Dijitol Nomo
Olsem Wanem Mi Stap Rere From Wan Tempol long India
Oltaem mi bin wantem blong go long tempol. Naoia we profet i bin anaonsem wan tempol long India, mi stap lukluk fored blong taem we mi save kasem ol odinens ia long ples ia.
Taem mi stap groap long India, famli blong mi mo mi, mifala i bin Hindu. Oltaem bilif ia i raonem mi se i gat fulap god blong wosip long olgeta. taem mi yang, mi bin gat ol fren tu, we oli ol Kristin. Oli bin talem long mi abaot wan God ia nomo we i God we i krietem wol ia mo evri pipol. Mi stat blong stap tingting long miwan se from wanem mi stap wosipim fulap god, taem ol narawan oli biliv long wan nomo.
Taem mi stap long hae skul, mi bin gat sam evri dei fasin we i no gud tumas. Mi stap dring fulap, mi no kaen, mo famli blong mi i no glad long fasin blong mi. Mekem se mi bin muv mo statem wan niu laef long Hyderabad, wan siti we i gat fulap janis blong wok.
Mi stat blong filim daon oltaem mo stap miwan from stael blong laef we mi stap laef folem. Be wan dei, mi fas long tu man. Oli eksplenem se oli ol misinari blong Jos Ia blong Jisas Kraes Ia blong Ol Lata-dei Sent mo oli talem long mi abaot gospel blong Jisas Kraes. Mo bakegen, mi lanem abaot wan God ia nomo, we i bin krietem wan plan blong hapines blong evri pikinini blong Hem. Kwiktaem nomo mesej blong tufala i bin fulumap mi wetem hapines mo hop. Mi bin wantem blong save moa.
Naoia mi bin wan memba blong Jos blong seven yia. Mi bin jenis, mi bi witnesem ol merikel long laef blong mi, mo mi bin lanem fulap samting abaot gospel. Mi laekem glad ia we i karem i kam long mi. Be i gat wan impoten pat blong gospel we mi mas eksperiensem yet—hem i tempol.
Stat long taem ia we mi bin lanem faswan abaot tempol, mi bin wantem go long we blong lan mo filim Spirit, blong sil i go long famli blong mi blong taem we i no save finis, mo blong mekem ol kavenan wetem Lod. Be i no gat ol tempol long India, mo mi no bin gat janis blong travel i go long wan yet. I gat fulap Lata-dei Sent long India mo mi bin talem fulap prea we mi no save kaontem, mifala i bin lego kakae, mo mifala i hang strong long fasin blong wet longtaem se wan dei bae i gat wan tempol we bae oli bildim long India.
Long Epril 2018 jeneral konfrens, God i bin ansarem ol prea blong mifala taem Presiden Russell M. Nelson i bin anaonsem se bae oli bildim wan tempol long Bengaluru, India. Bae mi neva fogetem taem ia. Spirit i bin fulumap hat blong mi wetem glad mo wota blong ae i kamaot taem mi harem ol toktok blong profet. Kwiktaem mi talem tangkyu long Papa long Heven blong ansarem ol prea blong mifala. Mo mi glad tumas blong save luk mo go insaed long tempol long sam yia taem nomo.
Mi glad tumas mo praod blog stap olsem wan memba blong Jos blong Jisas Kraes. Mi save se Lod i bin putumbak tru gospel ia long wol tru long Profet Josef Smit. Mi save se tempol i ples we yumi save gro i go moa kolosap long God, blong sil wetem ol famli blong yumi, mo lanem moa abaot stamba tingting blong yumi. Mo taem mi stap wet blong oli bildim tempol long ples ia long India, mi stap wok had blong rere long miwan blong go insaed.
-
Mi stap prea mo lanem hamas mi save mekem abaot tempol, ol kavenan we bae mi mekem, mo ol odinens we bae mi kasem long we.
-
Mi stap askem ol nara memba we oli bin go tru finis long tempol blong givim sam advaes long olsem wanem blong rere long saed blong spirit.
-
Mi stap lanem olsem wanem blong mekem famli histri wok mekem se mi save karem ol nem blong ol bubu blong mi i go long tempol.
-
Mi stap go long klas blong rere blong go long tempol.
Mi wantem rere blong dei ia taem bae mi save go insaed long tempol mo mi mekem i wan fas impoten samting long laef blong mi. Bae mi traehad blong stap klin inaf blong go insaed mekem se mi save kasem ol blesing we Hem i promesem, daereksen, mo ol ansa long ol prea blong mi we mi bin stap wet long hem longtaem finis. Mi no save wet from dei ia.