Man blong Plen We I No Fraet
I no gat wan man we i no fraet i wantem ansarem ofisa we i stap trenem mifala, be sek nomo se, wan yangfala man i putum han blong hem i go antap.
Pikja foto i kam long Deved Malan
Fulap yia i pas, mi bin joenem Yunaeted Stet Ea Fos blong wok blong kantri blong mi. I no long taem mi faenem miwan long wan kamp blong strong trening blong militeri long Teksas, YSA. Ol wik i pas sloslo taem mi stap strong blong go tru long fulap samting we i nomol blong wan i eksperiensem long strong trening kamp.
Wan dei mi bin go long wan bigfala miting blong ova long 200 man blong flae long plen, we evriwan i stap long semmak trening olsem mi. Miting i stap wetem wan long ol ofisa blong trening—we oltaem i singaot laod wetem ol strong lanwis—i stap singaot, “?I gat wan we i no agri long wei we mi stap mekem ol samting raon long ples ia?”
O yes, i no gat wan man i wantem ansa, be sek nomo, wan yangfala man i putum han blong hem i go antap.
“!Man blong plen, stanap!” ofisa ia i singaot. “?Wanem nao yu no agri long hem?”
Mifala i lisin gud taem yangfala man ia i talem strong se: “Mi no agri long yu blong stap talem nem blong Sevya blong mi olbaot. I mekem sol blong mi i harem nogud. Mi wantem askem yu blong stop.”
I nomo gat noes long rum. Ofisa ia i lukluk hem mo afta i askem se hem i blong wanem relijin. Man blong plen we i no fraet i talem wetem bigfala glad, “!Mi mi wan memba blong Jos Ia blong Jisas Kraes blong Ol Lata-dei Sent!”
Ofisa i talem tangkyu long man blong plen ia from strong tingting blong toktok, mo miting i bin gohed. Aksen ia i bin gat wan bigfala paoa long mi. Samtaem mi tingting long miwan se mi wantem blong gat kaen strong tingting olsem we man blong plen ia i bin gat.
Afta long strong mo medikol trening ia, oli asaenem mi long wan ami blong plen long Kolorado, YSA. Wan dei, mi kasem wan leta long bigfala boe blong mi we i stap wol long Filipin. Hem i bin joenem ami blong plen samples wan yia bifo mi. Hem i talem long mi se hem i kam wan memba blong Jos, mo hem i bin wantem blong mit wetem ol misinari. Wantaem nomo mi tingbaot eksperiens ia long strong trening blong militeri wetem man blong plen ia we i no fraet. Waef blong mi mo mi i bin mit wetem ol misinari, mo i no longtaem nomo mitufala i baptaes.
Sam manis afta, mi mekem ol misinari oli visitim smol brata blong mi. Hem mo waef blong hem tu, oli kasem baptaes. Ol brata blong mi mo mi naoia, mifala i gat ol bigfala famli wetem ol bubu pikinini. Mifala evriwan i lavem Lod wetem Jos blong Hem.
Mi no bin save nem blong man blong plen ia we i no fraet. Mi neva luk hem bakegen, be bae mi talem tangkyu kasem taem we i no save finis from strong tingting blong hem blong stanap from wanem we hem i biliv long hem.