?Yu Gat Sam Kwestin Abaot Gospel? Hemia Faef Wei blong Faenem Ol Ansa

I Kam long Chakell Wardleigh

Ol Magasin blong Jos

Mi gat ol kwestin tu. Mo i no gat samting blong fraet long hem.

“?Eniwan i gat eni kwestin?

?Yu eva harem hemia long en blong wan lesen mo tingting long yuwan se, “Yes, mi gat wan milian kwestin” o “Yes, mi lus evriwan,” be yu gohed blong stap kwaet nomo?

Mi bin filim olsem. Mo samtaem mi stap gohed blong fraet yet blong gat ol kwestin.

Mi fraet blong no save inaf, o wanem bae ol nara wan bae oli tingting long mi, o blong nomo gat infomesen we bae i lego mi wetem fulap moa kwestin.

Nomata hemia, i no mas gat fraet o sem blong gat wan kwestin mo blong wantem blong andastanem moa, speseli taem yumi tokbaot gospel. !Papa long Heven i wantem yumi blong lukaotem fulap moa save! Mo Elda Dieter F. Uchtdorf i bin talem, “Blong askem ol kwestin i no wan saen blong wiknes; hem i wan saen blong save gro.”¹

Evriwan i gat fulap moa blong lanem. Mo ol kwestin oli openem doa long save mo fet we i moa bigwan—!sapos nomo we yu stap lukaot ol ansa long ol raet wei! Hemia faef wei blong save andastanem ol kwestin blong yu moa.

1. Jekem Ol Ples We Yu Karem Infomesen long Hem

I gat fulap gudfala ples we yu save karem infomesen long hem we yu save trastem we i save givim yu moa tingting olsem ol skripja mo ol Jos materiol. Be i gat tu, fulap giaman infomesen mo ples we i no sef blong karem infomesen we i stap olbaot long wol. !Laki se yu save luksave trutok mo giaman!

Anthony Sweat, wan asisten profesa blong Jos histri mo doktrin long Brigham Yang Yunivesiti, i givim faef kwestin blong askem sapos yu wantem save sapos yu save trastem ples we yu stap karem infomesen long hem o no:

?Hem i wan stamba ples blong karem infomesen? (Man we i raetem o givim i bin tekpat o lukluk gud taem ia.)
?Hem i wan stori blong taem ia? (Oli rekodem long taem ia o kolosap long taem we i bin hapen.)
?Hem i gat wan stamba tingting o lukluk? (Man we i raet i lukaot blong stap fea, balens, no stap fevret, mo tritim samting i sem semmak.)
?Wanem i rilesensip blong hem i go long ol nara ples blong infomesen? (Ol deit, tru samting, klem, mo sam moa oli semmak wetem ol nara ples blong infomesen we i stap tokbaot semmak taem ia.)
?Ol samting we oli stap klem long hem oli sapotem wetem pruf? (Ol stetmen oli mekem folem pruf mo ol infomesen we oli sapotem.)²

Elda Jeffrey R. Holland blong Kworom blong Olgeta Twelef i bin tijim, “Long saed blong fet mo strong save, !i help blong askem man we i gat fet mo strong save!”³ Ol toktok mo ol kwestin antap i save givim tras long yuwan blong faenem infomesen we yu trastem.

2. Dipen long Ol Toktok blong Ol Profet

Ol profet mo aposol oli eksplenem doktrin mo trutok (!mo hemia ol ansa blong yu!) tru long revelesen. Mi bin kasem kamfot long fulap taem we mi no save kaontem taem mi stap ridim o lisin long ol toktok blong jeneral konfrens taem mi konfius o filim nogud.

Nomata we yu no andastanem evri samting abaot sam long mesej blong ol Jos lida, tingbaot se ol toktok blong olgeta i kam long Papa long Heven— oli kam long wan ples blong lav mo trutok. Sapos yu tingbaot mo trastem ol toktok blong Elda Ulisses Soares: “Blong gat ol profet i wan saen blong lav blong God long ol pikinini blong Hem,”⁴ bae yu karem hop i kam insaed long laef blong yu, nomata long wanem save nao yu stap lukaotem.

3. Stadi Ol Skripja … Stadi Gud

?Skripja blong yu i luk olsem wanem? !Blong mi ating i save moa gud! Be taem mi traehad blong tingting hevi long wanem mi stap ridim, mi luksave wan samting i defren long miwan. Mi filim moa pis mo hop. Blong openem maen blong yu long insperesen blong ol skripja, traem ol samting ia:

Statem mo endem stadi blong yu wetem wan prea. Taem yu invaetem Spirit blong helpem yu blong andastan, bae yu luksave ol tingting mo lukluk we i moa bigwan.
Raetemdaon ol filing mo tingting we yu kasem. Taem yu stap ridim ol filing mo tingting ia afta bae i save helpem yu blong save andastanem ol samting long laef blong yu mo luksave ol ansa taem we taem i stap go.
Tekem wan taem blong stap kwaet. Sidaon kwaet mo wajem gud ol tingting mo filing we i stap kambak long yu bakegen mo bakegen afta we yu rid mo stadi. Tingbaot se, Spirit i stap toktok long wan kwaet, smol voes.

4. Lanem Olsem Wanem blong Kasem Revelesen

Long taem ia blong laef, mi bin nidim Papa long Heven moa bitim oltaem blong i gaedem mi mo helpem mi blong mekem fet blong mi i kam moa strong. Mo samtaem mi bin kros tumas taem mi stap mekem evri samting blong invaetem Spirit be yet, mi no stap kasem eni ansa i kam long heven. Tangkyu tumas we, mi bin lanem long Sista Sheri Dew, foma Seken Kaonsela blong Jeneral Presidensi blong Rili Sosaeti, se blong openem rod blong toktok long Papa long Heven, askem yuwan ol kwestin ia:

?Yu stap gat tingting ia se i gat ol ansa long ol kwestin we yu stap askem?
?Yu yu glad mo wantem blong trastem Lod mo bilivim se bae Hem givim bes we Hem i save givim?

Mo afta askem Papa long Heven:

Blong tijim yu olsem wanem Hem i stap toktok long yu yuwan.
Olsem wanem Hem i filim abaot yu.

“Mo afta wajem olsem wanem Hem i stap tijim yu,” hem i talem. “Tekem insaed tu, ol skripja we i stap pulum yu, ol impoten samting long ol toktok blong jeneral konfrens we maet yu bin mestem taem yu ridim faswan, mo gohed i go. … Taem, taem i stap go, bae Hem i talem long yu, mo taem Hem i talem, bae yu lanem moa abaot spirit blong luksave revelesen tru long Spirit.”⁵

Tufala impoten kwestin ia i bin mekem wan bigfala samting i defren long paoa blong mi blong luksave mo kasem revelesen.

5. Hang Strong long Wanem Yu Save Finis

Samtaem ol ansa oli no kam kwiktaem nomo. Maet bae ansa blong yu naoia hem i simpol nomo olsem blong trastem Papa long Heven mo gat fasin blong save stap wet longtaem. Tingbaot advaes blong Elda Uchtdorf’s blong “tingting tu abaot ol tu tingting blong yu bifo yu gat tu tingting long fet blong yu.”⁶

Sapos yu stap filim daon, tingting long ol trutok we yu holem insaed long hat blong yu. Taem mi stap fesem hadtaem, mi tingbaot ol taem ia taem we mi bin save wetem strong tingting se mi wan gel blong Papa mo Mama long Heven we Tufala i lavem tumas, mo we God i gat wan plan blong mi, mo we Jisas Kraes i Sevya blong mi.

Taem yu gat ol kwestin, i save isi long yu blong lukluk nomo long wanem we yu no andastanem bitim wanem we yu andastanem. Be sapos yu glad blong wantem blong mekem hat blong yu i sopsop, gat wan lukluk we i blong taem we i no save finis, mo putum tingting i stap daon blong putum wanem yu wantem long wan stret laen wetem hemia blong Papa long Heven, bae oltaem Hem i lidim yu i go long trutok mo givim yu hop kasem taem sam moa save i kam long yu. Mo wan dei, bae yu gat ol ansa long evri kwestin blong yu (luk long Doktrin mo Ol Kavenan 101:32–36).