Kam Folem Mi: Buk blong Momon
?From Wanem Alma I Serem Stori blong Moses mo Snek We Oli Wokem long Bras?
13–19 Julae
Afta we Alma i komperem tok blong God olsem wan sid (luk long Alma 32:28–43), ol pipol i askem hem olsem wanem oli planem sid ia. Alma i yusum stori blong Moses mo snek we oli wokem long bras long Ol Namba japta 21 olsem wan eksampol blong stap wok wetem fet (luk long Alma 33:19–23).
Wan Kaen blong Kraes
Wan kaen i wan samting we ripresentem o haed biaen long wan samting o man. Taem ol posen snek oli bin kakae Ol Man blong Isrel, Moses i bin leftemap snek blong hem we oli wokem long bras, we i bin kam olsem wan Kaen blong Kraes. Evriwan we i bin mekem mo wok folem fet i bin lukluk i long hem mo i hilim olgeta, semmak olsem evriwan we oli mekem mo wok folem fet blong olgeta long Jisas Kraes bae Hem i hilim olgeta long spirit.
Sam Oli Mekem Hat blong Olgeta I Strong
Nomata i simpol olsem we yumi save luk, sam pipol oli mekem hat blong olgeta i strong mo no akseptem, mo olsem wan risal we snek i kakae olgeta, oli ded. ?From wanem oli no lukluk? (Luk long Alma 33:20). ?Wanem hemia i save tijim yumi abaot fet mo fasin blong no biliv?
?Bae Yu Save Kasem Hiling?
Sapos yu save kasem hiling from yu mekem wan simpol samting olsem blong lukluk nomo, ?bae yu no wantem mekem? Alma i putum kwestin ia stap mo invaetem yumi blong lukluk i go long Sevya taem yumi stap biliv long Hem (luk long Alma 33:21–22).