Ol Yang Adalt
From Wanem Papa long Heven I Wantem Mi blong Kasem Wan Edukesen
Nomata wanem ol samting we hat blong yumi i wantem we i stret mo gud, Papa long Heven bae i givim wan wei long yu blong yu kasem olgeta.
Stat long taem we mi smol, oltaem mi bin wantem blong mekem Papa blong mi long Heven mo famli blong mi blong naoia mo long fiuja i glad long mi. Mi bin wantem blong kasem evri edukesen we mi save kasem blong mekem miwan mo laef blong mi i kam moa gud.
Long kantri blong mi, Peru, kwaliti edukesen i sas tumas mo, long sam eria, yu no save kasem nating. Famli blong mi i no bin gat evri risos blong sapotem edukesen blong mi tu. Be papa mo mama blong mi i bin tijim mi se blong stap wok had, stap strong, mo stap askem Papa long Heven from help i save mekem ol samting we hat blong yumi i wantem we oli stret mo gud i kam tru. Mo mi bin plan blong wok had.
Long praemeri mo hae skul, mi bin strong long ol stadi blong mi blong save mekem miwan i kam antap moa evri yia. Afta long hae skul, oli akseptem mi long bes yunivesiti blong Peru mo mi bin kasem wan gud skolasip. Taem mi stap long we, mi bin wok wetem sam oganaesesen, mo tu, wan trening wetem wan wol oganaesesen, mo gat janis blong lidim fulap kaenkaen projek.
Long taem blong trening ia, mi bin filim se bae i wan bigfala mo gudfala janis blong mi blong kasem wan edukesen long Inglis. Mekem se mi disaed blong go long Brigham Yang Yunivesiti—Aedaho. Mi filim i bin had, be mi save se Papa long Heven bae i helpem mi blong winim gol ia—mi jes nidim blong trastem Hem mo mekem pat blong mi.
Wan Jenis long Ol Plan
Oli bin sendem mi i go long BYY–Aedaho, be long taem blong stap mekem aplikesen, mi filim wan strong tingting mo filing se mi mas go long wan misin bifo mi go long we. Mekem se mi bin folem wil blong Papa long Heven mo oli singaotem mi blong wok long Trujilo, Peru. Taem mi gobak hom, mi plan blong gobak long yunivesiti long Peru from mi filim se mi save kasem wan digri longwe hariap. Be, mi faenemaot se oli no bin akseptem ol skolasip blong mi from mi bin lego ol stadi blong mi i bitim wan yia blong go long misin blong mi.
Mi bin harem nogud tumas mo mi lus. Mi no bin save wanem blong mekem. Mi no save mi bin kasem strong tingting blong go long wan misin sapos hem i minim se bae mi lusum janis blong mi blong kasem wan yunivesiti digri.
Be wan dei, mi tingbaot we misin presiden blong mifala i stap talem long mifala abaot BYY-Pathway Worldwide. Hem i bin invaetem mifala blong mekem Inglis blong mifala i kam antap moa mo blong gohed long janis ia taem mifala i kambak long haos—!mo mi mekem!
Wokbaot blong Mi wetem BYY-Pathway Worldwide
Mi save se blong misin presiden blong mi i tokbaot BYY-Pathway i no jes hapen nomo olsem. Taem mi statem Pathway program, i bin nidim mi blong travel kolosap tri aoa evri wik blong mit wetem grup blong mi. Mi sakrifaes fulap, be mi save se blong kasem wan edukesen i impoten tugeta long mi mo long Lod. Mo ol sakrifaes ia i lid i go long plante blesing.
BYU-Pathway Worldwide hem i bin windo blong janis ia we mi stap lukaotem. Hem i givim akses long mi long edukesen long wan praes we mi save pem, i mekem mi save gat inaf taem blong holem wan wok, mo i helpem mi blong gat wan edukesen long Inglis. Mo tru long evri samting, mi bin faenem ol gudfala fren we oli leftemap tingting blong mi blong no fraet mo gohed blong wok from ol gol blong mi. Mi filim mi moa strong long saed blong spirit mo mi kam wan disaepol blong Jisas Kraes we i moa gud.
Long en, mi fas studen blong wan defren kantri blong kasem wan bajela digri tru long BYU-Pathway Worldwide. Edukesen i bin openem fulap naesfala janis blong mi. Naoia mi wan welfea mo speselis blong stap dipen long yuwan blong Saot Amerika Notwes Eria blong Jos, mo tu, mi wan volontia misinari blong BYU-Pathway long Peru. Mi luk fulap laet long wanwan pikinini, mo mi stap leftemap tingting blong olgeta blong muv i go fored semmak olsem we ol fren blong oli bin mekem long mi long taem blong skul. Long wokbaot ia, mi kam blong luksave se Papa long Heven i bin stap wetem mi long evri step blong rod ia.
Papa long Heven I Wantem Yumi blong Win
Wokbaot blong mi i bin mekem testemoni blong mi abaot edukesen i kam moa strong. Mo mi plan blong gohed yet blong stap gro mo lanem fulap moa we mi save lanem evri dei. Yumi stap long wol ia blong progres, blong oli testem yumi, blong gro, blong pruvum fasin blong stap obei blong yumi, mo blong dipen long Sevya blong save kam klin inaf blong gobak stap wetem Papa blong yumi long Heven. Long God, “evri samting oli long saed blong spirit”—we insaed i gat edukesen tu (luk long Doktrin mo Ol Kavenan 29:34). Evri eksperiens we yumi gat mo save we yumi kasem long wol bae i helpem yumi blong kam moa olsem Sevya blong yumi mo bae i rere long yumi blong mekem ol desisen we oli moa gud, blong save givim seves moa gud long wol, mo blong stap olsem ol tul we oli moa gud long ol han blong Hem.
Edukesen i givim wan rod blong kasem save mo afta mekem folem, blong stanap from trutok mo raet, mo blong laef long wan laef we Papa long Heven i wantem blong yumi—wan laef we i fulap long glad.
Mi save se Papa long Heven i stap blesem yumi long ol efot blong yumi, speseli taem ol samting we hat blong yumi i wantem i blong progres mo blong givim seves long Hem mo ol pikinini blong Hem. Mi save se taem Hem i givim daereksen long ol pikinini blong Hem, “hem i mekem rere wan rod blong olgeta, blong oli save mekem samting ia we hem i talem long olgeta” (1 Nifae 3:7). !Hem i wantem yumi blong win!
Wanwan long yumi i mas mekem gud yus long wanwan janis blong edukesen mo gro we Lod i putum long rod blong yumi, nomata we i tru long BYU-Pathway o eni nara janis blong edukesen. Hem i lavem yumi mo oltaem i stap gaedem yumi. Hem i wantem yumi blong lanem evri samting we yumi save lanem long wol ia. Mo mi save se yumi eksperiensem ol bigfala mo gudfala merikel taem yumi stap wok strong wetem glad mo trastem gaed blong Hem. Mi save se mi mekem.