef.
Blong wajem ful divosen, go long devotionals.ChurchofJesusChrist.org.