Ngaahi Peesi Fakalotofonuá
Fanogonongo ʻo e Ngaahi Fakaʻatā Makehe ki he Tuʻunga ʻo e Vala maʻá e Kau Faifekau Tangata Kei Talavoú
ʻI Sune ʻo e taʻu ní, naʻe fanongonongo ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha ngaahi fakaʻatā makehe ki he tuʻunga ʻo e vala maʻá e kau faifekau tangata kei talavou ʻoku nau lolotonga ngāue fakafaifekaú.
Ko e fakaʻatā makehe ko ʻení naʻe fakangofua ia ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá, ʻe ʻave ki he Kau Palesitenisī Fakaʻēliá ʻa e taukei ke fetongi ʻa e vala faifekaú ʻi ha ngaahi feituʻu makehe ke fakalakalaka mo tauhi ʻa e molumalu, malu, lelei, faingofua ange pea mo e ongoʻingofua ʻo e ʻulungaanga fakafonuá lolotonga hono fakafofongaʻi lelei ʻa e ʻEikí mo Hono Siasí.
Naʻe pehē ʻe ʻEletā Tieta F. ʻUkitofa, ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá pea sea ʻi he Fakataha Alēlea Pule ʻo e Ngāue Fakafaifekaú, “ʻOku feliliuaki e vala faifekaú ʻi he taimi kotoa ʻo fakatatau ki he feituʻú, sīpingá mo e ʻulungaanga fakafonuá.” “Ko e ngaahi fakaʻatā makehe ko ʻení ko ha hokohoko atu ia ʻo e ngāue ko iá. ʻI he kotoa ʻo ʻetau ngaahi fakakaukaú, te tau fakamuʻomuʻa pē ʻa e uiuiʻi ke ngāue fakafaifekaú ke fakafofongaʻi ʻa Sīsū Kalaisi, ʻenau moʻui leleí mo malú, pea mo e mahinongofua ʻo e ʻulungaanga fakafonua ʻo e ngaahi feituʻu ʻoku nau ngāue ki aí.”
ʻI he ngaahi fakahinohino foʻoú, ko e tuʻunga ʻo e vala fakafaifekau ʻoku toe fakamamafaʻí, ʻa ia ʻoku kau ai ʻa e sote hinehina mo e hēkesi, ʻi he ngaahi feituʻu ʻe niʻihi, ko e kote. ʻIkai ko ia pē, ka ʻi he ngaahi feituʻu kuo ʻosi fakangofua ai e akoʻí, kau talavoú (ʻa ia ʻoku ʻiloa ko e kau ʻeletā) ʻe malava pē ke nau tui sote hinehina pē lanu taha pulū mo e hēkesi pe taʻe-hēkesi. ʻE toki fakapapauʻi ʻe he Kau Palesitenisī Fakaʻēliá ʻa e ngaahi fakaʻatā makehe ko ʻení, pea ʻe toki fakamahino ia ki he kau faifekaú ʻe heʻenau palesiteni fakamisioná pe ʻoku kaunga ʻa e ngaahi fakaʻatā makehe ko ʻení ki honau ngaahi feituʻu akoʻí.
ʻE hokohoko atu ke tui sote hinehina pea mo e hēkesi kotoa ʻa e kau ʻeletaá, ʻi he ngaahi feituʻu ʻe niʻihi, kote ʻi he taimi ʻalu ki he temipalé, ngaahi houalotu ʻaho Sāpaté, konifelenisi fakatakimuʻa mo fakasouní, ngaahi senitā akoʻanga fakafaifekaú, ngaahi ouau papitaisó pea mo ha ngaahi fakatahaʻanga kehe ʻa e Siasí.
Naʻe pehē ʻe ʻEletā ʻUkitofa, “Ko e teunga fakafaifekaú ʻe kei molumalu maʻu pē, fakaʻapaʻapaʻi mo fakafaingofuaʻi ʻi hono fakahoko ʻe he kau faifekaú ʻenau taumuʻa ʻo e akoʻi e kakaí fekauʻaki mo e ongoongolelei ʻo Sīsū Kalaisí.”
Ko e fanongonongo ko ʻení ʻokú ne muimuiʻi ʻa e liliu ʻo e tuʻunga taau ʻo e valá ʻi Tīsema 2018 maʻá e kau finemui ʻoku nau lolotonga ngāue ko e kau faifekaú.