Stap Wet long Promes
Gel blong mi i bin go longwe long Jos, be mi save se bae hem i kasem blesing long ol samting we hem i bin lanem abaot gospel.
Pikja i kam long Megan Schaugaard
Tri manis bifo hem i kasem 21 yia blong hem, mi bin kasem baptaes tugeta wetem sista blong mi, mama blong mi, mo nefiu blong mi we i gat eit yia. Ol yia i go mo mifala i hang strong long gospel nomata ol fulap jalenj blong mifala.
Taem hasban blong mi mo mi i mared, mitufala i bin tingting strong blong stap strong long Jos. Taem ol pikinini i kam, hasban blong mi mo mi i traehad blong stap olsem ol gudfala papa mo mama mo blong tijim gospel insaed long hom blong mifala.
Wan dei mi bin go long wan konfrens wetem gel blong mitufala we i gat wan yia. Long konfrens ia, wan Eria Seventi i bin tokbaot responsabiliti blong ol papa mo mama blong tijim gospel long ol pikinini blong olgeta. Afta hem i bin mekem wan promes we i bin tajem mi bigwan. Hem i talem: “Sapos, afta evri samting we yu save mekem blong tijim gospel mo wan long ol pikinini blong yu i lego Jos, bae oli stil kasem blesing from ol samting we oli tingbaot we oli bin eksperiensem long hom.”
Ol toktok blong Eria Seventi ia i bin fulumap mi wetem hop from mi gat ol nis mo nefiu we oli bin lego Jos. Plante yia afta, semmak pikinini blong wan yia ia we bin holem long ol han blong mi long taem blong konfrens ia, i lego Jos taem hem i kasem 17 yia. Hem i bin faenem wan man we i no groap long gospel, mo tufala i bin mared. Hem i neva go long jos afta long hemia.
I bin soa bigwan long mi. Mi askem miwan bakegen mo bakegen, wanem mifala i bin mekem i no stret. Oltaem papa blong hem mo mo i bin traem blong folem ol komanmen mo givim seves insaed long Jos. Mifala i lavem ol pikinini blong mifala mo wantem wanem we i moa gud blong olgeta. Afta long fulap krae mo kwestin, mifala i agri nomo se ol pikinini oli gro, yusum fridom blong jusum, mo oli no stap bilivim ol samting we oli stap lanem long hom oltaem.
Sori tumas we, mared blong gel blong mi i brok, mo hem i no wantem kambak long Jos yet. Mi save tingbaot nomo promes ia se bae hem i tingbaot mo bae i kasem blesing from ol samting we mifala i bin tijim long hem long hom.
Mi gohed blong prea from gel blong mi. Mi lavem hem wetem ful hat blong mi, mo i soa long mi blong luk hem longwe long Jos. Be mi save se, nomata ol samting we mi no stret long hem, ol samting we mi bin tijim hem oli stret mo tru. Mi save se Papa long Heven i stret mo gat lav mo Hem i stap lisin long ol prea blong yumi. Mi save long hat blong mi mo nogat tu tingting se, sapos mi mekem pat blong mi, bae Hem i ansarem olgeta long ol taem we Hem i luk i stret.