PŌPOAKI MEI HE KAU TAKI FAKAʻĒLIÁ
Talaʻofa Fakaepalōfita
Talu mei he Konifelenisi Lahi fakaʻofoʻofa ʻo ʻEpeleli 2020, naʻá ku fakakaukau ai ki hono ʻuhinga ʻo e ngaahi lea, Ngaahi Talaʻofa Fakaepalōfitá.
Kuó ke ʻosi fanongo ai? ʻOkú ke taukaveʻi ia?
ʻOku tau maʻu ha fakakaukau maʻongoʻonga ki he Ngaahi Talaʻofa Fakaepalōfita mei ha foʻi veesi ʻe ua ʻi he Tokāteline mo e Ngaahi Fuakavá.
ʻUluakí, Vahe 1:38 ʻoku akoʻi ai ʻi he taimi ʻoku lea mai ai ʻa e tamaioʻeiki ʻa e ʻEikí, ʻa ʻEne palōfitá, ʻoku hangē pē ʻoku lea tonu mai ʻa e ʻEikí; “. . . neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē.”
Ko hono uá, Vahe 82:10 ʻokú ne tānaki mai ʻa e tukupā fakaselesitiale maʻongoʻonga ko ʻení; “Ko au, ko e ʻEikí, ʻoku ou haʻisia, ʻo ka mou ka fai ʻa e meʻa ʻoku ou lea ʻakí; ka ʻo ka ʻikai te mou fai ʻa ia ʻoku ou lea ʻakí, ʻoku ʻikai hamou talaʻofa.”
Neongo naʻe maʻu pea lekooti e ongo veesi ko ʻení ʻi ha maʻu fakahā kehekehe, kapau ʻe lau fakataha kinaua, ʻokú na ʻomai ha mahino, ʻuhinga mo ha mālohi foʻou.
ʻI hono fakatahaʻi ʻa e ngaahi tefitoʻi moʻoni ʻi he ongo vēsí ni, ʻokú ne fakapapauʻi mai, ko e lea ʻa e Kau Palōfita moʻuí, Kau Tangata Kikite mo e Kau Tangata Maʻu Fakahaá, “ʻOku ou palōmesi atu” ʻoku haʻisia ʻa e ʻEikí ki he palōmesi ko iá, kapau te tau moʻui ʻaki ʻa e ngaahi meʻa ʻoku totonu ke tau tomuʻa fakahokó ʻa ia ʻoku makatuʻunga ai ʻa e ngaahi tāpuaki kuo talaʻofa maí.1
ʻOku ʻi ai e makatuʻunga ʻe tolu ki hono maʻu e, Ngaahi Talaʻofa Fakaepalōfitá.
-
Mātuʻaki fekumi kiate kinautolu.
-
Fakatokangaʻi ʻa e meʻa ʻoku fie maʻu ke fai ke lava ke maʻu ai kinautolú.
-
Moʻui ʻaki ia ke lava ke maʻu kinautolu.
Naʻe ʻomi ha Ngaahi Talaʻofa Fakaepalōfita ʻe hiva ʻi he Konifelenisi Lahi ʻo ʻEpeleli 2020.
Palesiteni Lāsolo M Nalesoni; “Naʻá ku palōmesi atu kimuʻa, kapau ʻe fai hotau lelei tahá ke fakafoki e hingoa totonu e Siasi ʻo e ʻEikí, te Ne lilingi hifo Hono mālohí mo e ngaahi tāpuakí ki he ʻulu ʻo e Kāingalotu ʻi he Ngaahi ʻAho Kimui Ní, kuo teʻeki ai ke tau mātaʻia hano tatau. ʻOku ou fakafoʻou atu ʻa e palōmesi ko iá he ʻahó ni.”2
“ʻOku ou palōmesi atu ʻi hoʻo fakalahi ho taimi ʻi he temipalé mo e ngāue hisitōlia fakafāmilí, te ke tupulaki mo fakalahi hoʻo malava ke fanongo kiate Iá.”3
ʻI he lea tatau pē naʻe pehē ai ʻe he palōfita ʻa e ʻEikí; “Ko e hā ʻe hoko ʻi hoʻo fanongo lelei ange, tokanga mo talangofua ki he meʻa kuo folofola mai ʻaki ʻe he Fakamoʻuí, mo e meʻa ʻokú Ne folofola ʻaki he taimí ni ʻo fakafou ʻi Heʻene kau palōfitá? ʻOku ou palōmesi atu ʻe tāpuekina ʻaki kimoutolu ha mālohi lahi ange ke fepaki mo e ʻahiʻahí, faingataʻá, mo e vaivaí. ʻOku ou palōmesi atu ha ngaahi mana ʻi hoʻomou nofo-malí, vā fetuʻutaki fakafāmilí, mo e ngāue fakaʻahó. Pea ʻoku ou palōmesi atu ʻe tupulaki homou ivi ke ongoʻi e fiefiá neongo ʻo ka fakautuutu e palopalemá ʻi hoʻomou moʻuí.”4
ʻI he fakaʻosinga ʻo e Konifelenisí, naʻe tuku mai ʻe Palesiteni Nalesoni ʻa e palōmesí ni. “ʻOku mau lotua te mou kamata foʻou moʻoni ke fanongo, tokanga mo talangofua ki he ngaahi lea ʻa e Fakamoʻuí. ʻOku ou palōmesi atu ʻe muiaki mai ha ilifia siʻi ange pea tupulaki ʻa e tuí.”5
ʻEletā Nila L ʻEnitasoni: “ʻOku ou palōmesi atu ʻi hoʻo fakahā loto-fiemālie mo mataʻikoloa ʻaki ʻa e ngaahi meʻa fakalaumālie fakangalongataʻa ʻoku hoko ʻi hoʻo moʻuí, ʻe lahi ange ʻa ʻene hoko mai kiate koé.”6
Naʻe pehē ʻe ʻEletā ʻUlise Soalisi ʻi heʻene lea ʻaki ʻa e Tohi ʻa Molomoná: “ʻOku ou palōmesi atu ʻi hoʻo lotua mo ako maʻu pē ʻa hono ngaahi leá, te ke lava ʻo maʻu ʻa hono ngaahi talaʻofá mo hono ngaahi tāpuaki mahutafeá ʻi hoʻo moʻui. ʻOku ou toe fakamoʻoni atu ki he talaʻofa ʻoku vanavanaiki mai mei hono ʻū laʻi pēsí: ʻa ia kapau te mou ‘kole ki he ʻOtua, ko e Tamai Taʻengatá, ʻi he huafa ʻo Kalaisí, pe ʻoku ʻikai ke moʻoni ʻa e ngaahi meʻá ni; pea kapau te mou kole ʻi he loto-fakamātoato, mo e loto-moʻoni, ʻo maʻu ʻa [e] tui kia Kalaisí,’ te Ne fakahā ʻa hono moʻoní kiate kimoutolu, ʻi he mālohi ʻo e Laumālie Māʻoniʻoní.”7
Naʻe pehē ʻe ʻEletā Ronald A Rasband: “ʻOku ou palōmesi atu kapau te mou muimui ki he akonaki fakalaumālie ʻa hotau palōfita ʻofeina ko Palesiteni Lāsolo M. Nalesoní, hono ongo tokoní, kau ʻAposetoló mo e kau taki kehe ʻo e Siasí, pea ʻi hoʻomou tokanga ki he kau palōfita he kuongamuʻá ʻa ia ne nau tomuʻa fakahā ʻa hotau kuongá, ʻe fakafonu ʻa kimoutolu, ʻi homou lotó mo e laumālié, ʻaki e laumālie mo e ngāue ʻo hono Fakafoki Mai ʻo e ongoongoleleí. ʻOku ou palōmesi atu te mou mamata ki he toʻukupu ʻo e ʻOtuá ʻi hoʻomou moʻuí, fakafanongo ki Heʻene ngaahi ueʻi fakalaumālié, pea ongoʻi ʻa ʻEne ʻofá.”8
ʻOku ou fakahā ʻeku loto houngaʻia moʻoni ki he tataki ʻa e Kau Palōfita moʻuí, Kau Tangata Kikite mo e Kau Tangata Maʻu Fakahā. Hono ʻikai fakaʻofoʻofa ke maʻu ʻenau tataki fakalaumālié mo e sīpinga ʻo e ʻofa ki he ʻEiki ko Sīsū Kalaisí.
ʻOku ou ʻiloʻi fakapapau ʻoku fanongo mai ʻa ʻetau Tamai Hēvaní mo Ne tali ʻetau ngaahi lotú. ʻI he taimi ʻoku palōmesi mai ai ʻa e Kau Palōfitá, Kau Tangata Kikité mo e Kau Tangata Ma‘u Fakahā kiate kitautolú, ʻe hoko e ngaahi palōmesi ko iá kapau te tau moʻui ʻaki ke lava ʻo maʻu ia. ʻOku ou toe fakamoʻoniʻi ko Sīsū ʻa e Kalaisí, ʻa ia ko e Mīsaia naʻa tau tatali fuoloa ki aí mo e Fakamoʻui ʻo e māmani. ʻOkú Ne moʻui!