Lesen blong Haos Naet We I Yusum Samting
Stap Yusum Gud Taem blong Yu
Taem yu putum Lod faswan, bae i gat rum blong evri nara samting.
Ol Pikja Foto i kam long David Habben
?I gat hamas defren aktiviti we oli stap faet blong kasem ae mo tingting blong yu evri dei? Yumi evriwan i gat ol semmak 24 aoa ia blong spendem, !be olsem wanem yumi jusum blong yusum taem ia i mekem bigfala defren!
Presiden Dallin H. Oaks, Fas Kaonsela long Fas Presidensi, i bin talem: “Namba blong ol gud samting we yumi save mekem, i bigwan tumas bitim taem we yumi gat blong mekem olgeta samting ia. Sam samting oli moa gud bitim gud, mo olgeta samting ia nao oli mas kam faswan long laef blong yumi. … Yumi mas lego sam gud samting blong save jusum sam we oli moa gud, o gud evriwan.”1
Long aktiviti ia, bae yu soem wanem i hapen taem yumi mekem wok blong Lod i fas samting we i impoten.
1. Taem blong Fulumap Samting
I gat plante gudfala aktiviti we yumi save yusum taem blong yumi blong mekem. Askem famli blong yu blong serem sam long ol samting we oli stap spendem taem blong olgeta blong mekem evri dei.
Eksplenem se botel kontena ia i ripresentem taem. Ol ston mo sanbij i ripresentem ol defren samting we yumi save mekem wetem taem blong yumi: ol bigfala ston oli ripresentem ol samting we Lod i askem yumi blong putum i kam faswan, olsem skripja stadi, seves, tempol mo famli histri wok, stap go long jos, mo sanbij i ripresentem ol nara gudfala aktiviti, olsem mekem homwok mo spendem taem wetem ol fren.
2. Putum Ol Impoten Samting Olbaot Nomo
Kapsaetem evri sanbij i go insaed long glas kontena fastaem, afta ademap ol bigfala ston antap. Taem yu putum sanbij faswan, i no gat inaf spes blong evri nara bigfala ston—semmak olsem, taem yumi mekem ol nara aktiviti i kam moa impoten bitim ol samting we Papa long Heven i givim oda long yumi blong mekem, bae yumi nomo gat inaf taem blong ol samting we oli moa impoten.
3. Mekem Ol Samting I Foldaon long Stret Ples
Jisas Kraes i givim oda se, “Yufala i no lukaotem ol samting blong wol ia, be yufala i lukaotem faswan blong bildimap kingdom blong God, mo blong stanemap stret mo gud fasin blong hem” (Josef Smit Translesen, Matiu 6:38 [long Matiu 6:33, futnot a]). Tokbaot olsem wanem yu save yusum taem blong yu long ol samting we i moa impoten taem yu stap lukaotem kingdom blong God faswan.
Emti aot glas botel blong yu mo stat bakegen wetem ol semmak samting. Maet ol yangfala pikinini bae oli wantem blong help. Mekem olgeta i putum ol bigfala ston insaed long glas kontena faswan. Taem yu stap ademap sanbij afta, wajem olsem wanem hem i fulumap ol ekstra spes raon long ol bigfala ston kasem taem yu fulumap evri sanbij insaed.
Askem long famli blong yu wanem oli ting se promes ia we Presiden Russell M. Nelson i minim: “Taem yu givim oltaem wan gudfala pat blong taem blong yu, bambae Hem i dabdabolem wanem we i stap.”2
Stap Putum Lod Faswan
Taem yumi stap lukaot blong mekem wanem God i wantem yumi blong mekem faswan, Hem i helpem yumi blong gat inaf taem blong evri nara samting we i nid mo i leftemap tingting. So, sapos yu stap hadwok blong faenem inaf taem blong finisim homwok, developem ol talen blong yu, o gat inaf slip, askem Lod wanem yu save mekem blong putum ol impoten samting faswan long taem blong yu folem plan blong Hem. Putum ol gol tugeta olsem wan famli blong putum wok blong Lod—mo rilesensip blong yu wetem Hem—faswan evri dei.