Yu Lavem, Hem I Sevem
Woman we i raet i stap long Yuta, YSA.
Yumi prea se bae hat blong ol pikinini blong yumi bae i jenis. Mo afta yumi no filim gud tumas taem yumi kam blong luksave (mo i mekem yumi fri).
Hasban blong mi mo mi i bin tijim ol pikinini blong mitufala long gospel. Mifala i gat skripja stadi evri moning, famli prea, mo famli haos naet evri wik. Mifala i bin go long jos tugeta, kakae tugeta, mo go long ol famli holidei. Ol pikinini blong mitufala i bin go long tempol oltaem blong mekem baptaes blong ol ded man, oli bin graduet long seminari, mo tu long olgeta i bin go long misin.
Mo afta, olsem ol adalt, oli bin stat blong wokbaot long ol rod mo tingting we oli defren long ol samting we mitufala i bin tijim olgeta. Wan afta wan, ol pikinini blong mitufala i stop blong stap tekpat long Jos kasem taem wan nomo aot long ol faef pikinini blong mitufala, i jusum blong kam long Jos. Mifala i bin krae fulap from ol pikinini blong mitufala mo askem mitufalawan sapos mitufala i no bin stap olsem ol gudfala papa mo mama o, sapos i gat wan samting we mitufala i save mekem i defren we mitufala i no mekem.
Blong wan longfala taem, mitufala i bin krae long Lod blong i jenisim hat blong olgeta, mo afta, Lod i bin ansarem ol prea blong mitufala. Be i no long wei we mitufala i stap tingting long hem.
Hem i soem long mitufala se mitufala i nid blong stat taem mitufalawan i jenisim hat blong mitufala be i no blong jenisim hat blong ol pikinini blong mitufala nomo. Taem ol papa mo mama i stap mekem wan impoten wok blong stap tijim ol pikinini blong olgeta, Hem i rimaenem mitufala se Jisas Kraes i Sevya mo Jaj blong olgeta.
Wetem strong tingting blong sevem ol pikinini blong mi, mi putum fulap taem blong mi blong stap prea, ridim ol skripja blong mi, mo go long tempol mo tingting se sapos mi mekem evri samting we i stret, bae mi kwalifae blong God i save kam insaed long ol hadtaem blong mi—olsem se mi hop se ol aksen blong mi bae i lidim God blong tekova long paoa blong olgeta blong jusum mo fosem olgeta blong biliv olsem we mi biliv.
Hasban blong mi mo mi i bin wantem tumas blong sevem olgeta, be wei we mitufala i lukluk blong sevem olgeta i luk moa olsem blong stap toktok fulap, hambak, o soem hamas mitufala i no agri long ol joes blong olgeta, we i lidim mifala i go stret long fasin blong raorao. Mitufala i luksave se fasin blong mitufala blong wantem tumas blong karembak ol pikinini blong mitufala, i stap pusumaot olgeta moa long mitufala. Taem oli stap filim mitufala i stap jajem olgeta mo no glad long olgeta, moa oli stap stap longwe long mitufala.
Ol prea blong mi i jenis i go long wan krae blong hat blong miwan i jenis. Mi kam blong luksave se ol risen blong mi blong stap wantem ol pikinini blong mi blong jenis i bin kam long wan rong ples. Mi prea blong moa lav. Mi prea tu, blong winim ol filing blong sem se famli blong mi i no luk semmak nating long ol famli ia we oli stret evriwan we ol fren blong mi i stap soem long sosol media wetem ol foto blong ol pikinini blong olgeta we oli mared long tempol o ol baptaes blong ol pikinini bubu blong olgeta.
Taem mi tanem mi i go long Sevya blong kasem hiling, hat blong mi i stat blong kam sopsop long ol pikinini blong mi. Mi kam blong luksave se blong lavem olgeta olsem we Hem i lavem olgeta i minim blong mekem sam jenis. Long Hem, lav i no olsem wan wei—hem i wan samting we i pusum tingting blong Hem blong mekem evri samting we Hem i stap mekem. Hem i bin talem se Hem i no bin mekem “eni samting sapos i no blong helpem wol; from hem i lavem wol” (2 Nifae 26:24).
Blong stap trastem paoa blong Sevya blong save mekem wok blong Hem (luk long 2 Nifae 27:20) i bin mekem mi blong save lukluk nomo blong stap lavem ol pikinini mo tanem pat ia blong sevem olgeta i go long Lod. I no bin minim se mi givap blong stap traem blong helpem olgeta, be taem blong stap lavem olgeta i kam olsem fos blong paoa biaen long ol fasin we mi stap mekem samting wetem olgeta, i bin jenisim olsem wanem mi stap mekem samting wetem olgeta.
Mi stat blong luk olgeta long wan defren laet. Mi stat blong stap lukluk moa long ol paoa blong olgeta mo ol talen blong olgeta mo stat blong luk olsem wanem oli ol gud pipol we oli gat lav mo stap givim samting wetem glad hat.
Hasban blong mi mo mi, i lisin moa mo no toktok tumas. Mitufala i askem ol kwestin abaot laef blong olgeta mo ol intres blong olgeta. Mifala i soem intres long olgeta be i no jajem olgeta. Mitufala i putum ol fasin blong lav long ples blong talem nogud mo no glad, mo ol pikinini blong mitufala i save filim tru.
Hom blong mifala i kam wan ples we oli save filim lav mo filim se oli save akseptem olgeta olsem we oli stap. Oli stop blong haedem ol samting long mitufala mo oli stat blong stap ones mo open abaot wanem i stap gohed long laef blong olgeta. Mifala i kam moa kolosap.
Famli blong mifala i wan wok we i stap gohed yet be ol pikinini blong mitufala i laekem blong stap kam long hom blong mifala mo pasem taem wetem mitufala naoia. Oli filim oli sef long fored blong mitufala, mo tru long lav blong mitufala, mi hop se bae oli save filim lav blong God long olgeta. Mi no bin save sapos bae hem i long laef ia o no we bae oli kambak long ol samting we oli bin tijim olgeta taem oli ol pikinini, be mi save se oli stap long han blong Sevya.