Ol Yang Adalt
Wan Samting abaot Fiuja we Mi Save Kontrolem
Pikja foto i kam long Getty Images
I stap kam moa had blong no lisin long smol voes ia insaed long hed blong mi. Mi stap ia we mi gat 28 yia, mi singgel yet mo no sua tumas long wanem mi wantem blong mekem olsem wan wok, nomata we mi bin gat wan gudfala wok eksperiens olsem wan midwaef we i stap lukaotem wan mama we i stap bonem bebi. Mi filim olsem evri lukluk blong mi long laef blong mi i no stap wok gud. Mi stap gat tu tingting long ol joes blong laef mo mi no save wij rod blong tekem Mi filim se mi jes lus nomo.
Long wan dei we mi no filim gud tumas abaot miwan, wan fren we mi no bin toktok wetem hem blong longtaem i ringim mi. Taem hem i askem sapos mi oraet, mi eksplenem evri filing blong mi we mi stap traehad wetem. Hem i bin lisin mo afta i talem, “Okei, ?be yu oraet long saed blong spirit?”
“O yes, hemia i stret evriwan,” mi ansa kwiktaem nomo. “Mi neva filim kolosap long God olsem long laef blong mi.”
Afta hem i ansa, “Be yu nomo nid blong wari abaot eni nara samting bakegen.”
Gat Tras long Plan blong God We I Stret Evriwan
Stat long taem we mitufala i stori, mi kam blong luksave tu samting. Faswan, mi luksave se mi talem tangkyu tumas blong gat wan strong testemoni long gospel we i kambak mo blong save laef folem ol komanmen mo filim se mi joen wetem heven.
Blong stap dipen miwan long saed blong spirit i impoten tumas long mi, mo mi stap lanem yet olsem wanem blong openem ol heven long laef blong mi. Blong stap prea mo stadi long ol skripja evri moning oli tu simpol samting we mi filim se i mekem bigfala samting i defren long paoa blong mi blong kasem revelesen blong miwan. Mi filim tu, se mi joen moa wetem heven taem mi mekem wan efot blong stap kaen, blong gat wan helti laef mekem se Spirit oltaem i save stap olsem kompanion blong mi, blong stap obei long ol komanmen, mo blong sakem sin wetem wan tru hat mo tingting.
Nambatu, mi luksave se ansa blong mi long kwestin blong fren blong mi i no stret evriwan—mi bin ting se mi oraet “evriwan” long saed blong spirit, be mi nidim blong gat moa fet, blong stop wari tumas, mo trastem God blong lukaot long ol samting we mi no save kontrolem.
Iven taem i gat sam lukluk long laef blong mi we i so stap go gud tumas olsem we mi wantem, mi save se impoten samting i blong mekem samting wetem fet mo soem long God se mi yusum paoa blong jusum blong mi blong mekem ol gud joes. Mi lanem se taem laef i no go gud long wei we mi ting se bae i go olsem, i olsem blong mekem se mi save lan mo gro long ol wei we mi no save mekem sapos i no bin olsem.
Mi neva pikjarem long maen blong mi se long namba 29 yia blong mi, bae mi faenem miwan i stap gat tu tingting abaot wok blong mi long fiuja mo nekis level blong laef blong mi. Be yet, nomata long ol samting ia we yumi no save, mi save gat ful tras long God se Hem i gat wan plan we i stret evriwan blong mi. Hem i save stret wanem i stap hapen mo wanem mi nidim, mo oltaem bae Hem i lukaot long mi (luk long Matiu 6:28–34). Semmak nomo olsem we Elda L. Todd Budge blong Ol Seventi i bin tijim: “Olsem we i had blong andastanem, speseli long ol taem long laef blong yumi taem ol win we oli blo i kam long fored oli strong mo ol si oli muvmuv, yumi save kasem kamfot long save ia we God long gudfala fasin blong Hem we i no gat en i stap oltaem blong pusum yumi i gohom” (“Wan Tras we I Semmak Oltaem mo I Wantem Gohed,” Liahona, Novemba 2019, https://www.churchofjesuschrist.org/study/liahona/2019/11/27budge?lang=bis).
Trastem Moa; No Wari Tumas
Sam dei mi filim laef i had we, be taem mi tingbaot gud, mi save se mi no nid blong wari. Smol afta smol, mi kam blong luksave se mi nidim blong trastem God smol moa mo no wari tumas abaot ol samting we mi no save kontrolem. Wan samting ia we mi save kontrolem abaot fiuja hem i blong stap trastem God mo wok mo gro moa kolosap long Hem evri dei.
Taem mi filim se mi lus, oltaem i gat inaf laet blong mi blong tekem wan step i go insaed long ples ia we mi no sua long hem mo muv i go fored. Sapos mi gohed blong eksasaesem fet mo kipim ol kavenan blong mi, sapos mi gohed blong tingbaot tru aedentiti blong mi olsem wan gel blong Papa mo Mama long Heven mo traem bakegen mo bakegen, ol samting bae oli hapen taem mo olsem we oli sapos blong hapen, mo hemia i evri samting we i mata.