?Olsem Wanem Wan Nem I Impoten?

29 Jun–5 Julae

Afta we oli jenisim laef blong olgeta, Ol Man blong Leman we oli fetful oli bin wantem wan niu nem blong mekem oli luk defren long ol narafala Man blong Leman olsem wan saen we oli bin jenisim laef blong olgeta i go long Kraes. Oli singaotem olgeta Ol Antae-Nifae-Lihae (luk long Alma 23:16–17). Yumi mekem yumiwan i luk defren long ol narawan tedei taem yu stap tekem nem blong Jisas Kraes long yumi.

Saen blong Fasin blong Jenisim Laef blong Yumi

Taem yumi baptaes, yumi mekem kavenan wetem God blong yumi tekem nem blong Kraes long yumi. Evri taem yumi tekem sakramen, yumi stap riniu kavenan ia. ?Wanem kavenan yumi mekem blong tingbaot mo mekem taem yumi tekem nem blong Hem long yumi? (Luk long Mosaea 18:8–9; Doktrin mo Ol Kavenan 20:77.)

Wan Witnes blong Kraes

Ol Aposol oli ol “spesel witnes long nem blong Kraes long ful wol” (Doktrin mo Ol Kavenan 107:23). Yumi save stap olsem ol witnes blong Kraes tu. ?Olsem wanem yu save stanap wetem profet mo ol aposol mo stap olsem wan witnes blong nem blong Kraes long ol pipol raon long yu?

Wan Ples blong Kasem Paoa

I no longtaem i pas, Presiden Nelson i bin askem strong long yumi blong singaotem Jos folem stret nem blong hem, we hem i: Jos Ia blong Jisas Kraes blong Ol Lata-dei Sent. Hem i bin promesem se bae paoa i kapsaet long ol Sent taem yumi stap yusum stret nem blong Jos (luk long “Stret Nem blong Jos,” Liahona, Novemba 2018, https://www.churchofjesuschrist.org/study/liahona/2018/11/sunday-morning-session/the-correct-name-of-the-church?lang=bis). ?Wanem sam samting we yu save mekem blong yusum stret Nem blong Jos moa mo helpem ol narawan blong mekem semmak?