Oli Putum Ol Hadtaem blong Olgeta long Saed
Long dei ia, Kendra, Brent, mo Tyson oli bin ol tru eksampol blong stap givhan olsem Kraes i mekem.
Pikja i kam long Trent Gudmundsen
Yumi evriwan i eksperiensem ol antap mo daon long laef, be 2013 i wan yia we i bin had lelebet blong famli blong mifala. Mifala i bin eksperiensem fulap samting we mifala i no luk i stap kam mo ol ripea blong haos mo trak we i sas tumas. Hasban blong mi Ryan, i bin lusum wok blong hem, mo las bon bebi boe blong mifala i bin bon wetem sam problem mo i mas stap blong sam wik long andanit long glas blong oli lukaot gud long hem. Mi tu, mi bin fesem hadtaem blong stap wari mo taet from bebi. Ol situesen ia, tugeta wetem blong stap olsem papa mo mama blong fo yangfala pikinini, i bin mekem i had bigwan long mifala long saed blong mane mo ol filing.
Ryan i bin faenem wan niu wok, be hem i stap wok long ol longfala aoa mo fulap taem hem i stap aotsaed long taon blong ol wik afta bakegen. Boe blong mi we i gat faef yia, Wesley, i stat blong stap wari mo harem nogud from papa blong hem i stap aot oltaem. Fulap taem hem i stap wekap long naet from ol nogud drim.
Famli blong mi we i no kolosap tumas long mi i stap help taem oli save mekem, be mi stap filim taet mo miwan yet fulap taem. Mi save se Papa long Heven i lavem mo save abaot famli blong mi, be mi filim se mifala i stap draon.
Wan aftenun, taem Ryan i stap aot long taon blong wok, mi bin draevem ol pikinini blong mi long skul blong kambak long haos mo mi bin prea strong from help. Afta long naet ia, neba blong mi Kendra i noknok long doa blong mifala. Hem i bin save abaot situesen blong mifala mo i askem sapos mi oraet. Mi nogat tingting blong komplen long hem, mo hem i las man we bae mi save askem help long hem. Hasban blong hem, Brent, i bin stap faetem kansa blong fo yia we i bin pas.
Mi bin talem long Kendra se mi oraet, be hem askem wetem tru hat bakegen sapos mi oraet. Wota i fulap long ae blong mi, mo mi talem hat blong mi long hem abaot ol hadtaem blong mi. Taem mi bin talem long hem abaot wari mo harem nogud mo nogud drim blong Wesley, hem i bin askem sapos mi wantem Brent blong givim wan blesing long Wesley.
I no long taem afta, Kendra, Brent, mo bigfala boe blong tufala, Tyson, i kam long doa blong mifala mo oli jenis long klos blong jos. Brent i wik long bodi. Mi save se i tekem evri paoa blong hem blong kam long haos blong mifala. Hem i givim wan blesing long Wesley, mo Tyson i givim wan blesing long mi.
Long dei ia, Kendra, Brent, mo Tyson oli bin ol tru eksampol blong stap givhan olsem Kraes i mekem. Oli bin putum ol hadtaem blong olgeta long saed mo wetem tru hat, oli givim lav mo sore long mifala. Mi bin filim blesing se Papa long Heven i bin ansarem prea blong mi long gudfala wei ia. Brent i ded tu wik afta.
Long dei ia long hom blong mifala, Brent i bin stanap olsem wan witnes blong God taem we hem i stap yusum prishud wetem stret mo gud fasin (luk long Mosaea 18:9). Long mi, givhan blong hem long famli blong mi i tabu from i bin wan long ol las wok blong hem we hem i bin mekem long wol.