?Olsem Wanem Yumi Save Stanap Agensem Ol Giaman Tijing?

6–12 Julae

Koriho i wan man we i no biliv long Kraes we i bin prij “agensem ol profesi we ol profet oli bin talemaot, long saed blong taem we Kraes bae i kam” (Alma 30:6). Hem i prijim ol nara giaman mo i lidim “ol hat blong plante i go longwe” (Alma 30:18).

Nomata hemia i bin hapen i bitim 2,000 yia i pas finis, plante pipol i prijim ol semmak samting. ?Wanem nao yumi save mekem blong mekem yumi stap strong agensem ol giaman tijing long taem blong yumi?

Yumi Save Kasem Testemoni blong Yumiwan

Koriho i bin tijim ol pipol “se bae i no gat Kraes” mo “i no save gat wan atonmen i hapen,” mo hem i tanem baksaed blong hem long God se i no gat God (luk long Alma 30:12, 17, 28).

?Olsem wanem yumi save save se God mo Jisas Kraes i stap laef? ?Wanem ol skripja o eksperiens blong yuwan we i bin mekem testemoni blong yu abaot Olgeta i kam moa strong?

Yumi Save Dipen long Revelesen

Koriho i bin tanem baksaed blong hem long spirit blong profesi mo revelesen. Hem i bin traem blong mekem ol pipol i biliv se “i no gat wan man we i save eni samting we bae i kam” mo “yufala i no save kasem save long ol samting we yufala i no luk” (Alma 30:13, 15).

Yumi save lukluk i go long ol profet mo aposol blong kasem toktok blong God long taem blong yumi. ?Olsem wanem nao blong stap folem profet i protektem yu agensem ol giaman tijing?

Yumi Save Tingbaot Se Trutok Hem I Trutok

Koriho i bin talem long pipol se i no gat wan wei we oli save wanem i tru (luk long Alma 30:24), be Presiden Russell M. Nelson i bin tijim: “Sam samting oli simpol mo tru nomo. …

“… Trutok i stanap long ol loa we God i bin stanemap. … Ol loa we i no save finis i wok insaed mo i gat paoa long laef blong yumi wanwan, nomata we yumi i biliv long hem o no” (“The Love and Laws of God” [Brigham Young University devotional, Sept. 17, 2019], speeches.byu.edu). ?Olsem wanem yumi save faenemaot ol trutok blong God, mo olsem wanem oli blesem laef blong yumi?