“?Hu I Sperem Boe blong Mi?”
Mi bin luk miwan we mi stap singaot long man ia we i sperem boe blong mi long trak, be afta, mi stap fes tu fes wetem draeva ia.
Pikja i kam long Ellerie Arnold
Mi jes dropem gel blong mi long haos blong wan fren taem hasban blong mi, Jonathan i ringim mi. Hem i talem long mi se, wan trak i bin sperem boe blong mitufala we i gat 11 yia, Aiden, taem hem i stap krosem rod.
Draeva i tanem long lef long fored blong Jonathan mo i no luk Aiden long baeskel blong hem. Draeva i sperem fored blong baeskel blong Aiden. Hem i flae antap we i stap hang long baeskel yet mo i bangem hed blong hem long saed blong trak taem i foldaon i kam daon. Hem i foldaon long rod wetem baeskel blong hem antap long hem. Laki nomo se hem i stap werem wan helmet. Draeva mo sam nara man oli stop blong help taem Jonathan i stap ringim wan ambulens.
Kwiktaem, maen mo ol filing blong mi i stat blong miks mo mi wari, kros mo konfius. Mi spid i go long ples we aksiden i bin tek ples long hem mo hop blong stap long taem wetem ambulens blong mekem se mi save stap wetem Aiden.
Ol tingting blong rao nogud long draeva oli stap resis tru long maen blong mi. “?Draeva i stap tingting long wanem?” Mi tingting long miwan. “?Oli drong? ?Oli stap lukluk fon blong olgeta?” Mi kros tumas mo wari bitim mak. Mi no save nating se Aiden i kil nogud olsem wanem.
Taem mi kasem ples blong aksiden, ambulens i bin aot finis. I gat tu polis trak nomo mo wan trak i pak long saed blong rod long ples we aksiden i hapen long hem. Wan woman we i wari bigwan i stanap narasaed long trak ia.
Mi wokbaot i go long hem mo askem hem: “?Yu bin sperem boe blong mi?”
Kwaet nomo hem i talem: “Yes mi mekem.”
Mi bin luk miwan we mi stap singaot long man ia we i no lukaot gud mo i sperem boe blong mi long trak, be afta, taem mi stap fes tu fes wetem draeva ia, evri nogud samting i lus. Mi faenem miwan i stap krae mo haggem hem. Hem i talem sori mo mi talem long hem se bae evri samting bae i oraet. Mi faenem afta se hemia ol stret semmak toktok we Aiden i bin talem long hem bifo polis i kam. Long en, Aiden i oraet wetem sam skras mo smosmol kil nomo.
Mi talem tangkyu tumas se long impoten taem ia, Papa blong yumi long Heven i bin blesem mi wetem paoa blong soem fogivnes be i no fasin blong no laekem, nomata we mi no bin askem Hem blong mekem. Mi save se Hem i stap wajem yumi mo oltaem Hem i stap givim help blong Hem long yumi.