Spes blong Yumi
Wan Kwaet Voes We I Pus Strong
Ol pikja droing i kam long Toby Newsome
Wan dei taem mi stap mekem misinari wok long ol strit blong Kenya we i fulap long das, kompanion blong mi i toktok long wan woman. Hem i akseptem smol kad we mitufala i givim long hem be i talem long mitufala blong nomo kambak.
Sam dei afta, mitufala i stap long semmak strit, mo mitufala i harem kwaet voes ia blong jekem woman ia. Mi askem miwan, “?From wanem mitufala i stap gobak taem hem i talem long mitufala blong no gobak?” Be mitufala i obei long kwaet voes ia.
Hem i sapraes taem mitufala i kasem long we be i talem se hem i glad blong luk mitufala. Mifala i stat blong tijim wan lesen, be i no longtaem i lid i go long wan raorao blong no agri. kompanion blong mi mo mi i endem lesen wetem wan prea mo mitufala i go mo agri kwiktaem blong nomo gobak. Be stret long nekis dei, bakegen mitufala i harem kwaet voes ia i strong blong mitufala i gobak. Mi no bin wantem blong gobak, be kompanion blong mi i talem se mitufala i mas lisin long Spirit. Mekem se mi solemdaon hae tingting blong mi, mo mitufala i gobak. Taem mitufala i kasem long we, mi bin sek. Woman ia i olsem wan defren man. Laet long fes blong hem i jenis, mo hem i glad blong lisin long wanem mitufala i gat blong talem. Long nekis visit blong mitufala, hem i askem mitufala wetaem bae hem i save kasem baptaes.
Fo wik afta, hem i kasem baptaes mo kam wan memba blong Jos Ia blong Jisas Kraes blong Ol Lata-dei Sent. Afta long konfemesen blong hem, hem i haggem mitufala i talem long mitufala se bae hem i talem tangkyu oltaem from we mitufala i bin gobak. Mi bin lanem se yumi mas oltaem lisin mo mekem folem ol kwaet toktok blong Spirit. Papa long Heven i stap rere long ol pikinini blong Hem blong kasem gospel ia, mo Hem i stap yusum yumi evriwan blong faenem olgeta tru long Tabu Spirit.
Leaha M., KwaZulu-Natal, Saot Afrika
?Wetaem Mi Save Joenem Jos?
Taem mi gat samples faef yia, papa blong mi i lusum fet mo i disaed blong lego Jos. I had tumas, speseli taem mi kasem eit yia blong mi. Mi glad tumas blong kasem baptaes, be afta papa blong mi i talem no. Hem i wantem mi blong wet kasem taem mi olfala moa blong mekem se mi save gud wanem mi wantem givim miwan blong mekem. Mo afta mi bin stap nomo blong luk ol fren blong mi oli kasem baptaes.
Mi tingbaot se mi bin konfius—sapos Jos i tru, ?from wanem oli stopem mi blong kasem baptaes? Olsem wan yangfala, i bin had tumas blong stap luk ol yut oli go long tempol from mi bin wantem blong go tumas. I bin had blong no save tekpat, be oltaem mi save se !bae mi gat janis blong mi yet!
Long Mei 2019, mi kasem baptaes long 16 yia blong mi. Mi tingbaot fulap eksperiens we mi bin gat blong filim stret glad ia we i klin evriwan blong gospel ia mo blong kasem wan testemoni. Hem i wan eksperiens we i spesel tumas, mo long evri trabol we mi gotru long hem blong kasem dei ia, mi save wetem evri hat blong mi se gospel ia i tru mo i bin tru oltaem.
Trinity C., Colorado, YSA
Risen blong Ol Rul
Mi bin glad tumas blong go long yut konfrens, be afta mi faenemaot se i gat fulap rul—eksampol, nogat ol mobael fon mo no go aotsaed yuwan. I luk olsem ol adalt oli stap wajem mifala oltaem. Be mi bin gat wan gudfala taem, mekem fulap fren, wok long wan seves projek, mo lanem abaot gospel.
Long taem blong wan testemoni miting long las dei blong yut konfrens, wan long ol lida i bin toktok abaot hamas hem i lavem mifala, ol yut long stek.
Sapos yu lavem mifala, ?from wanem mifala i gat fulap rul long ples ia? Mi tingting long miwan. Long semmak taem ia, olsem se hem i save ridim maen blong mi, hem i ansarem kwestin blong mi.
Ol lida oli putum ol rul i stap, hem i talem, i no blong hambak long mifala be i blong sefti blong mifala. Long taem we hem i talem hemia, Spirit i bin tajem mi. Mi andastanem se Papa long Heven i givim ol komanmen long yumi from ol semmak risen. Oli no blong hambak long yumi; oli blong helpem yumi blong gobak sef long Hem (luk long Doktrin mo Ol Kavenan 82:2–9).
Tabu Spirit i tajem mi mo helpem mi blong save se hemia i tru.
Serge P., Île-de-France, Franis